မြူနစ် (NSS) - နိုဝင်ဘာ ၂၂ 

ရခိုင်ပြည်နယ်၊ ပေါက်တောမြို့နှင့်တစ်ဝိုက်တွင် တိုက်ပွဲများ ဆက်လက်ဖြစ်ပွားနေပြီး နိုင်ငံပိုင်ရေယာဉ် (၂)စင်းနှင့်အတူ ဝန်ထမ်းအချို့ကို AA က ဖမ်းဆီးထိန်းသိမ်းထားကြောင်း သတင်းရရှိသည်။

ယနေ့(နိုဝင်ဘာလ ၂၂ ရက်)၊ နေ့လည်ပိုင်းတွင် ပေါက်တောမြို့နှင့်တစ်ဝိုက်၌ တပ်မတော်နှင့် ရခိုင်လက်နက်ကိုင်အဖွဲ့ AA တို့ကြားတွင် တိုက်ပွဲများဆက်လက်ဖြစ်ပွားနေကြောင်း ပြည်နယ်လုံခြုံရေးအဖွဲ့နှင့်နီးစပ်သူက NSS ကို ပြောသည်။

“ပေါက်တောမှာပဲ အခုနေ့လည်ပိုင်းမှာ ပြန်ပြီးတော့ ထိတွေ့မှုဖြစ်တယ်။ ကျန်တဲ့နေရာတွေကတော့ ငြိမ်နေပါတယ်”ဟု ရခိုင်ပြည်နယ်လုံခြုံရေးအဖွဲ့နှင့်နီးစပ်သူက ပြောသည်။

ယမန်နေ့(နိုဝင်ဘာလ ၂၁ ရက်)တွင်လည်း ရခိုင်ပြည်နယ်၊ ပေါက်တောမြို့နှင့်တစ်ဝိုက်၌ ထိတွေ့တိုက်ပွဲများ ဖြစ်ပွားခဲ့ကြောင်း နစကပြောခွင့်ရဗိုလ်ချုပ်ဇော်မင်းထွန်းက ယမန်နေ့တွင် မီဒီယာများကို အသိပေးပြောကြားခဲ့သည်။

“အနောက်ပိုင်းတိုင်းစစ်ဌာနချုပ်နယ်မြေမှာတော့ ပေါက်တောမြို့မှာ တပ်မတော်နဲ့ မြန်မာနိုင်ငံရဲတပ်ဖွဲ့က ပြန်လည်ထိန်းချုပ်ခဲ့တာရှိပါတယ်။ ဒီနေ့ တပ်မတော်နဲ့ မြန်မာနိုင်ငံရဲတပ်ဖွဲ့အနေနဲ့ ပေါက်တောမြို့လုံခြုံရေးအတွက် ကင်းလှည့်လည်ခဲ့ပါတယ်။ ကင်းလှည့်လည်တာကို ပစ်ခတ်ခဲ့တာ ရှိပါတယ်” ဟု ဗိုလ်ချုပ်ဇော်မင်းထွန်းက ပြောသည်။

ရခိုင်လက်နက်ကိုင်အဖွဲ့ ULA/AA သည် နိုဝင်ဘာလ ၁၃ ရက်တွင် ရခိုင်ပြည်နယ်၌ တစ်ကျော့ပြန်စစ်ပွဲများကို ပြန်လည်ဖော်ခဲ့ပြီးနောက် ပေါက်တောမြို့ကို တိုက်ခိုက်ထိန်းချုပ်နိုင်ခဲ့ဖူးသည်။

သို့သော် ULA/AA အနေဖြင့် ပေါက်တောမြို့ကို ရက်ပိုင်းမျှသာ ထိန်းချုပ်နိုင်ခဲ့ပြီး လက်ရှိအချိန်ထိ တပ်မတော်လုံခြုံရေးအဖွဲ့များက ပြန်လည်ထိန်းချုပ်ထားကြောင်း သိရသည်။

ထို့ပြင် ရခိုင်လက်နက်ကိုင်အဖွဲ့ AA သည် ရခိုင်ပြည်နယ်၊ ကျောက်တော်မြို့ရှိ အများပြည်သူ အသုံးပြုနေသော ရေနယား (၁)ရေယာဉ်နှင့် ရေဘဝဲ (၄) ရေယာဉ်များကို ယူဆောင်သွားခဲ့သည်ဟုလည်း နစကဘက်က ပြောဆိုခဲ့သည်။

“ရေယာဉ်တွေနဲ့ပတ်သက်ပြီးတော့ ဘာသတင်းမှ မရဘူး။ ဘယ်ကို ဆွဲသွားလဲ မသိဘူး။ အဲဒီရေယာဉ်တွေက ပြည်တွင်းရေကြောင်းပို့ဆောင်ဌာနက ပိုင်တာပါ။ နိုင်ငံပိုင်ရေယာဉ်တွေပါ။ အဲဒီရေယာဉ်တွေက ဝန်ထမ်းတွေလည်း ပါသွားတယ် ပြောတယ်။ ဘယ်နှစ်ဦးလဲတော့ မသိဘူး” ဟု ရခိုင်ပြည်နယ်လုံခြုံရေးအဖွဲ့နှင့်နီးစပ်သူက ပြောသည်။

ရခိုင်ပြည်နယ်၌ တစ်ကျော့ပြန် ပြန်လည်ဖြစ်ပွားခဲ့သော စစ်ပွဲများကြောင့် ရေကြောင်း၊ ကုန်းကြောင်းလမ်းပိုင်းများကို အကန့်အသတ်မရှိ ပိတ်ဆို့ထားကြောင်း သိရသည်။