ကျော် (NSS) - နိုဝင်ဘာ ၈

အုပ်စုတက်ရန် အခွင့်အရေးနည်းသော်လည်း နိုင်ငံအသင်းနှင့်ကလပ်အသင်းအတွက် အနိုင်ရရှိရန်ကြိုးစားသွားမည်ဟု ရှမ်းယူနိုက်တက်အသင်းနည်းပြချုပ် ဦးဟန်ဝင်းအောင်က ပြောသည်။

မြန်မာနေရှင်နယ်လိဂ်ချန်ပီယံ ရှမ်းယူနိုက်တက်အသင်းသည် AFC Cup 2023-24 ပြိုင်ပွဲအတွက် ဖိလစ်ပိုင်ကလပ် Dynamic Herb Cebu FC အသင်းနှင့်မယှဥ်ပြိုင်မီ ယနေ့ (နိုဝင်ဘာလ ၈ ရက်)၊ မွန်းလွဲ ၂ နာရီက သုဝဏ္ဏဘောလုံးကွင်း၌ကျင်းပခဲ့သည့် ပွဲကြိုသတင်းစာရှင်းလင်းပွဲတွင် ၎င်းက အထက်ပါကဲ့သို့ပြောကြားခဲ့ခြင်းဖြစ်သည်။

"အုပ်စုပွဲစဥ် ၃ ပွဲပြီးချိန်မှာ သွင်းဂိုးမရသေးတာကိုပြင်ဆင်သွားမှာပါ။ ကျွန်တော်တို့အသင်းက ပြည်တွင်းပွဲတွေမှာ ရလဒ်ကောင်းပြီး AFC Cup မှာရလဒ်ဆိုးနေတာက ပြိုင်ဘက်အသင်းနဲ့ခြေစွမ်းကွာဟနေလို့ပါ။ ပြိုင်ဘက်အသင်းတွေမှာ နိုင်ငံခြားသားကစားသမားတွေအများကြီးပါတယ်။ သူတို့ခြေစွမ်းကတကယ်ကောင်းတယ်။ ဒါက ပွဲတစ်ပွဲကိုကွာခြားစေတယ်။ အုပ်စုတက်ဖို့အခွင့်အရေးနည်းပေမယ့် နိုင်ငံအတွက် ကလပ်အသင်းအတွက် ကိုယ်စားပြုကစားရတာကြောင့် အနိုင်ရဖို့ကြိုးစားသွားမှာပါ"ဟု နည်းပြချုပ်ဦးဟန်ဝင်းအောင်က ပြောသည်။

ထို့ပြင် ရှမ်းယူနိုက်တက်အသင်း၏ ဂိုးသမားဖြစ်သူ ကျော်ဇင်ဖြိုးမှလည်း အကောင်းဆုံးဖြစ်အောင်ကြိုးစားသွားမည်ဖြစ်ကာ ကစားသမားအားလုံးမှလည်း အနိုင်ရရှိရန် ကြိုးစားယှဥ်ပြိုင်သွားမည်ဟု ပြောကြားခဲ့သည်။

ထို့ပြင် ပွဲကြိုသတင်းစာရှင်းလင်းပွဲသို့ ဖိလစ်ပိုင်ကလပ် Dynamic Herb Cebu FC အသင်းနည်းပြချုပ် Mr.Joshua Schirmer နှင့်ကွင်းလယ်ကစားသမား Roberto Corsame Jr တို့လည်းတက်ရောက်ခဲ့ကြကြောင်း သိရသည်။

မြန်မာနေရှင်နယ်လိဂ်ချန်ပီယံ ရှမ်းယူနိုက်တက်အသင်း နှင့် ဖိလစ်ပိုင်ကလပ် Dynamic Herb Cebu FC အသင်းတို့သည် AFC Cup 2023-24 ပြိုင်ပွဲ၏ အုပ်စု(F)ပွဲစဥ်အဖြစ် မနက်ဖြန် (နိုဝင်ဘာလ ၉ ရက်)၊ ည ၆ နာရီခွဲ၌ သုဝဏ္ဏဘောလုံးကွင်းတွင် ယှဥ်ပြိုင်ကစားသွားကြမည်ဖြစ်သည်။