ရောင်နီ (NSS) - အောက်တိုဘာ ၂၉

နာမည်ကျော် လူကြိုက်များတဲ့ ဇာတ်လမ်းတွဲ Friends ရဲ့ ကြယ်ပွင့်တွေထဲက တစ်ယောက်ဖြစ်တဲ့ မက်သော်ပဲရီ (၅၄ နှစ်) ကို စနေနေ့ (အောက်တိုဘာ ၂၈ ရက်) က နေအိမ်ထဲက ရေချိုးကန်ထဲမှာ သေဆုံးလျက် တွေ့ရှိခဲ့တယ်လို့ အမေရိကန်မီဒီယာတွေက ဖော်ပြပါတယ်။      

ပဲရီဟာ ၎င်းရဲ့နေအိမ်ရှိ ရေနွေးကန်ထဲမှာ သတိလစ်မေ့မြောနေခဲ့ပြီး အသက်ကယ်နိုင်ခြင်း မရှိခဲ့ဘူးလို့  ဥပဒေ စိုးမိုးရေးသတင်းရင်းမြစ်တွေက ပြောပါတယ်။ ပဲရီဟာ ရေနွေးကန်ထဲမှာ စိမ်နေခဲ့ပြီး ရေနစ်ခဲ့ပုံရပြီး၊ အရေးပေါ် အခြေအနေဖြစ်ခဲ့ပုံပေါ်တယ်လို့ မီးသတ်ဌာနမှ ပြောရေးဆိုခွင့်ရှိသူက အတည်ပြုခဲ့ပါတယ်။ ဒါပေမယ့်လည်း ပဲရီဟာ ရေနစ်သေဆုံးမှု ဟုတ်လား၊ မဟုတ်လားဆိုတာ အတည်မပြုနိုင်သေးပါဘူး။ ပဲရီ ၁၉၉၄ ခုနှစ်မှ ၂၀၀၄ ခုနှစ်အထိ Season 10 ခု ပါဝင်တဲ့ အလွန်ရေပန်းစား နာမည်ကြီးတဲ့ Friends ဇာတ်လမ်းတွဲမှာ ပညာရှိသူငယ်ချင်း ချန်ဒ်လာဘင်းအဖြစ် လူသိများပါတယ်။ ပဲရီဟာ အကိုက်အခဲပျောက်ဆေးတွေနဲ့ အရက်သေစာ စွဲလမ်းခြင်းတို့ကို ကြောင့် နှစ်ပေါင်းများစွာ အကြိမ်ကြိမ် ဆေးရုံတက်နေရသူဖြစ်ပါတယ်။ ၂ဝ၁၈ ခုနှစ်ကလည်း ပဲရီဟာ အူမကြီး ရောဂါ အပါအဝင် ကျန်းမာရေးပြဿနာတွေ ကြုံတွေ့ခဲ့ရပြီး ခွဲစိတ်မှုများစွာ ပြုလုပ်ရပါတယ်။     

Friend ဇာတ်လမ်းတွဲဟာ အရွယ်ရောက်ပြီးသား လူငယ်တွေကြားက သူငယ်ချင်းသံယောဇဉ်များ၊ အသက်မွေးဝမ်း ကြောင်း အလုပ်၊ အချစ်တွေကြားက နယူးယောက်မြို့သားသူငယ်ချင်း ခြောက်ယောက်ရဲ့ဘဝကို ရိုက်ကူးထားခြင်း ဖြစ်ပါတယ်။ ၎င်းဟာ NBC ရဲ့ ၁၉၉ဝ ပြည့်လွန်နှစ်များနဲ့ ၂ဝဝဝ ပြည့်နှစ်များအစောပိုင်း ရုပ်မြင်သံကြားလိုင်းတွေမှာ အအောင်မြင်ဆုံးဖြစ်ခဲ့ပြီး ကမ္ဘာလုံးဆိုင်ရာ fan တွေကို ဆွဲဆောင်နိုင်ခဲ့ပါတယ်။