Pika (NSS) - အောက်တိုဘာ ၃၁ 

နျူကလီးယားဓါတ်အားပေးစက်ရုံမှ ရေဒီယိုသတ္တိကြွရေဆိုးများ ပစိဖိတ်ပင်လယ်ထဲသို့ စွန့်ပစ်ရန် ဆုံးဖြတ်ခဲ့သော ဂျပန်အစိုးရ၏ ဆုံးဖြတ်ချက်များနှင့်အတူ စီးပွားရေးကျဆင်းမှုများကို လျော့ပါးစေရန် ကူညီမှုအဖြစ် အမေရိကန်စစ်တပ်အတွက် ဂျပန်၏ပင်လယ်စာများကို ဝယ်ယူရန် အမေရိကန်အစိုးရက သဘောတူညီခဲ့ကြောင်း သိရသည်။

ဂျပန်နိုင်ငံ၏ ပင်လယ်စာတင်ပို့မှုများအပေါ် တရုတ်အစိုးရ၏ တားမြစ်ပိတ်ပင်မှုကို တုံ့ပြန်ရာတွင် ကူညီပေးရန်အတွက် အမေရိကန်စစ်တပ်သည် ဂျပန်၏ ပင်လယ်စာရောင်းချသူများနှင့် နှစ်ရှည်စာချုပ်ချုပ်ဆိုသွားမည်ဖြစ်ကြောင်း ဂျပန်နိုင်ငံဆိုင်ရာအမေရိကန်သံအမတ်ကြီး Rahm Emmanuel က ပြောဆိုခဲ့သည်။

ဂျပန် ငါး၊ ပင်လယ်ဂုံး နှင့် အခြားထွက်ကုန်ပစ္စည်းများကို အမေရိကန်ရေတပ်သင်္ဘောများတွင် ကျွေးသွားမည်ဖြစ်ပြီး ဒေသတွင်းရှိ အမေရိကန်စစ်အခြေစိုက်စခန်း(၁၇)ခုတွင် သိုလှောင်ထားရှိသွားမည်ဖြစ်ကြောင်း ၎င်းက ထပ်မံပြောခဲ့သည်။

အမေရိကန်စစ်သားများကို ဂျပန်နိုင်ငံထွက် ပင်လယ်စာများ ကျွေးခြင်းသည် ဂျပန်၏ အကြီးမားဆုံး တရုတ်ဈေးကွက်ကို ဆုံးရှုံးလိုက်ရခြင်းအတွက် ကာမိမည် မဟုတ်ကြောင်း ၎င်းက ဝန်ခံပြောခဲ့သည်။

ထို့အပြင် တရုတ်နိုင်ငံ၏ စီးပွားရေးအကျပ်ကိုင်မှုများနှင့်ပတ်သက်ပြီး ကြေညာချက်များ ထုတ်ပြန်သွားမည်ဖြစ်ကြောင်း Rahm Emmanuel က ပြောခဲ့သည်။

၎င်းက "တရုတ်နိုင်ငံရဲ့စီးပွားရေးအကျပ်ကိုင်မှုတွေ လျော့ပါးသွားစေဖို့အတွက် ပစ်မှတ်ထားခံခဲ့ရတဲ့ နိုင်ငံ (သို့မဟုတ်) စက်မှုလုပ်ငန်းတွေကို အကူအညီတွေပေးသွားမှာပါ" ဟု ပြောခဲ့သည်။

ယခင်က ဂျပန်နိုင်ငံထွက်ပင်လယ်စာ အများဆုံးတင်သွင်းခဲ့သော တရုတ်နိုင်ငံသည် ရေဒီယိုသတ္တိကြွ ညစ်ညမ်းမှုဖြစ်နိုင်ခြေများနှင့်ပတ်သက်ပြီး စိုးရိမ်မှုများမြင့်တက်လာခဲ့ပြီးနောက် ပြီးခဲ့သည့် ဩဂုတ်လတွင် ဂျပန်၏ ပင်လယ်စာတင်သွင်းမှုအားလုံးကို ပိတ်ပင်ခဲ့ကြောင်း သိရသည်။ 

ထို့အပြင် ဂျပန်အစိုးရ၏ ပစိဖိတ်သမုဒ္ဒရာထဲသို့ ရေဒီယိုသတ္တိကြွရေဆိုးများ စွန့်ပစ်ရန် ဆုံးဖြတ်ကို တရုတ်အစိုးရ ပြစ်တင်ရှုတ်ချခဲ့ပြီး အဆိုပါလုပ်ရပ်မှာ တစ်ကိုယ်ကောင်းဆန်ပြီး တာဝန်မဲ့သောလုပ်ရပ်တစ်ခုဖြစ်ကြောင်း ပြောခဲ့သည်။ ယခုလအစောပိုင်းတွင် ရုရှားအစိုးရသည် ဂျပန်၏ ပင်လယ်စာတင်ပို့မှုအားလုံးကို တားမြစ်ပိတ်ပင်ခဲ့ကြောင်း သိရသည်။ 

ရေဒီယိုသတ္တိကြွရေဆိုးများ ပင်လယ်ထဲသို့ စွန့်ပစ်မှုမှာ ဘေးကင်းကြောင်း  ဂျပန်အစိုးရက အကြိမ် ကြိမ်ပြောခဲ့သလို အဆိုပါပြောဆိုချက်ကို နိုင်ငံတကာအဏုမြူစွမ်းအင်အေဂျင်စီ (IAEA) က ထောက်ခံခဲ့ကြောင်းလည်း သိရသည်။ ဂျပန် နှင့် အမေရိကန်စစ်တပ်တို့၏ ပင်လယ်စာသဘောတူညီချက်အရ ပထမဆုံးဝယ်ယူမှုမှာ ပင်လယ်ဂုံး မက်ထရစ်တန်ချိန် (၁)တန်အောက်သာရှိလိမ့်မည်ဖြစ်ကြောင်း ရိုက်တာသတင်းဌာနက ဖော်ပြခဲ့သည်။

ပြီးခဲ့သည့်နှစ်တွင် ဂျပန်နိုင်ငံသည် တရုတ်နိုင်ငံသို့ ပင်လယ်ဂုံး မက်ထရစ်တန်ချိန် (၁)သိန်းကျော် တင်ပို့ခဲ့ကြောင်း သိရသည်။