ရောင်နီ (NSS) - ‌နိုဝင်ဘာ ၂၅

          အမေရိကန်မှာ အသီးအနှံတွေနဲ့ ဆက်စပ်တဲ့ Salmonella ဘက်တီးရီးယား ကူးစက်ဖြစ်ပွားမှုကြောင့် လူနှစ်ဦးထက်မနည်း သေဆုံးပြီး ၉၉ ဦးထက်မနည်း နာမကျန်းဖြစ်ခဲ့တယ်လို့ အမေရိကန် ရောဂါထိန်းချုပ်ရေးနဲ့ ကာကွယ်ရေးဗဟိုဌာန(CDC) က သောကြာနေ့(နိုဝင်ဘာလ ၂၄ ရက်)မှာ ပြောကြားခဲ့ပါတယ်။ 

ပြည်နယ် ၃၂ ခုမှာ Salmonella ရောဂါဖြစ်ပွားမှုကြောင့် လူ ၄၅ ဦး ဆေးရုံတင်ထားရပြီး ယခုသေဆုံးသူနှစ်ဦးဟာ မီနီဆိုးတားပြည်နယ်မှဖြစ်တယ်လို့ CDC က ဆိုပါတယ်။ ဒါကြောင့် ကူးစက်မှုနဲ့ ဆက်စပ်အသီးအနှံတွေ ပြန်လည်သိမ်းဆည်းခြင်းတို့ပြုလုပ်နေပြီး အဆိုပါ အသီးအနှံတွေ ဝယ်ယူထားပြီး ဖြစ်နေရင်လည်း စွန့်ပစ်ခြင်း သို့မဟုတ် ဝယ်ယူခဲ့တဲ့ စတိုးဆိုင်ကို ပြန်ပေးခြင်းတို့ ပြုလုပ်နိုင်တယ်လို့ CDC က ပြောကြားခဲ့ပါတယ်။ 

ဒါ့ပြင် ဆပ်ပြာ၊ ရေပူ နဲ့ သစ်သီးတွေနဲ့ ထိတွေ့မိတဲ့ နေရာတွေကို သေချာဆေးကြောဖို့လည်း ၎င်းက အကြံပေးတိုက်တွန်းထားပါတယ်။ 

Salmonella ကူးစက်တဲ့အခါ အော့အန်ခြင်း၊ ဝမ်းလျှောခြင်း၊ ဗိုက်အောင့်ခြင်း၊ ဖျားနာခြင်း စတဲ့ လက္ခဏာတွေ ဖြစ်နိုင်ပါတယ်။ ရောဂါလက္ခဏာတွေဟာ ဘက်တီးရီးယား ကူးစက်ပြီး ခြောက်နာရီမှ ခြောက်ရက်အတွင်း ပေါ်လာတတ်ပါတယ်။ အကယ်လို့ အသီးအနှံတွေစားပြီး အဖျား ၁၀၂ ဒီဂရီထက်မြင့်တက်လာရင် ၊ သုံးရက်ကြာထိ ဝမ်းလျှောခြင်း၊ သွေးထွက်လွန်ကဲခြင်း၊ အော့အန်ခြင်း သို့မဟုတ် ရေဓာတ်ခမ်းခြောက်ခြင်းတို့ဖြစ်လာခဲ့ရင် ဆေးကုသမှုခံယူဖို့လည်း CDC က အကြံပေးထားပါတယ်။ 

        သက်ကြီးရွယ်အိုများ၊ ကိုယ်ဝန်ဆောင်များ၊ ကလေးများ နဲ့ ကိုယ်ခံအားစနစ် အားနည်းစေတဲ့ ရောဂါအခံတွေ ရှိနေသူတွေဟာ အဆိုပါ ဘက်တီးရီးယား ကူးစက်ခံရနိုင်ချေ ပိုများတယ်လို့ သိရပါတယ်။