ကျော် (NSS) - နိုဝင်ဘာ ၂၂

ရှမ်းပြည်နယ်(မြောက်ပိုင်း)တွင်ဖြစ်ပွားလျက်ရှိသည့် တိုက်ပွဲများကြောင့် လားရှိုးမြို့တွင် စစ်ဘေးရှောင်စခန်းများဖွင့်လှစ်ထားရပြီး လူဦးရေ ၆၇၀၀ ကျော်ခိုလှုံနေကြကြောင်း လားရှိုးမြို့အခြေစိုက်လူမှုကူညီရေးအသင်းများမှ သိရသည်။

ပြီးခဲ့သည့် အောက်တိုဘာလ ၂၇ ရက်မှစတင်၍ ရှမ်းပြည်နယ်(မြောက်ပိုင်း)ရှိ တပ်မတော်စခန်းများ၊ရဲတပ်ဖွဲ့စခန်းများ၊ မြို့နှင့်ကျေးရွာများအတွင်းသို့ MNDAA ၊ TNLA နှင့် AA တို့ပူးပေါင်း၍ ဝင်ရောက်ပစ်ခတ်တိုက်ခိုက်မှုများပြုလုပ်ခဲ့ကြသည်။

ထိုသို့ ဝင်ရောက်ပစ်ခတ်တိုက်ခိုက်မှုကြောင့် ဒေသခံများသည် စစ်ဘေးနှင့်လွတ်ကင်းစေရေးအတွက် လားရှိုးမြို့၊ သီပေါမြို့နှင့် အခြားစစ်ဘေးလွတ်ကင်းသော မြို့နယ်များသို့တိမ်းရှောင်ခဲ့ကြရကြောင်း သိရသည်။

"နေရာစုံကနေ စစ်ဘေးရှောင်အနေနဲ့ရောက်လာကြတာ> လက်ရှိ လားရှိုးမြို့ပေါ်မှာဆိုရင် စစ်ဘေးရှောင်စခန်း ၁၇ ခုလောက်ဖွင့်ထားရတယ်။ လူဦးရေက ၆၇၀၀ ကျော်ရှိတယ်"ဟု လားရှိုးမြို့အခြေစိုက်လူမှုကူညီရေးအသင်းဝင်တစ်ဦးက NSS ကိုပြောသည်။

လက်ရှိအချိန်၌ စစ်ဘေးရှောင်များအား လားရှိုးမြို့ရှိ တောရကျောင်း ပရိယတ္တိစာသင်ကျောင်းတိုက်၊ ကချင်နှစ်ခြင်းခရစ်ယာန်အသင်းတော်၊ လားဟူနှစ်ခြင်းခရစ်ယာန်အသင်းတော်၊ လားဟူကျမ်းစာကျောင်း၊ ကက်သလစ်(RC)ကျောင်း၊ တောရကျောင်း(နမ္မတူလမ်းခွဲ)၊ ရှမ်းနှစ်ခြင်းခရစ်ယာန်အသင်း၊ အထက်မန်အိုင်စခန်း၊ ကန်မိန်းကျောင်း၊ ပန်အုပ်ကျောင်းတိုက်၊ ဟိုနမ့်ကျောင်းတိုက်၊ ရွှေဓားကျောင်းတိုက်၊ သာသနာ(၂၅၀၀) ကျောင်းတိုက်၊ ဘဏ္ဍာကျောင်းတိုက်နှင့်သီရိမင်္ဂ လာမန်ဆူရှမ်းကျောင်းတိုက်တို့တွင် နေရာချထားပေးလျက်ရှိကြောင်း သိရသည်။

"စစ်ဘေးရှောင်တွေအတွက် လိုအပ်ချက်တွေကတော့အများကြီးရှိတာပေါ့။ အသက်အန္တရာယ်မရှိအောင် အမြန်ပြေးလာကြရတာဖြစ်တဲ့အတွက် တစ်ချို့စစ်ဘေးရှောင်တွေဆိုရင် အဝတ်တထည်ကိုယ်တစ်ခုနဲ့ပြေးလာကြရတာ"ဟု လားရှိုးမြို့အခြေစိုက်လူမှုကူညီရေးအသင်းဝင်တစ်ဦးက NSS ကိုပြောသည်။

လားရှိုးမြို့တွင် ရောက်ရှိနေသည့် စစ်ဘေးရှောင်များအား လားရှိုးမြို့အခြေစိုက်လူမှုကူညီရေးအသင်းဝင်များ၊ တာဝန်ရှိသူများနှင့်အလှူရှင်များက စားသောက်နေထိုင်မှုအဆင်ပြေစေရန် စီမံဆောင်ရွက်ပေးလျက်ရှိကြောင်း သိရသည်။

"လတ်တလောအရေးပေါ်လိုအပ်ချက်က ဆောင်းတွင်းရောက်လာပြီဆိုတော့ အမိုး/အကာ/အခင်းနဲ့အနွေးထည်။ ကျန်တာတွေအတွက်က လိုအပ်ချက်ရှိပေမယ့် ခုနကဟာတွေလောက်တော့ မလိုသေးဘူး။ ကလေးတွေနဲ့သက်ကြီးပိုင်းတွေလည်းပါတော့ ဆေးဝါးလည်းလိုအပ်တယ်"ဟု လားရှိုးမြို့အခြေစိုက်လူမှုကူညီရေးအသင်းဝင်တစ်ဦးက NSS ကိုပြောသည်။

လားရှိုးမြို့တွင်ရောက်ရှိနေသည့် စစ်ဘေးရှောင်များအတွက် အလှူရှင်များမှလည်း ချက်ပြုတ်ရာတွင်အသုံးပြုနိုင်ရေးအတွက် ထင်းများ၊ အနွေးထည်များ၊ စောင်၊ မိုးကာ၊ ဖိနပ်များ၊ အဝတ်အထည်များ၊ ကြက်ဥများ၊ အောက်ခံအခင်းများ၊ စားနပ်ရိက္ခာများနှင့်ငွေကြေးများကို လှူဒါန်းပေးလျက်ရှိကြောင်း သိရသည်။

ထို့ပြင် ယမန်နေ့ (နိုဝင်ဘာလ ၂၁ ရက်)၊ နံနက်ပိုင်းကလည်း စစ်ဘေးရှောင်များအတွက် နိုင်ငံတော်မှထောက်ပံ့သည့် ဆန်ရိက္ခာ တစ်လစာအတွက် ငွေကျပ် (၁၂၇)သိန်း၊ ရှမ်းပြည်နယ်အစိုးရအဖွဲ့မှထောက်ပံ့သည့် ငွေကျပ်(၁၉၅)သိန်းတို့အား ရှမ်းပြည်နယ်ဝန်ကြီးချုပ်မှ သီရိမင်္ဂလာမန်ဆူရှမ်းကျောင်းတိုက်တွင် ထောက်ပံ့ပေးခဲ့ကြောင်း သိရသည်။