စော (NSS) - နိုဝင်ဘာ ၁

အလုပ်သမားဝန်ကြီးဌာနအနေဖြင့် လူမှုဖူလုံရေးဆေးခန်းများအတွက် လက်ထောက်ဆရာဝန်ရာထူး (၃၀)ကျော်ခေါ်ယူသွားမည်ဖြစ်ကြောင်း သိရသည်။

အလုပ်သမားဝန်ကြီးဌာန၊ လူမှုဖူလုံရေးအဖွဲ့က ယနေ့(နိုဝင်ဘာလ ၁ ရက်)တွင် အထက်ပါကဲ့သို့ထုတ်ပြန်ထားခြင်းဖြစ်သည်။

လူမှုဖူလုံရေးအဖွဲ့လက်အောက်ရှိ တိုင်း/ပြည်နယ်များတွင် တာဝန်ထမ်းဆောင်ရန် လက်ထောက်ဆရာဝန် (M.B.,B.S) (၃၄) နေရာကို ခေါ်ယူသွားမည်ဖြစ်ကြောင်း သိရသည်။

လက်ထောက်ဆရာဝန် (၃၄)နေရာ အနက် ရန်ကုန်တိုင်းတွင် (၁)နေရာ အပါအဝင် မန္တလေး တိုင်းတွင် (၂)နေရာ၊ မကွေးတိုင်းတွင် (၂)နေရာ နှင့် ဧရာဝတီတိုင်းတွင် (၈)နေရာတို့ ခေါ်ယူသွားမည်ဖြစ်ကြောင်း ထုတ်ပြန်ချက်အရသိရသည်။

ထို့ပြင် ပဲခူးတိုင်းတွင် (၆)နေရာ၊ စစ်ကိုင်းတိုင်းတွင် (၆)နေရာ၊ ရှမ်းပြည်နယ်တွင် (၄)နေရာ၊ မွန်ပြည်နယ်တွင် (၃)နေရာ ၊ ကရင်ပြည်နယ်တွင် (၁)နေရာနှင့် ကယားပြည်နယ်တွင် (၁)နေရာတို့ကို ထပ်မံခေါ်ယူသွားမည်ဖြစ်ကြောင်း သိရသည်။

လျှောက်ထားသူများသည် မြန်မာနိုင်ငံဆေးကောင်စီမှ အသိအမှတ်ပြုခြင်းခံထားရသည့် သက်တမ်းမကုန်သေးသော  ဆေးကုသခွင့် လိုင်စင်ရှိသူဖြစ်ရမည်ဖြစ်ပြီး လက်ရှိတာဝန်ထမ်းဆောင်နေဆဲ နိုင်ငံ့ဝန်ထမ်းများကို လျှောက်ထားခွင့်မပြုကြောင်းသိရသည်။

လျှောက်လွှာများကို နေပြည်တော်၊ ဆေးဌာန၊ လူမှုဖူလုံရေးအဖွဲ့(ရုံးချုပ်)၊အလုပ်သမားဝန်ကြီးဌာနအပြင် ရန်ကုန်တိုင်း၊ အလုပ်သမားဆေးရုံကြီး (ထန်းထပင်၊ ရန်ကုန်)နှင့် မန္တလေးတိုင်း၊  အလုပ်သမားဆေးရုံကြီး (မန္တလေး)တို့တွင် အခမဲ့လျှောက်ထားနိုင်ကြောင်း ထုတ်ပြန်ချက်အရ သိရသည်။

ထို့ပြင် ချင်းပြည်နယ်အတွက်ကို စစ်ကိုင်းတိုင်း၊ လူမှုဖူလုံရေးရုံးတွင် အခမဲ့လျှောက်ထားနိုင်ကြောင်း သိရသည်။