သန့်ဇင် (NSS) - နိုဝင်ဘာ ၁၅

မြန်မာလက်ရွေးစင်အသင်းအနေဖြင့် ကမ္ဘာ့ဖလားခြေစစ်ပွဲအောင်မြင်ရေးထက် အာရှဖလားကို ပစ်မှတ်ထားခြင်းက သဘာဝပိုကျသည်ဟု မြန်မာဘောလုံးအသင်းအသင်းနည်းပြချုပ် Michael Feichtenbenir က ပြောကြားခဲ့သည်။

မြန်မာ့လက်ရွေးစင်ဘောလုံးအသင်းနည်းပြချုပ် Michael Feichtenbenir က ယနေ့(နိုဝင်ဘာလ ၁၅ ရက်) တွင် ဂျပန်နိုင်ငံ၌ ဂျပန်နှင့်မြန်မာအသင်း ပွဲစဉ်အတွက်ပြုလုပ်သော ပွဲကြိုသတင်းစာရှင်းလင်းပွဲတွင် ယခုကဲ့သို့ ထည့်သွင်းပြောကြားခဲ့ခြင်းဖြစ်သည်။

“၂၀၂၆ ကမ္ဘာ့ဖလား နောက်ဆုံးအဆင့်ပွဲစဉ်တွေကို အရင်ပြိုင်ပွဲတွေကထက် အသင်းအရေအတွက် ပိုများများ ပါဝင်ကစားခွင့်ရတာဟာ အာရှအသင်းတွေအတွက် သိပ်ကောင်းပါတယ်။ မြန်မာအသင်းအနေနဲ့ ကမ္ဘာ့ဖလား ခြေစစ်ပွဲအောင်မြင်ဖို့ထက် အာရှဖလားအတွက် ပစ်မှတ်ထားတာက ပိုပြီးသဘာဝကျပါတယ်။ ကျွန်တော်တို့အသင်းက မနက်ဖြန် ဂျပန်အသင်းနဲ့ ကစားရမယ့်ပွဲကိုပဲ အာရုံစိုက်ပြီး တစ်သင်းလုံး အကောင်းဆုံးဖြစ်အောင်ကြိုးစားသွားပါမယ်”ဟု မြန်မာလက်ရွေးစင်အသင်း နည်းပြချုပ် Michael Feichtenbenir က ပြောကြားခဲ့သည်။

မြန်မာလက်ရွေးစင်ဘောလုံးအသင်းခေါင်းဆောင်မောင်မောင်လွင်ကလည်း ဂျပန်အသင်းနှင့် ယှဉ်ပြိုင်ရမည့်ပွဲစဉ်၌ ရလဒ်ကောင်းများရရှိအာင်ကြိုးပန်းသွားမည်ဟု ပြောကြားခဲ့သည်။

“ဂျပန်အသင်းက အင်အားကြီး အသင်းကောင်းတစ်သင်းဖြစ်ပေမယ့် ကျွန်တော်တို့အသင်းက နည်းပြ မှာထားတဲ့အတိုင်း သေချာကြိုးစားပြီး ကစားသွားမှာပါ။ ကစားဖော်တွေကလည်း မနက်ဖြန်မှာ သူတို့ စွမ်းဆောင်ရည်ကိုပြသနိုင်မယ်လို့ ယုံကြည်ပါတယ်”ဟု ၎င်းက ဆက်လက်ပြောသည်။

မြန်မာလက်ရွေးစင်အသင်းသည် ကမ္ဘာ့ဖလားခြေစစ်ပွဲ၏ ဒုတိယအဆင့် ဂျပန်၊ မြောက်ကိုရီးယား၊ ဆီးရီးယားအသင်းတို့နှင့် တစ်အုပ်စုတည်း ကျရောက်လျက်ရှိကာ လာမည့်(နိုဝင်ဘာလ ၁၆ ရက်)၊ ညနေ ၄ နာရီခွဲတွင် ဂျပန်အသင်းနှင့် အုပ်စုအဖွင့်ပွဲစဉ်အဖြစ် ယှဉ်ပြိုင်ကစားသွားမည်ဖြစ်သည်။