Pika (NSS) - နိုဝင်ဘာ ၁ 

တတိယကမ္ဘာစစ်မှာ စတင်နေပြီဖြစ်ကြောင်း ရုရှား၏ ထိပ်တန်းနိုင်ငံခြားရေးမူဝါဒကျွမ်းကျင်သူ Fyodor Lukyanov က ပြောကြားခဲ့သည်။

ကမ္ဘာ့အစီအစဉ်သည် ဆိုးရွားမှုများရှိနေမှုနှင့်အတူ စီမံခန့်ခွဲမှုများလည်း စတင်ပြိုကွဲနေပြီဖြစ်ပြီး အစ္စရေး-ပါလက်စတိုင်းပဋိပက္ခ အပါအဝင် အခြားပဋိပက္ခများကို ဖြေရှင်းရန်အတွက် နည်းလမ်းများရှိပုံ မပေါ်ကြောင်း ၎င်းက ပြောဆိုခဲ့သည်။

ပြီးခဲ့သည့်သီတင်းပတ်က ပြုလုပ်ခဲ့သောသတင်းစာရှင်းလင်းပွဲအတွင်း  Fyodor Lukyanov က ယခုကဲ့သို့ မှတ်ချက်ပြုပြောဆိုခဲ့ခြင်းဖြစ်သည်။ ထို့အပြင် ကမ္ဘာကြီးသည် အေးခဲနေသောပဋိပက္ခများကို ပြန်လည် လောင်ကျွမ်းစေခဲ့သည်ကိုလည်း တွေ့မြင်ခဲ့ရကြောင်း Fyodor Lukyanov က ပြောခဲ့သည်။ 

Nagorno-Karabakh ဒေသ ပဋိပက္ခ၊ ရုရှား-ယူကရိန်းစစ်ပွဲ နှင့် အစ္စရေး-ပါလက်စတိုင်းစစ်ပွဲတို့ကို ၎င်းက ရည်ညွှန်း ပြောဆိုခဲ့ခြင်းဖြစ်ကြောင်း သိရသည်။ လက်ရှိဖြစ်ပွားနေသော ပဋိပက္ခများသည် အကျိုးသက်ရောက်မှုများစွာရှိပြီး (၂ဝ) ရာစုနှစ်အတွင်းက ဖြစ်ပွားခဲ့သော ပထမကမ္ဘာစစ်၊ ဒုတိယကမ္ဘာစစ်တို့ နှင့် သိသိသာသာကွာခြားသော ကမ္ဘာစစ်အသစ်ဖြစ်ကြောင်း Fyodor Lukyanov က ပြောခဲ့သည်။

၎င်းက "စစ်ပွဲကြီးတစ်ခု ဒါမှမဟုတ် ဒုတိယကမ္ဘာစစ်လိုမျိုး စစ်ပွဲတွေ စတင်တော့မယ်လို့ ကျွန်တော်ထင်ပါတယ်။ ဒါပေမယ့် ဒီပဋိပက္ခတွေအားလုံး အဆုံးသတ်ပြီးသွားရင်တော့ ဒီလိုစစ်ပွဲမျိုးတွေ ဘယ်တော့မှဖြစ်လာတော့မှာ မဟုတ်ပါဘူး" ဟု ပြောခဲ့သည်။

အရှေ့အလယ်ပိုင်းဒေသတွင်ဖြစ်ပွားနေသော တင်းမာမှုများသည် နောက်ဆုံးဖြစ်ပွားမည့် ပဋိပက္ခများ မဟုတ်ကြောင်း နှင့် မကြာမီအချိန်အတွင်း ကမ္ဘာတစ်ဝန်းတွင် ရန်လိုမုန်းတီးမှုများ ပိုမိုဖြစ်ပွားလာနိုင်ဖွယ်ရှိ ကြောင်း ၎င်းက ပြောခဲ့သည်။ ထို့အပြင် လက်ရှိအချိန်တွင် အဆိုပါပဋိပက္ခများကို မည်သည့်နိုင်ငံကမှ တားဆီးနိုင် မည်မဟုတ်ကြောင်း ၎င်းက သတိပေးပြောခဲ့သည်။

၎င်းက "နိုင်ငံတကာအစီအစဉ်က စတင်ပြိုကွဲနေပါပြီ။ အရှေ့အလယ်ပိုင်းဒေသမှာ ယခင်တည်းက စစ်ပွဲတွေ ဖြစ်ပွားခဲ့ဖူးပေမယ့်လည်း ဆိုဗီယက်ပြည်ထောင်စု USSR နဲ့ အမေရိကန်နိုင်ငံတို့က ဝင်ရောက်စွက်ဖက်ခဲ့ပြီး နောက်တစ်ကြိမ်ပဋိပက္ခတွေ မဖြစ်ပွားနိုင်အောင် လုပ်ဆောင်ခဲ့ပါတယ်။ ဒါပေမယ့် လက်ရှိအချိန်မှာတော့ ဆက်လက်ဖြစ်ပွားနေတဲ့ပဋိပက္ခတွေကို ဖြေရှင်းနိုင်မယ့်နည်းလမ်းတွေကို ကျွန်တော် မတွေ့မိသေးပါဘူး" ဟု ပြောခဲ့သည်။