မြူနစ် (NSS) - နိုဝင်ဘာ ၁၉

စစ်ဘေးရှောင် (၃ဝဝဝဝ)ကျော်ရှိသော မြန်မာ-တရုတ်နယ်စပ် BP 125 စစ်ရှောင်စခန်းတွင် ရေကြီးရေလျှံမှုများဖြစ်ပေါ်နေသည့်အတွက် အခက်အခဲများစွာကြုံတွေ့နေရကြောင်း သတင်းရရှိသည်။

ကိုးကန့်လက်နက်ကိုင်အဖွဲ့ MNDAA ဦးဆောင်သော TNLA၊ AA မဟာမိတ် (၃)ဖွဲ့သည် အောက်တိုဘာ ၂၇ ရက်မှစတင်ကာ ရှမ်းပြည်နယ်အရှေ့မြောက်ပိုင်းအတွင်း၌ တိုက်ပွဲများ ဖော်ဆောင်ခဲ့သည်။

ထိုသို့တိုက်ပွဲများ ဖော်ဆောင်မှုနှင့်အတူ ဒေသခံပြည်သူများအနေဖြင့် နေရပ်စွန့်ခွာ ထွက်ပြေးတိမ်းရှောင်ရမှုများရှိခဲ့ပြီး လက်ရှိတွင် မြန်မာ-တရုတ်နယ်စပ် BP 125 စစ်ဘေးရှောင်စခန်းတွင် စစ်ဘေးရှောင်ဦးရေ (၃ဝဝဝဝ)ကျော်အထိ ရှိကြောင်း ကိုးကန့်ဒေသခံများထံမှ သိရသည်။

ကိုးကန့်ဒေသ၌ နိုဝင်ဘာ ၁၆ ရက်မှစတင်ကာ မိုးအဆက်မပြတ်ရွာသွန်းမှုများကြောင့် ၎င်းစစ်ဘေးရှောင်စခန်း၏ နေရာအချို့တွင် ရေကြီးရေလျှံမှုများဖြစ်ပေါ်ခဲ့ကာ ရွှံ့နွံများအတွင်း ဖြတ်သန်းသွားလာနေထိုင်ရလျက်ရှိကြောင်း ဒေသခံများက ဆိုသည်။

“စစ်ဘေးရှောင်တွေ နေတဲ့နေရာ၊ လမ်းတွေမှာ ရေကြီးပြီးတော့ ရွှံ့တွေ နွံတွေလို ဖြစ်နေတာပေါ့။ အဲဒီမှာပဲ သွားလာနေထိုင်ရတယ်လေ။ အခြေအနေက တော်တော်လေးကို ဆိုးပါတယ်။ တော်တော်လေးကို အခက်အခဲရှိပါတယ်။ နေရေးထိုင်ရေး၊ သွားရေးလာရေးကအစ အကုန်အခက်အခဲဖြစ်တာပေါ့။ နောက်သောက်သုံးရေတို့၊ လျှပ်စစ်ဓာတ်အားတို့ကလည်း ပြတ်လပ်နေပါတယ်” ဟု ကိုးကန့်ဒေသခံက ပြောသည်။

လက်ရှိတွင် အဆိုပါစစ်ဘေးရှောင်စခန်း၌ သောက်သုံးရေများ လိုအပ်လျက်ရှိသည့်အပြင် လျှပ်စစ်ဓာတ်အားအခက်အခဲများလည်း ဖြစ်ပေါ်နေလျက်ရှိကြောင်း သိရသည်။

လက်ရှိတွင် ကိုးကန့်ဒေသအတွင်း၌ MNDAA ဦးဆောင်သော မဟာမိတ်(၃)ဖွဲ့နှင့် တပ်မတော်တို့အကြားတွင် တိုက်ပွဲများ ဆက်လက်ဖြစ်ပွားလျက်ရှိပြီး စစ်ဘေးရှောင်ဦးရေ ထပ်မံတိုးမြှင့်လာဖွယ်ရှိကြောင်း သိရသည်။

ထို့ပြင် MNDAA ဦးဆောင်သောအဖွဲ့အနေဖြင့် လောက်ကိုင်မြို့ကို ဦးတည်တိုက်ခိုက်ရန်အတွက် ပြင်ဆင်နေကြောင်း သိရသည်။