Pika (NSS) - နိုဝင်ဘာ ၁၉ 

မြောက်ကိုရီးယားသည် ၎င်း၏ စစ်ဘက်သုံးစပိုင်ဂြိုလ်တုကို သီတင်းပတ်(၁)ပတ်အတွင်း (သို့မဟုတ်) အဆိုပါ အချိန်ထက်စောကာ လွှတ်တင်နိုင်ဖွယ်ရှိနေကြောင်း တောင်ကိုရီးယားကာကွယ်ရေးဝန်ကြီး Shin Won-sik က ထုတ်ဖော်ပြောခဲ့သည်။

တောင်ကိုရီးယားသည် လာမည့် နိုဝင်ဘာလ(၃ဝ)ရက်တွင် ၎င်း၏ထောက်လှမ်းရေးဂြိုလ်တုကို Falcon 9 ဒုံးပျံ ယာဉ်နှင့်အတူ ကယ်လီဖိုးနီးယားပြည်နယ်ရှိ Vandenberg Space Force အခြေစိုက်စခန်းမှ လွှတ်တင်ခြင်းမပြုမီ မြောက်ကိုရီးယားက ၎င်း၏ စစ်ဘက်သုံးစပိုင်ဂြိုလ်တုကို လွှတ်တင်နိုင်ဖွယ်ရှိနေကြောင်း Shin Won-sik က ပြောခဲ့သည်။

၎င်းက "တောင်ကိုရီးယားနဲ့ အမေရိကန်တို့ဟာ မြောက်ကိုရီးယားရဲ့လှုပ်ရှားမှုတွေကို စောင့်ကြည့်နေပါတယ်။ မြောက်ကိုရီးယားဟာ သူတို့ရဲ့စစ်ဘက်သုံးစပိုင်ဂြိုလ်တုကို လွှတ်တင်ဖို့ ပြင်ဆင်နေပြီး အဲဒါက သီတင်းပတ် (၁)ပတ်အတွင်း ဒါမှမဟုတ် အဲဒါထက်စောပြီး ဖြစ်လာနိုင်ဖွယ်ရှိနေပါတယ်" ဟု ပြောခဲ့သည်။

ထို့အပြင် မြောက်ကိုရီးယားသည် ရုရှား၏ အကူအညီဖြင့် အင်ဂျင်ပြဿနာများကို ဖြေရှင်းလုနီးပါးဖြစ်နေပြီဟု ယုံကြည်ကြောင်း Shin Won-sik က ပြောခဲ့သည်။ မြောက်ကိုရီးယားသည်  ၎င်း၏ စစ်ဘက်သုံးစပိုင်ဂြိုလ်တုကို ပတ်လမ်းကြောင်းထဲသို့ လွှတ်တင်ရန် ပြီးခဲ့သည့်မေလ နှင့် ဩဂုတ်လတို့တွင် နှစ်ကြိမ် ကြိုးပမ်းခဲ့ဖူးကြောင်း သိရသည်။

ကုလသမဂ္ဂလုံခြုံရေးကောင်စီ၏ ပိတ်ဆို့အရေးယူမှု ဆုံးဖြတ်ချက်များအရ မြောက်ကိုရီးယားနိုင်ငံကို ပဲ့ထိန်း ဒုံးကျည်နည်းပညာ အသုံးပြုခြင်းမှ တားမြစ်ထားကြောင်းလည်း သိရသည်။ Shin Won-sik က "စစ်ဘက်သုံး စပိုင်ဂြိုလ်တုတွေဟာ မြောက်ကိုရီးယားရဲ့ထောက်လှမ်းရေးစွမ်းရည်ကို သိသိသာသာမြှင့်တင်ပေးနိုင်တဲ့အတွက် အမေရိကန်နိုင်ငံကလည်း အနီးကပ်စောင့်ကြည့်နေပါတယ်" ဟု ပြောခဲ့သည်။