Pika (NSS) - နိုဝင်ဘာ ၁၉ 

အိန္ဒိယကယ်ဆယ်ရေးသမားများသည် ပြိုကျခဲ့သော ဥမင်လှိုဏ်ခေါင်းအတွင်း ပိတ်မိနေသည့် လူ(၄၁)ဦးကို ကယ်ဆယ်ရန်အတွက် ဒေါင်လိုက်တွင်းပေါက်တစ်ခုကို တူးရန် စဉ်းစားနေကြောင်း အာဏာပိုင်များက ပြောကြားခဲ့ သည်။

ကယ်ဆယ်ရေးသမားများသည် ဥမင်လှိုဏ်ခေါင်းအတွင်း နောက်ထပ်ပြိုကျမှုများရှိမည်ကို စိုးရိမ်သောကြောင့် တူးဖော်ခြင်းများကို ခေတ္တရပ်ဆိုင်းပြီးနောက် ယခုကဲ့သို့ လုပ်ဆောင်ရန် စဉ်းစားခဲ့ခြင်းဖြစ်ကြောင်း သိရသည်။ 

အိန္ဒိယနိုင်ငံမြောက်ပိုင်းတွင် လမ်းတစ်ခု၏အောက်မှာ ဖြတ်သန်း တည်ဆောက်နေသော ဥမင်လှိုဏ်ခေါင်းသည် နိုဝင်ဘာလ(၁၂)ရက်က ပြိုကျခဲ့ရာ ဆောက်လုပ်ရေးအလုပ်သမား(၄၁)ဦး ပိတ်မိနေခဲ့ခြင်းဖြစ်ကြောင်း သိရသည်။ ကယ်ဆယ်ရေးသမားများသည် ပြီးခဲ့သည့် နိုဝင်ဘာလ(၁၂)ရက်ကတည်းက ဥမင်လှိုဏ်ခေါင်းအတွင်းမှ မြေကြီး၊ ကွန်ကရစ်များ နှင့် အပျက်အစီးများကို ဘက်ဟိုးများဖြင့် စတင်ဖယ်ရှားခဲ့ခြင်းဖြစ်ကြောင်း သိရသည်။

အကြီးစားတူးဖော်ရေးစက်များဖြင့် တူးဖော်မှုများကို လုပ်ဆောင်ခဲ့သော်လည်း အပျက်အစီးများမှာ ဆက်လက် ပြိုကျလာသဖြင့် ကယ်ဆယ်ရေးလုပ်ငန်းများ နှောင့်နှေးခဲ့ခြင်းဖြစ်ကြောင်း သိရသည်။ တူးဖော်မှုများ လုပ်ဆောင် ချိန်အတွင်း အက်ကွဲသံတစ်ခုကို ကြားခဲ့ရပြီးနောက် နိုဝင်ဘာလ(၁၇)ရက်တွင် တူးဖော်ခြင်းများကို ရပ်ဆိုင်းခဲ့ရခြင်း ဖြစ်ကြောင်း တာဝန်ရှိသူများက ပြောကြားခဲ့သည်။ 

အစိုးရ၏ အဝေးပြေးလမ်းများ နှင့် အခြေခံအဆောက်အအုံဆိုင်ရာ ကုမ္ပဏီ NHIDCL က "နောက်ထပ်ပြိုကျမှုတွေ ရှိလာမှာကို စိုးရိမ်တာကြောင့် တူးဖော်ရေးလုပ်ငန်းတွေကို ခနရပ်ဆိုင်းထားရပါတယ်။ ပိတ်မိနေသူတွေရဲ့ဆွေမျိုးတွေလည်း ငိုနေကြပါတယ်။ ကျွန်တော်တို့ဟာ ပိတ်မိနေသူတွေကို ကယ်ဆယ်ဖို့ လုပ်ဆောင်နေတယ်ဆိုတာ လိမ်ညာနေတာလားလို့တောင် မေးခံနေရပါပြီ" ဟု ပြောခဲ့သည်။