Pika (NSS) - နိုဝင်ဘာ ၂၃

ရုရှားသည် ယူကရိန်းနှင့် ငြိမ်းချမ်းရေးဆွေးနွေးပွဲများ လုပ်ဆောင်ရန်အတွက် မည်သည့်အခါမှ ငြင်းပယ်ခဲ့ခြင်း မရှိခဲ့ ကြောင်း နှင့် ယူကရိန်းကသာ အဆိုပါဆွေးနွေးပွဲများမှ လူသိရှင်ကြား နှုတ်ထွက်သွားခဲ့ခြင်းဖြစ်ကြောင်း ရုရှားသမ္မတပူတင်က ထုတ်ဖော်ပြောခဲ့သည်။

အိန္ဒိယနိုင်ငံက အိမ်ရှင်အဖြစ် လက်ခံကျင်းပခဲ့သည့် အွန်လိုင်းမှ ပြုလုပ်ခဲ့သော G20 ထိပ်သီးအစည်းအဝေးတွင် ပူတင်က ယခုကဲ့သို့ပြောဆိုခဲ့ခြင်းဖြစ်သည်။ ထို့အပြင် ယူကရိန်းအပေါ် ရုရှားက စစ်ဆင်ရေးများ ဆက်လက် လုပ်ဆောင်နေခြင်းကြောင့် ထိတ်လန့်တုန်လှုပ်မိကြောင်း ပြောဆိုခဲ့သူများ၏ မှတ်ချက်များကို ပူတင်က ပြန်လည် တုံ့ပြန်ပြောဆိုခဲ့ကြောင်းလည်း သိရသည်။ 

ပူတင်က "ဒီစစ်ပွဲဟာ လူတစ်ဦးချင်းစီ၊မိသားစုတစ်ခုချင်းစီ နဲ့ နိုင်ငံတစ်ခုလုံးအတွက် ဝမ်းနည်းစရာကိစ္စပါပဲ။ ဒီစစ်ပွဲ ကို ဘယ်လိုအဆုံးသတ်ရမလဲဆိုတာ ကျွန်တော်တို့ စဉ်းစားရပါမယ်" ဟု ပြောခဲ့သည်။

ထို့အပြင် ရုရှားသည် ယူကရိန်းနှင့် ငြိမ်းချမ်းရေးဆွေးနွေးပွဲများကို မည်သည့်အခါမှ ပယ်ချခဲ့ခြင်းမရှိခဲ့ကြောင်း ရုရှား နှင့် ဆွေးနွေးပွဲများ လုပ်ဆောင်ခြင်းကို တားမြစ်သည့် အမိန့်တစ်ရပ်ကို လက်မှတ်ရေးထိုးခဲ့သူမှာ  ယူကရိန်း သမ္မတဇီလန်စကီးသာဖြစ်ကြောင်း ပူတင်က ပြောဆိုခဲ့သည်။

ပြီးခဲ့သည့်နှစ်တွင် ဇီလန်စကီးသည် ပူတင်က ရုရှားသမ္မတဖြစ်နေသရွေ့ ငြိမ်းချမ်းရေးဆွေးနွေးပွဲများ လုပ်ဆောင် ခြင်းကို တားမြစ်သည့်အမိန့်တစ်ရပ်ကို လက်မှတ်ရေးထိုးခဲ့ခြင်းဖြစ်ကြောင်း သိရသည်။ ယူကရိန်း၏ တန်ပြန် ထိုးစစ်ဆင်မှုများအတွင်း သိသာထင်ရှားသော ရလဒ်များ မရရှိခဲ့ခြင်းသည် ယူကရိန်း၏ အနောက်အုပ်စု ကျောထောက်နောက်ခံနိုင်ငံများထံ ကောင်းမွန်သောသတင်းစကား ပေးပို့မှုတစ်ခုမဟုတ်ခဲ့ကြောင်း ဇီလန်စကီးက ဝန်ခံပြောဆိုခဲ့ပြီးနောက် ရုရှားသမ္မတပူတင်က ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။

ယူကရိန်းသည် နိုဝင်ဘာလတစ်လအတွင်းတွင် တပ်ဖွဲ့ဝင်(၁၃၇ဝဝ) ကျော် ဆုံးရှုံးခဲ့ရကြောင်း ရုရှားကာကွယ်ရေး ဝန်ကြီးဌာနက နိုဝင်ဘာလ(၂၁) ရက်တွင် ခန့်မှန်းပြောခဲ့သည်။ ယူကရိန်းသည် တန်ပြန်ထိုးစစ်ဆင်မှုများ  စတင် လုပ်ဆောင်ခဲ့သည့် ဇွန်လမှစတင်ပြီး လက်ရှိအချိန်အထိ တပ်ဖွဲ့ဝင်(၉)သောင်းကျော် ဆုံးရှုံးခဲ့ရကြောင်း ရုရှား ကာကွယ်ရေးဝန်ကြီးဆာဂေးရှိုဂူက ပြီးခဲ့သည့်လတွင် ထုတ်ပြန်ခဲ့သည်။