ရောင်နီ (NSS) - နိုဝင်ဘာ ၁ဝ

ဟောင်ကောင်မှာ အာဖရိကဝက်အပြင်းဖျားရောဂါ (ASF) ဗိုင်းရပ်စ်ကို ဒေသတွင်း ဝက်မွေးမြူရေးခြံတစ်ခုမှာ ရှာဖွေတွေ့ရှိခဲ့ခြင်းကြောင့် ဝက်အကောင်ရေ ၅,၆ဝဝ ခန့်ကို သုတ်သင်ရှင်းလင်းဖို့ ကြာသပတေးနေ့ (နိုဝင်ဘာ ၉ ရက်) မှာ ဟောင်ကောင်အာဏာပိုင်တွေက အမိန့်ပေးခဲ့ပါတယ်။ 

တရုတ်ပြည်မကြီး နယ်စပ်အနီး၊ ယူရန်လန်ကျေးလက်ဒေသ ရှိ လိုင်စင်ရ ဝက်မွေးမြူရေးခြံမှ ဝက် ၃၇ ကောင်မှ နမူနာတွေမှာ ASF ဗိုင်းရပ်စ်ပိုး စမ်းသပ်တွေ့ရှိခဲ့တာကြောင့် အခုလိုသုတ်သင်ရှင်းလင်းခဲ့ခြင်း ဖြစ်ပါတယ်။ 

စိုက်ပျိုးရေး၊ ငါးလုပ်ငန်းနဲ့ ထိန်းသိမ်းရေးဦးစီးဌာန (AFCD) က မွေးမြူရေးခြံကို သန့်ရှင်းရေးနဲ့ ပိုးသတ်ဆေးတွေ စီစဉ်ပေးမှာဖြစ်ပြီး လိုအပ်ရင် ဝက်ခြံတွေကို အနီးကပ်စောင့်ကြည့်ကာ စမ်းသပ်မှုများ လုပ်ဆောင်သွားမယ်လို့ ပြောကြားခဲ့ပါတယ်။ 

အဆိုပါဖြစ်ရပ်ကြောင့် ဝက်အရှင် ထောက်ပံ့မှုနဲ့ ဒေသတွင်း သားသတ်ရုံတွေရဲ့လည်ပတ်မှုကို အလုံးစုံ ထိခိုက်သွားမှာ မဟုတ်ဘူးလို့ ၎င်းက ထပ်လောင်းပြောကြားခဲ့ပါတယ်။ 

ဒီပြဿနာကို ကမ္ဘာ့တိရစ္ဆာန်ကျန်းမာရေးအဖွဲ့ဆီ အကြောင်းကြားထားပြီး နိုင်ငံတကာမှ ကျွမ်းကျင်သူတွေနဲ့ပူးပေါင်းကာ ဗိုင်းရပ်စ်ကူးစက်မှုစတင်ခဲ့တဲ့အရင်းအမြစ်ကို စုံစမ်းစစ်ဆေးနေတယ်လို့ ဌာနက ဆိုပါတယ်။