ဂျန်ဇက် (NSS) - နိုဝင်ဘာ ၁၅ 

ယီမင်နိုင်ငံရှိ ဟူသီလက်နက်ကိုင်အဖွဲ့က ၎င်းတို့သည် အစ္စရေးနိုင်ငံအပြင် ပင်လယ်နီအပြင်  Bab al-Mandeb ရေလက်ကြားရှိ အစ္စရေးသင်္ဘောတွေကို ပစ်မှတ်ထားတိုက်ခိုက်ခဲ့ကြောင်း ထုတ်ဖော်ပြောဆိုလိုက်သည်။ 

ဟူသီလက်နက်ကိုင်အဖွဲ့သည် အစ္စရေးနှင့် ဟားမက်စ်လက်နက်ကိုင်အဖွဲ့ကြား စစ်ပွဲဖြစ်လာခဲ့ပြီးနောက် အစ္စရေး နိုင်ငံကို ပစ်မှတ်ထားတိုက်ခိုက်နေခဲ့ကြောင်း သိရသည်။ ဟူသီလက်နက်ကိုင်အဖွဲ့ပြောရေးဆိုခွင့်ရှိသူတစ်ဦးက " ကျွန်တော်တို့ဟာ အစ္စရေးနိုင်ငံကို ပစ်မှတ်ထားပြီး တိုက်ခိုက်နေပါတယ်။ ပင်လယ်နီနဲ့အခြား ပင်လယ်အတွင်းမှာ ရှိနေမယ့် အစ္စရေးသင်္ဘောတွေကို တိုက်ခိုက်ဖို့ သည်းခံစောင့်ဆိုင်းနေမှာ မဟုတ်ဘူး" ဟု ပြောသည်။ 

ဟူသီလက်နက်ကိုင်အဖွဲ့သည် ၂ဝ၁၅ ခုနှစ်က အာရပ်ညွှန်ပေါင်းနိုင်ငံများအဖွဲ့နှင့် စစ်ပွဲဖြစ်လာခဲ့ပြီးနောက် လူသိများ ထင်ရှားလာသော လက်နက်ကိုင်အဖွဲ့အစည်းဖြစ်ပြီး အာရေဗျကျွန်းဆွယ်တွင် အဓိကလက်နက်ကိုင် အဖွဲ့အစည်းအဖြစ် ရှိနေသည်။ ဟူသီလက်နက်ကိုင်အဖွဲ့သည် ပဲ့ထိန်းဒုံးကျည်များ၊ ဒရုန်းအများအပြားကို ပိုင်ဆိုင်ထားသလို တပ်ဖွဲ့ဝင်အရေအတွက် သောင်းချီရှိနေသည်။ ဟူသီလက်နက်ကိုင်အဖွဲ့သည် ယီမင်နိုင်ငံ မြောက်ပိုင်း နှင့် ပင်လယ်နီကမ်းရိုးတန်းကို ထိန်းချုပ်ထားသည့် လက်နက်ကိုင်အဖွဲ့အစည်းဖြစ်သည်။ 

ဟူသီလက်နက်အဖွဲ့ပြောရေးဆိုခွင့်ရှိသူတစ်ဦးက "ကျွန်တော်တို့ဟာ ပင်လယ်နီမှာဖြတ်သန်းမယ့် အစ္စရေးသင်္ဘောတွေကို ရှာဖွေ၊ စောင့်ကြည့်တိုက်ခိုက်တာမျိုးတွေ လုပ်သွားမယ်" ဟု ပြောသည်။

အမေရိကန်သည် အစ္စရေးနှင့် ဟားမက်စ်လက်နက်ကိုင်အဖွဲ့ကြားဖြစ်ပွားနေသည့်စစ်ပွဲထဲသို့ တတိယအဖွဲ့အစည်း၊ နိုင်ငံ ပါဝင်လာမည်ကို စိုးရိမ်နေသော်လည်း အရှေ့အလယ်ပိုင်းဒေသရှိ လက်နက်ကိုင်အဖွဲ့များသည် အစ္စရေး နှင့် အမေရိကန်နိုင်ငံကို ပစ်မှတ်ထားတိုက်ခိုက်မှု အရှိန်မြင့်တက်လာနေကြောင်း သိရသည်။