သန့်ဇင် (NSS) - နိုဝင်ဘာ ၁၇

ပြည်ပအလုပ်အကိုင်အကျိုးဆောင်အေဂျင်စီများအနေဖြင့် မိမိတို့စေလွှတ်သည့် အလုပ် သမားများစတင်ထွက်ခွာချိန်မှ မြန်မာနိုင်ငံသို့ ပြန်လည်ရောက်ရှိသည်အထိ တာဝန်အပြည့်အဝရှိကြောင်း အလုပ်သမားဝန်ကြီးဦးမြင့်နောင်က ပြောကြားခဲ့သည်။

ဝန်ကြီးဦးမြင့်နောင်က ယမန်နေ့(နိုဝင်ဘာလ ၁၆ ရက်)တွင် နေပြည်တော်၌ မြန်မာပြည်ပအလုပ်အကိုင်လုပ်ငန်းရှင်များအဖွဲ့ချုပ်(MOEAF)မှ တာဝန်ရှိသူများနှင့်တွေ့ဆုံစဉ် အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာနိုင်ငံတွင် ၂၀၂၃ ခုနှစ် အောက်တိုဘာလ ၃၁ ရက်အထိ လုပ်ငန်းဆောင်ရွက်နေသည့် ပြည်ပအလုပ်အကိုင်အကျိုးဆောင်လိုင်စင်ရအေဂျင်စီ(၄၈၇)ခုရှိပြီး ၎င်းအေဂျင်စီများထဲတွင် (ထိုင်း)လိုင်စင်ရ အေဂျင်စီ(၁၄၇)ခုရှိကြောင်း သိရသည်။

အဆိုပါအေဂျင်စီများအနေဖြင့် စေလွှတ်လိုက်သည့် အလုပ်သမားများအား သက်ဆိုင်ရာနိုင်ငံရှိ လုပ်ငန်းခွင်များတွင် ကြုံတွေ့ရသည့် အခက်အခဲများ၊ လုပ်ငန်းခွင် ထိခိုက်ဒဏ်ရာရရှိမှု/သေဆုံးမှုများနှင့် အလုပ်သမားရေးရာ ကိစ္စရပ်များ၊ ပြဿနာများ၊ ထူးခြားဖြစ်စဉ်များ ပေါ် ပေါက်လာပါက သက်ဆိုင်ရာဌာနများသို့ သတင်းပို့ရမည်ဖြစ်ပြီး အလုပ်သမားသံအရာရှိများနှင့် ပူးပေါင်းဆောင်ရွက်ရမည်ဖြစ်ကြောင်း ပြည်ထောင်စုဝန်ကြီး ဦးမြင့်နောင်က ပြောသည်။

ထို့ပြင် ပြည်ပအလုပ်အကိုင်အကျိုးဆောင်အေဂျင်စီများအနေဖြင့် ၎င်းတို့စေလွှတ်လိုက်သည့် အလုပ်သမားများ ပြည်ပသို့ စတင်ထွက်ခွါချိန်မှ မြန်မာနိုင်ငံသို့ ပြန်လည်ရောက်ရှိလာသည့်အချိန်ထိ တာဝန်အပြည့်အဝရှိကြောင်းလည်း ၎င်းကထပ်မံပြောကြားသည်။

လက်ရှိတွင် အလုပ်သမားဝန်ကြီးဌာနအနေဖြင့် ပြည်ပသို့ အလုပ်သမားစေလွှတ်ရေးလုပ်ငန်းစဉ်များကို ပုံမှန်အတိုင်း ခွင့်ပြုဆောင်ရွက်ပေးနေကြောင်း သိရသည်။