မျိုးကြီး (NSS) - နိုဝင်ဘာ ၂၅

မြန်မာ-တရုတ်နယ်စပ်ဒေတည်ငြိမ်ရေးအတွက် တရုတ်နိုင်ငံက ယနေ့(နိုဝင်ဘာလ ၂၅ ရက်)တွင် စစ်ရေးလေ့ကျင့်မည့်အကြောင်း နစကထံ အသိပေးအကြောင်းကြားထားကြောင်း သိရသည်။

နစကပြောခွင့်ရ ဗိုလ်ချုပ်ဇော်မင်းထွန်းက ယနေ့ (နိုဝင်ဘာလ ၂၅ ရက်)တွင် မီဒီယာများကို အထက်ပါကဲ့သို့ အသိပေးပြောဆိုခဲ့ခြင်းဖြစ်သည်။

နှစ်နိုင်ငံနယ်စပ်ဒေသ တည်ငြိမ်အေးချမ်းရေး နှင့် နယ်မြေဒေသလုံခြုံအေးချမ်းရေးအတွက် တရုတ်နိုင်ငံ၊ တောင်ပိုင်းစစ်ဒေသကြီး၏ ပုံမှန်စစ်ရေးလေ့ကျင့်မှုကို မြန်မာ-တရုတ်နယ်စပ်ဒေသတွင် ယနေ့မှစ၍ စတင်လုပ်ဆောင်သွားမည်ဖြစ်ကြောင်း သိရသည်။

“တရုတ်ပြည်သူ့သမ္မတနိုင်ငံ တောင်ပိုင်းစစ်ဒေသကြီးရဲ့ ပုံမှန်စစ်ရေးလေ့ကျင့်မှုကို နိုဝင်ဘာလ (၂၅)ရက်နေ့မှာ စတင်လုပ်ဆောင်သွားမှာဖြစ်ပါတယ်။ လုပ်ဆောင်မယ့်နေရာကတော့ တရုတ်-မြန်မာနိုင်ငံ နယ် စပ်ဒေမှာ ဖြစ်ပါတယ်။ လုပ်ဆောင်ရခြင်းရဲ့ ရည်ရွယ်ချက်ကတော့ နှစ်နိုင်ငံနယ်စပ်ဒေသ တည်ငြိမ်အေးချမ်းရေး၊ နယ်မြေဒေသလုံခြုံအေးချမ်းရေးအတွက် ဆောင်ရွက်ရခြင်းဖြစ်တယ်ဆိုတာကို မြန်မာနိုင်ငံဘက်ကို အကြောင်းကြားလာပါတယ်”ဟု ဗိုလ်ချုပ်ဇော်မင်းထွန်းက ပြောသည်။

ထို့ပြင် တရုတ်နိုင်ငံအနေဖြင့် မြန်မာနိုင်ငံ၏ ပြည်တွင်းရေးကို ဝင်ရောက်မစွက်ဖက်ရေးမူဝါဒအပေါ်၌ ရပ်တည်လျက်ရှိပြီး မြန်မာ့တပ်မတော်နှင့်အတူ နယ်စပ်ဒေသတည်ငြိမ်အေးချမ်းရေး၊ တရားဥပဒေစိုးမိုးရေးကို အမြဲလက်တွဲဆောင်ရွက်သွားမည်ဖြစ်ကြောင်းကိုလည်း ထည့်သွင်းအကြောင်းကြားထားသည်ဟု နစကမှ ဆိုသည်။

“မြန်မာနိုင်ငံအနေနဲ့လည်း တရုတ်နိုင်ငံနဲ့အတူ ငြိမ်းချမ်းစွာတူယှဉ်တွဲနေထိုင်ရေးမူကြီး(၅)ရပ်အပေါ်မှာ လိုက်နာပြီးအလေးထားဆောင်ရွက်လျက်ရှိပါတယ်။ နှစ်နိုင်ငံနယ်စပ်ဒေသတည်ငြိမ်အေးချမ်းရေး၊ လုံခြုံရေးကို ပူးပေါင်းဆောင်ရွက်သွားမှာ ဖြစ်ပါတယ်” ဟု ၎င်းက ထပ်မံပြောသည်။

အလားတူ မကြာခင်အချိန်တွင်လည်း တရုတ်နိုင်ငံ၏ ရေတပ်စစ်သင်္ဘောများသည် မြန်မာနိုင်ငံသို့ ချစ်ကြည်ရေးခရီးလာရောက်လည်ပတ်ရန်ရှိကြောင်း နစကဘက်ကမှ မီဒီယာများကို အသိပေးထားသည်။

ပြီးခဲ့သော အောက်တိုဘာလ ၂၇ ရက်တွင် ကိုးကန့်လက်နက်ကိုင်အဖွဲ့ MNDAA ဦးဆောင်သော မဟာမိတ်(၃)ဖွဲ့သည် (၁၀၂၇ စစ်ဆင်ရေး)အမည်ဖြင့် မြန်မာ-တရုတ်နယ်စပ်၊ ရှမ်းပြည်နယ်အရှေ့မြောက်ပိုင်းဒေသများတွင် တိုက်ပွဲများ ဖော်ဆောင်ခဲ့သည်။

ထို့ကြောင့် မြန်မာ-တရုတ်နယ်စပ်ဒေသများ၌ တပ်မတော်နှင့် လက်နက်ကိုင်မဟာမိတ်(၃)ဖွဲ့တို့အကြား တိုက်ပွဲများ အပြင်းအထန်ဖြစ်ပွားခဲ့ပြီး မြန်မာဘက်ခြမ်းမှ ပစ်ခတ်သော လက်နက်အချို့ တရုတ်နိုင်ငံဘက်ခြမ်းသို့ ကျရောက်ပေါက်ကွဲကာ တရုတ်နိုင်ငံသားအချို့ ထိခိုက်သေဆုံးမှုများ ရှိခဲ့ကြောင်း သိရသည်။