စော (NSS) - နိုဝင်ဘာ ၆

တိုက်ပွဲများကြောင့် လားရှိုးမြို့ရှောင်လမ်းပေါ်၌ ခရီးသွားပြည်သူ (၃ဝဝ)ခန့် ပိတ်မိနေပြီး အစားအသောက်များ လိုအပ်နေကြောင်း သိရသည်။

အဆိုပါ ခရီးသွားပြည်သူများသည် ပြီးခဲ့သည့် အောက်တိုဘာ (၂၇)ရက်မှစတင်ကာ လားရှိုးမြို့ရှောင်လမ်းပေါ်၌  ပိတ်မိနေခြင်းဖြစ်ကြောင်း လားရှိုးမြို့အခြေစိုက် လူမှုကူညီရေးအသင်းများမှ သိရသည်။

“သိရသလောက်ကတော့ အောက်တိုဘာ (၂၇)ရက်ထဲက  အဲဒီနားမှာပဲနေတယ် ပြောတယ်။ ကားပေါ်မှာနေတဲ့ လူလည်းရှိတယ်။ ဆောက်လုပ်လက်စ ဆီဆိုင်ထဲမှာ နေကြတာလည်းရှိတယ်။ တစ်ချို့ကြတော့လည်း ထမင်းဆိုင် ထဲမှာလည်း နေကြတယ်။ မနေ့ကစာရင်းဆိုရင် ကားသမားအပါ (၂ဝဝ)ကျော်လောက်ရှိတယ်” ဟု လူမှုကူညီရေး အသင်းဝင်တစ်ဦးက NP News ကို အတည်ပြုပြောသည်။

အဆိုပါ ပိတ်မိနေသူများကို  ယနေ့ (နိုဝင်ဘာ ၆ ရက်) တွင် လားရှိုးမြို့အခြေစိုက် လူမှုကူညီအသင်းများမှ ထမင်းဘူး (၄ဝဝ)ကျော် ပေးပို့လှူဒါန်းခဲ့ကြကြောင်း သိရသည်။

“လောလောဆယ် ထမင်းဘူး (၄ဝဝ)ကျော် ကျော်ပါသွားတယ်။ နှစ်ကြိမ်မသွားနိုင်တော့ တစ်ယောက်ကို နှစ်ဗူးနှုန်း နဲ့ ပေးခဲ့တယ်။ ညနေစာကော ရေကော  အဆင်ပြေလုံလောက်အောင် ပို့ပေးခဲ့တာပါ။ တစ်ပတ်ကျော်လာတော့ အစားအသောက်လေး အခက်အခဲရှိလာတာပေါ့။ အဲဒီတော့ နောက်ရက်တွေ ထမင်းဟင်းရအောင် ကျွန်တော်တို့ စီစဉ်ပေးနေပါတယ်” ဟု ၎င်းက ဆက်လက်ပြောသည်။

ရှမ်းပြည်နယ်မြောက်ပိုင်းတွင် ပြီးခဲ့သည့် (အောက်တိုဘာ ၂၇ ရက်) မှ စတင်၍ MNDAA၊ TNLA၊ AA မဟာမိတ်(၃)ဖွဲ့ က တပ်မတော်စခန်းများနှင့် ရဲစခန်းများကို အင်အားအလုံးအရင်းဖြင့် ဝင်ရောက်တိုက်ခိုက်လျက်ရှိကြောင်း သိရသည်။