Pika (NSS) - နိုဝင်ဘာ ၁၉ 

အစ္စရေးတွင် နျူကလီးယားလက်နက်များ ပိုင်ဆိုင်ခြင်း ရှိ/မရှိ ဆိုသည့်အချက်ကို ဆုံးဖြတ်ရန်အတွက် စုံစမ်းစစ်ဆေးမှုများ လုပ်ဆောင်ရန် နိုင်ငံတကာစစ်ဆေးရေးမှူးများကို တောင်းဆိုသွားမည်ဖြစ်ကြောင်း တူရကီသမ္မတ အာဒိုဂန်က ထုတ်ဖော်ပြောခဲ့သည်။

ထို့အပြင် အစ္စရေးသည် ၁၉၆၈ နျူကလီးယားလက်နက်မပြန့်ပွားရေး သဘောတူစာချုပ်တွင် ပါဝင်ခြင်း မရှိသည့် နိုင်ငံအနည်းငယ်ထဲမှ တစ်နိုင်ငံဖြစ်ကြောင်း အာဒိုဂန်က မှတ်ချက်ပြုပြောခဲ့သည်။ အစ္စရေးတွင် နျူကလီးယား လက်နက်များ ပိုင်ဆိုင်ခြင်း ရှိ/မရှိ စုံစမ်းစစ်ဆေးရန်အတွက် နိုင်ငံတကာအဏုမြူစွမ်းအင်အေဂျင်စီ IAEA ကို တောင်းဆိုသွားမည်ဖြစ်ကြောင်း အာဒိုဂန်က ပြောခဲ့သည်။

အာဒိုဂန်က "ဒေသအတွင်းမှာ မဟာဗျူဟာမြောက် အကျိုးစီးပွားကို ဟန်ချက်ညီအောင် ဆက်လက်ထိန်းသိမ်းဖို့ အတွက် ဒီကိစ္စကို ရှေ့ဆက်လုပ်ဆောင်သွားဖို့က အလွန်အရေးကြီးပါတယ်။ အစ္စရေးကို ကျွန်တော်တို့ ဆက်လက် ဖိအားပေးသွားမှာပါ။ အစ္စရေးရဲ့နျူကလီးယားလက်နက်တွေကို စစ်ဆေးမှုတွေ လုပ်ဆောင်သွားမှာပါ။ ဒီလုပ်ဆောင်မှုတွေကနေတစ်ဆင့် ဆက်လက်လိုက်နာသွားမှာပါ။ ဒီကိစ္စကို လျစ်လျူမရှုကြဖို့ နိုင်ငံတကာအသိုင်း အဝိုင်းကိုလည်း တောင်းဆိုထားပါတယ်" ဟု ပြောခဲ့သည်။

အစ္စရေးအစိုးရသည် လျှို့ဝှက်နျူကလီးယားအစီအစဉ်များကို ထိန်းသိမ်းထားကြောင်း ကျွမ်းကျင်သူများက ယုံကြည်နေသော်လည်း အစ္စရေးနိုင်ငံသည် နျူကလီးယားလက်နက် ပိုင်ဆိုင်ခြင်း ရှိ/မရှိ ဆိုသည့်အချက်ကို အတည်ပြုခြင်း (သို့မဟုတ်) ငြင်းဆိုခြင်းများမရှိကြောင်းလည်း သိရသည်။

ပြီးခဲ့သည့်ရက်ပိုင်းက အစ္စရေး၏ ရှေးဟောင်းယဥ်ကျေးမှုအမွေအနှစ်ဝန်ကြီး Amihai Eliyahu သည် ဂါဇာ ကမ်းမြောင်ဒေသကို နျူကလီးယားဗုံးကြဲချတိုက်ခိုက်ရန် အကြံပြုခဲ့ပြီး အဆိုပါအကြံကို ကမ္ဘာတစ်ဝန်းရှိ မွတ်စလင်များက စိတ်ဆိုးဒေါသဖြစ်ခဲ့ကြောင်းလည်း သိရသည်။

အဆိုပါအကြံပြုချက်ထွက်ပေါ်လာပြီးနောက် အစ္စရေးဝန်ကြီးချုပ်နေတန်ရာဟုသည် Amihai Eliyahu ကို ရာထူးမှ ဆိုင်းငံ့ခဲ့ကြောင်းလည်း သိရသည်။ အာဒိုဂန်သည် ဂါဇာကမ်းမြောင်ဒေသအပေါ် စစ်ဆင်ရေးများ လုပ်ဆောင်နေ သော အစ္စရေးနိုင်ငံကို အကြမ်းဖက်နိုင်ငံအဖြစ် ပြောဆိုခဲ့ပြီး အစ္စရေးစစ်တပ်သည် စစ်ရာဇဝတ်မှုများကို ကျူးလွန် နေခြင်းဖြစ်ကြောင်းလည်း ဝေဖန်ပြောခဲ့သည်။

တူရကီသမ္မတအာဒိုဂန်သည် အကြမ်းဖက်လက်နက်ကိုင်အဖွဲ့ကို ဟားမက်ကို ထောက်ခံသူဖြစ်ကြောင်း အစ္စရေး ဝန်ကြီးချုပ်နေတန်ရာဟုက ပြန်လည်တုံ့ပြန်ပြောခဲ့သည်။ ဟားမက်လက်နက်ကိုင်အဖွဲ့သည် အောက်တိုဘာ လ(၇)ရက်တွင် အစ္စရေးကို ဒုံးကျည်များဖြင့် စတင်ပစ်ခတ်တိုက်ခိုက်ခဲ့ပြီး အစ္စရေးဘက်မှ လူ(၁၄ဝဝ)ကျော် သေဆုံးခဲ့ကြောင်း သိရသည်။ ထို့နောက် အစ္စရေးဘက်မှ လက်တုံ့ပြန်တိုက်ခိုက်မှုများ လုပ်ဆောင်ခဲ့ရာ ဂါဇာ ကမ်းမြောင်ဒေသရှိ ပါလက်စတိုင်းနိုင်ငံသား အနည်းဆုံး(၁၂ဝဝဝ)ကျော် သေဆုံးခဲ့ကြောင်း တာဝန်ရှိသူများက ပြောကြားခဲ့သည်။