ရောင်နီ(NSS) - နိုဝင်ဘာ ၂၃ 

တောင်ကိုရီးယားနာမည်ကျော် အမျိုးသမီး K-POP အဖွဲ့ BLACKPINK ဟာ နိုဝင်ဘာ ၂၂ ရက်က ဗြိတိန်နိုင်ငံ၊ လန်ဒန်မြို့၊ Buckingham တော်ဝင်နန်းတော်မှာ ဗြိတိန်ဘုရင်ချားစ်ကိုယ်တိုင်ချီးမြှင့်ပေးအပ်တဲ့ ဂုဏ်ထူးဆောင် MBE ဘွဲ့တံဆိပ်များ လက်ခံရရှိခဲ့ပါတယ်။         

အခုဆိုရင် BLACKPINK ဟာ Order of the British Empire ရဲ့ ဂုဏ်ထူးဆောင်အဖွဲ့ဝင်တွေ ဖြစ်နေပါပြီ။ ဒီအခမ်း အနားမှာ  တော်ဝင်မိသားစုက ၎င်းတို့ရဲ့အထူးခြားဆုံးဧည့်သည်တွေအဖြစ် BLACKPINK အဖွဲ့ဝင်တွေနဲ့ တွေ့ဆုံခဲ့ပြီး လေးဦးစလုံးကို ဂုဏ်ထူးဆောင် MBEs ဘွဲ့ချီးမြှင့်ခဲ့တာပါ။ 

BLACKPINK ရဲ့ MBE တွေဟာ ကုလသမဂ္ဂ ရာသီဥတုပြောင်းလဲမှုဆိုင်ရာညီလာခံ (COP26) အတွက် တရားဝင် အဖွဲ့ဝင်တွေအဖြစ် ၎င်းတို့ရဲ့အခန်းကဏ္ဍကို အသိအမှတ်ပြုပါတယ်။ တောင်ကိုရီးယားသမ္မတ ယွန်းဆက်ယိုလ်နဲ့ သမ္မတကတော် ကင်ကီယွန်ဟီးတို့ဟာလည်း လက်ရှိ ဗြိတိန်နိုင်ငံမှာ အလည်အပတ်ရောက်ရှိနေပါတယ်။ 

ချားစ်ဘုရင်က တောင်ကိုရီးယားသမ္မတအတွက် နိုဝင်ဘာ ၂၁ ရက်က ခမ်းနားထည်ဝါတဲ့ white tie banquet ပွဲ ကျင်းပခဲ့ပြီး အဆိုပါပွဲကိုလည်း Blackpink အဖွဲ့ဝင် လေးဦးစလုံးလည်း တက်ရောက်ခွင့်ရခဲ့ကြပါတယ်။ ဒီ MBE award ကို ရရှိခဲ့တဲ့ နာမည်ကျော်တွေမှာ The Beatles (1965)၊ Ed Sheeran (2017)၊ Adele (2013)၊ Blackpink (2023) တို့ဖြစ်ပါတယ်။ ဒီအထဲမှာမှ BLACKPINK ကတော့ Honorary MBEs award ကိုရရှိတဲ့ First and Only အာရှအနုပညာရှင်၊ First and Only Female Group ဖြစ်ပါတယ်။ 

အဆိုပါပွဲမှာ ချားစ်ဘုရင်က ကမ္ဘာ့ပရိသတ်တွေဆီ သဘာဝပတ်ဝန်းကျင် ရေရှည်တည်တံ့ခိုင်မြဲရေး သတင်းစကား ဆောင်ကြဉ်းပေးခဲ့တဲ့ Blackpink အဖွဲ့ဝင် ဂျင်းနီ၊ ဂျီဆိုး၊ လီဆာနဲ့ ရိုစ့် တို့ကို ချီးကျူးကြောင်း ဆိုခဲ့ပါတယ်။