ဂျန်ဇက် (NSS) - နိုဝင်ဘာ ၂ဝ

မြန်မာနိုင်ငံတွင် တိုက်ပွဲများဖြစ်ပွားနေသည့်အရှိန်မြင့်တက်လာခြင်းကြောင့် ဆေးရုံ၊ ဆေးပေးခန်း၊ လူနာများ နှင့် ကျန်းမာရေးဝန်ထမ်းများကို ကာကွယ်ပေးရမည်ဖြစ်ကြောင်း နိုင်ငံတကာအဖွဲ့အစည်းတစ်ခုဖြစ်သော နယ်စည်း မခြားဆရာဝန်များအဖွဲ့ဖြစ်သော Médecins Sans Frontières (MSF) (MSF) အဖွဲ့က တိုက်တွန်းတောင်းဆိုလိုက်သည်။ 

မြန်မာနိုင်ငံတွင်ပြီးခဲ့သော အောက်တိုဘာ ၂၇ ရက်က တိုက်ပွဲများဖြစ်ပွားလာခဲ့ပြီးနောက် ရှမ်းပြည်နယ်၊ ကချင် ပြည်နယ် ရခိုင်ပြည်နယ်တို့တွင်ကျန်းမာရေးဝန်ထမ်းများ တိုက်ခိုက်ဖမ်းဆီးခံရခြင်းများရှိလာခဲ့ပြီးနောက်  (MSF) အဖွဲ့က ယင်းကဲ့သို့ တိုက်တွန်းတောင်းဆိုလိုက်ခြင်းဖြစ်သည်။

ပြီးခဲ့သောလပိုင်းအတွင်း ရှမ်းပြည်နယ် ပန်ဆန်းရှိဆေးရုံတစ်ခု ဒရုန်းဖြင့် တိုက်ခိုက်ခံရပြီး ကချင်ပြည်နယ် ဖားကန့် ဆေးရုံ၊ တိုက်ခိုက်ခံရခြင်းများအပြင် ရခိုင်ပြည်နယ်တွင်လည်း လူနာများထံသွားရောက်ရန် လမ်းများပိတ်ဆို့ တားဆီးခံရခြင်းများဖြစ်ပွားခဲ့ကြောင်း (MSF) အဖွဲ့က သတင်းထုတ်ပြန်ထားသည်။

အဆိုပါအဖွဲ့သည် မြန်မာနိုင်ငံတွင် HIV  နှင့်  TB ရောဂါရှိနေသူများကို အဓိကထား ပံ့ပိုးကူညီကုသပေးနေသည့် အဖွဲ့အစည်းဖြစ်ကြောင်း သိရသည်။ တိုက်ပွဲများဖြစ်ပွားလာကာ ကျန်းမာရေးဆိုင်ရာ အဆောက်အဦးများ တိုက်ခိုက်ခံရခြင်း၊ ဝန်ထမ်းများဖမ်းဆီးခံရခြင်း၊ စသည့်ဖြစ်ရပ်များသည် လိုအပ်ချက်ရှိနေသည့် လူနာများ ဆေးဝါး ကုသရန်လွှဲချော်မှုများဖြစ်စေခဲ့ကြောင်း ထုတ်ပြန်ချက်တွင် ဖော်ပြထားသည်။

ထိုကဲ့သို့အခြေအနေများကြောင့် HIV  နှင့်  TB ရောဂါရှိနေသူများအတွက် ကျန်းမာရေးနှင့်ပတ်သက်ပြီး အန္တရာယ်ရှိစေသလို ဆေးယာဉ်ပါးမှုဒဏ်ကို ခံနိုင်ရမည်မရှိခြင်း၊ ရောဂါကူးစက်ခြင်းများ ပိုမိုဖြစ်လာနိုင်သည့် အခြေအနေများရှိလာနိုင်ကြောင်း (MSF) အဖွဲ့က ပြောသည်။

(MSF) အဖွဲ့က "ဆေးရုံနဲ့ ကျန်းမာရေးဆိုင်ရာအခြေခံအဆောက်အဦးများကို ကာကွယ်ပေးရမယ်ဆိုတဲ့အချက်ကို လစ်လျူရှုထားတာကို လက်မခံနိုင်ဖွယ်တွေ့မြင်နေရတယ်။ မြန်မာနိုင်ငံမှာ တိုက်ပွဲတွေပြန်လည်ဖြစ်ပွားလာခြင်း ကြောင့် နိုင်ငံတဝှမ်းမှာ ဆေးဝါးနဲ့ လူသားချင်းဆိုင်ရာစာနာမှုအကူအညီ လိုအပ်သူမြင့်တက်လာနေတယ်။ 

လက်နက်ကိုင်ပဋိပက္ခဖြစ်ပွားနေတဲ့ အရပ်ဒေသတွေမှာ ကျန်းမာရေးဝန်ထမ်းတွေ၊ လူနာတွေဘေးကင်းလုံခြုံမှုရှိအောင် လုပ်ဆောင်ပေးဖို့ သက်ဆိုင်ရာအဖွဲ့အစည်းအားလုံးကို တိုက်တွန်းတောင်းဆိုပါတယ်။ လူသားချင်းဆိုင်ရာ စာနာမှုအကူအညီလိုအပ်နေတဲ့သူတွေထံအတားအဆီးမရှိဘဲ ဘေးကင်းစွာနဲ့သွားလာခွင့် ရစေလိုတယ်။ မြန်မာ နိုင်ငံမှာ ဖြစ်ပွားနေတဲ့လက်နက်ကိုင်ပဋိပက္ခတွေအတွင်း ကျန်းမာရေးဝန်ထမ်းများ ဖမ်းဆီးခံရတာမျိုးတွေ ရှိနေ တယ်" ဟု ပြောသည်။