Pika (NSS) - နိုဝင်ဘာ ၉ 

ထိုင်ဝမ်ရေလက်ကြားသို့ တရုတ်၏ လေယာဉ်တင်သင်္ဘော Shandong ဖြတ်သန်းဝင်ရောက်လာခဲ့ပြီးနောက် အနီးကပ်စောင့်ကြည့်မှုများကို လုပ်ဆောင်နေကြောင်း ထိုင်ဝမ်အစိုးရက နိုဝင်ဘာလ(၉)ရက်တွင် ထုတ်ဖော်ပြောခဲ့သည်။ 

တရုတ်လေယာဉ်တင်သင်္ဘောသည် နိုဝင်ဘာလ(၈)ရက် ညနေပိုင်းတွင် ထိုင်ဝမ် နှင့် တရုတ်နိုင်ငံကြားရှိ ရေလက်ကြားကို ဝင်ရောက်လာကာ  ရေလက်ကြားအလယ်မျဉ်းအနောက်ဖက်ခြမ်းတစ်လျှောက် တောင်ဖက်မှ မြောက်ဖက်သို့ ဖြတ်သန်းသွားလာခဲ့ခြင်းဖြစ်ကြောင်း ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။

ထိုင်ဝမ်ကာကွယ်ရေးဝန်ကြီးဌာန က "နိုဝင်ဘာလ(၉)ရက် နံနက်(၈)နာရီအချိန်အထိ တရုတ်လေယာဉ်တင် သင်္ဘောဟာ မြောက်ဘက်ရေပြင်ကိုဖြတ်ပြီး မြောက်ဘက်ကို ဆက်လက်သွားနေပါတယ်။ ထိုင်ဝမ်စစ်တပ်ဟာ အနီးကပ်စောင့်ကြည့်မှုတွေလုပ်ဆောင်နေပြီး သင့်လျော်တဲ့ တုံ့ပြန်မှုတွေလုပ်ဆောင်ဖို့ တပ်ဖွဲ့ဝင်တွေကို အမိန့်ပေး ခဲ့ပါတယ်" ဟု ပြောခဲ့သည်။

ပြီးခဲ့သည့်လတွင် တရုတ်လေယာဉ်တင်သင်္ဘော Shandong သည် ထိုင်ဝမ် နှင့် ဖိလစ်ပိုင်နိုင်ငံကို ပိုင်းခြားထား သော ရေလမ်းကြောင်း Bashi Channel မှတစ်ဆင့် ပစိဖိတ်သမုဒ္ဒရာအတွင်းသို့ ဝင်ရောက်သွားခဲ့ကြောင်း ထိုင်ဝမ် အစိုးရက ပြောကြားခဲ့သည်။ ပြီးခဲ့သည့် စက်တင်ဘာလတွင်လည်း တရုတ်လေယာဉ်တင်သင်္ဘော Shandong သည် ထိုင်ဝမ်၏ အရှေ့တောင်ဖက် ရေမိုင်(၆ဝ) အကွာမှ အနောက်ပစိဖိတ်ဒေသသို့ ဦးတည်သွားသည်ကို တွေ့ရှိခဲ့ကြောင်း ထိုင်ဝမ်စစ်တပ်က ပြောကြားခဲ့သည်။

ထိုင်ဝမ်ကို ၎င်း၏ ပိုင်နက်အဖြစ် သတ်မှတ်ထားသော တရုတ်သည် ပြီးခဲ့သည့်နှစ်များအတွင်း ထိုင်ဝမ်ကျွန်းအပေါ် စစ်ရေးနှင့် နိုင်ငံရေးအရ ဖိအားပေးမှုများကို ပိုမိုအရှိန်မြှင့်လုပ်ဆောင်ခဲ့ကြောင်း သိရသည်။ ထို့အပြင် တရုတ် နှင့် ထိုင်ဝမ်ကျွန်း ပြန်လည်ပေါင်းစည်းနိုင်ရန်အတွက် လိုအပ်ပါက အင်အားသုံး ဖြေရှင်းသွားမည်ဖြစ်ကြောင်း တရုတ် သမ္မတရှီကျင့်ဖျင်က အကြိမ်ကြိမ်ပြောခဲ့သည်။ 

ပြီးခဲ့သည့်သီတင်းပတ်တွင် အမေရိကန်နှင့် ကနေဒါတို့၏ စစ်သင်္ဘောများ ထိုင်ဝမ်ရေလက်ကြားကို ဖြတ်ကျော် ဝင်ရောက်လာခဲ့ပြီးနောက် တရုတ်လေယာဉ်တင်သင်္ဘော Shandong ၏ ဖြတ်သန်းသွားလာမှု ထွက်ပေါ်လာခြင်း ဖြစ်သည်။