Pika (NSS) - နိုဝင်ဘာ ၁၉ 

ပြင်သစ်အသင်းသည် နိုဝင်ဘာလ(၁၈)ရက်က ဂျီဘရောတာအသင်းနှင့်ကစားခဲ့သောပွဲကို (၁၄)ဂိုး-ဂိုးမရှိဖြင့် အနိုင်ရရှိခဲ့ပြီး ယူရိုခြေစစ်ပွဲသမိုင်းတစ်လျှောက် အကြီးဆုံး ဂိုးပြတ်နိုင်ပွဲအဖြစ် မှတ်တမ်းတင်နိုင်ခဲ့ကြောင်း သိရသည်။

၂ဝဝ၆ ခုနှစ်တွင် ဂျာမနီအသင်းသည် ဆမ်မာရီနိုအသင်းနှင့်ကစားခဲ့သော ၂ဝဝ၈ ယူရိုခြေစစ်ပွဲတွင် (၁၃)ဂိုး-ဂိုးမရှိ ဖြင့် ဂိုးပြတ်အနိုင်ရရှိခဲ့သည့် စံချိန်ကို ပြင်သစ်အသင်းက ကျော်တက်ခဲ့ခြင်းဖြစ်ကြောင်း သိရသည်။ ထို့အပြင် ဥရောပအသင်းတစ်သင်းသည် ကမ္ဘာ့ဖလား (သို့မဟုတ်) ယူရိုခြေစစ်ပွဲတွင် (၁၄)ဂိုးထိ သွင်းယူနိုင်ခဲ့သည့် ပထမဆုံး အကြိမ်ဖြစ်ကြောင်းလည်း သိရသည်။

ပြင်သစ်အသင်းနည်းပြ Didier Deschamps က "ဂျီဘရောတာအသင်းဟာ အနီကဒ်ပြခံရပြီး တစ်ယောက် ထုတ်ခံ ခဲ့ရပါတယ်။ ပြိုင်ဖက်အသင်းကို ဂိုးတွေအများကြီးသွင်းယူတာကလည်း လေးစားတာပါပဲ။ (၁၄)ဂိုးသွင်းယူနိုင်ခဲ့တာ တကယ်ကို ကောင်းမွန်ပါတယ်" ဟု ပြောခဲ့သည်။

ဂျီဘရောတာအသင်းနှင့်ကစားခဲ့သောပွဲတွင် ပြင်သစ်တိုက်စစ်မှူးအမ်ဘာပေသည် ဟက်ထရစ်သွင်းယူနိုင်ခဲ့ပြီး အသက်(၁၇)နှစ်အရွယ် ကွင်းလယ်ကစားသမား Warren Zaire-Emery သည် ၎င်း၏ ပွဲဦးထွက်ပွဲစဉ်တွင် ဂိုးသွင်းယူ နိုင်ခဲ့ကြောင်းလည်း သိရသည်။ Gibraltar အသင်းနှင့်ကစားခဲ့သောပွဲတွင် ပြင်သစ်အသင်းကစားသမားများ ဖြစ်သည့် Marcus Thuram၊ Zaire-Emery၊ အမ်ဘာပေ၊ Jonathan Clauss၊ Kingsley Coman၊ ဖိုဖါနာ၊ Adrien Rabiot ၊ ဒမ်ဘီလီ၊ Olivier Giroud တို့က ဂိုးသွင်းယူပေးနိုင်ခဲ့ပြီး Gibraltar အသင်း ကစားသမားအီသန်ဆန်းတို့စ် က ကိုယ့်ဂိုးကိုယ် ပြန်သွင်းမိခဲ့ကြောင်းဖြစ်ကြောင်းလည်း သိရသည်။

ပြင်သစ်အသင်းနည်းပြ Didier Deschamps သည် အသက်(၁၇)နှစ်အရွယ် Warren Zaire-Emery ကို ပွဲဦးထွက် ပေးကစားခဲ့ပြီး ၎င်းသည် ၁၉၁၄ ခုနှစ်နောက်ပိုင်း အသက်အငယ်ဆုံး ပြင်သစ်အသင်းကစားသမားဖြစ်လာခဲ့ ကြောင်းလည်း သိရသည်။ 

Didier Deschamps က "ဒီနေ့ညမှာ သွင်းယူနိုင်ခဲ့တဲ့ ဂိုးတွေနဲ့ပတ်သက်ပြီး ကျွန်တော်တို့ တကယ်ကို ပျော်ရွှင်မိပါ တယ်။ ဒီနေ့ညဟာ ပြီးပြည့်စုံတဲ့ ညတစ်ညပါပဲ" ဟု ပြောခဲ့သည်။