ဂျန်ဇက် (NSS) - နိုဝင်ဘာ ၁၆ 

တရုတ်သမ္မတ  ရှီကျင့်ဖျင့်က အမေရိကန်နိုင်ငံအနေနဲ့ ထိုင်ဝမ်ကို စစ်လက်နက်ပစ္စည်းတွေ တပ်ဆင်ပေးနေခြင်းကို ရပ်တန့်ဖို့ အမေရိကန်သမ္မတဂျိုးဘိုင်ဒန်ကို တိုက်တွန်းတောင်းဆိုလိုက်ပါတယ်။ 

တရုတ်သမ္မဟာ အမေရိကန်နိုင်ငံမှာ ကျင်းပတဲ့  အေပက်ထိပ်သီးအစည်းအဝေးအတွင်း အမေရိကန်သမ္မတ ဂျိုးဘိုင်ဒန်နဲ့တွေ့ဆုံဆွေးနွေးချိန်မှာ အခုလိုမျိုးပြောခဲ့တာဖြစ်ပါတယ်။ ရှီကျင့်ဖျင့်က ထိုင်ဝမ်နဲ့ တရုတ်နိုင်ငံကြား ပြန်လည်ပေါင်းစည်းရေးကို ရပ်တန့်လို့ရမှာမဟုတ်ကြောင်း ထပ်မံပြောဆိုခဲ့ပါတယ်။ 

အမေရိကန်သမ္မတက ထိုင်ဝမ်မှာ မကြာမီကျင်းပတော့မယ့်ရွေးကောက်ပွဲကို တရုတ်နိုင်ငံက လေးစားလိုက်နာစေ လိုကြောင်း၊ သမ္မတရှီကျင့်ဖျင့်ကို တောင်းဆိုခဲ့ကြောင်း အမေရိကန်အစိုးရတာဝန်ရှိသူတစ်ဦးက ပြောပါတယ်။ အမေရိကန်အစိုးရတာဝန်ရှိသူတစ်ဦးက "အမေရိကန်သမ္မတဟာ လာမယ့် ထိုင်ဝမ်ရွေးကောက်ပွဲမှာ ရွေးကောက်ပွဲလုပ်ငန်းစဉ်တွေကို လေးစားလိုက်နာဖို့ တရုတ်သမ္မတကို တိုက်တွန်းတောင်းဆိုခဲ့ပါတယ်" လို့ ပြောပါတယ်။

တရုတ်သမ္မတ နဲ့ အမေရိကန်သမ္မတတို့ဟာ လေးနာရီကြာတွေ့ဆုံဆွေးနွေးခဲ့ပြီး တရုတ်-အမေရိကန်ဆက်ဆံရေး နဲ့ပတ်သက်ပြီး အန္တရာယ်ဖြစ်စေမယ့်ကိစ္စတွေကို အဓိကထားဆွေးနွေးခဲ့ကြောင်း သိရပါတယ်။ တရုတ်သမ္မတက ထိုင်ဝမ်နဲ့ ပြန်လည်ပေါင်းစည်းရေးကို ငြိမ်းချမ်းစွာပြန်လည်ပေါင်းစည်းဖို့ လုပ်ဆောင်မှာဖြစ်ပေမယ့် လိုအပ်မယ် ဆိုရင် အင်အားသုံးသင့် သုံးမှာဖြစ်ကြောင်း ဆိုပါတယ်။

တရုတ်နိုင်ငံက ထိုင်ဝမ်ဟာ ၎င်းတို့ပိုင်နက်ဖြစ်တယ်လို့ ထုတ်ဖော်ပြောဆိုထားပေမယ့် ထိုင်ဝမ်ကတော့ ကိုယ်ပိုင်လွတ်လပ်ရေးရယူနိုင်ဖို့ ကြိုးပမ်းနေကြောင်း သိရပါတယ်။ ထိုင်ဝမ်အရေးဟာ အမေရိကန် နဲ့ တရုတ်နိုင်ငံ ဆက်ဆံရေးမှာ အဓိက အန္တရာယ်အရှိဆုံး ကိစ္စတစ်ခုဖြစ်နေကြောင်း၊ ထိုင်ဝမ်နဲ့ ငြိမ်းချမ်းစွာပြန်လည်ပေါင်းစည်း လိုပေမယ့် အင်အားသုံးတာမျိုးတွေလည်း လုပ်ကောင်းလုပ်နိုင်ကြောင်း တရုတ်သမ္မတက ပြောဆိုခဲ့တယ်လို့ အမေရိကန်အစိုးရတာဝန်ရှိသူတစ်ဦးက ထပ်မံပြောဆိုထားပါတယ်။