မျိုးကြီး (NSS) - အောက်တိုဘာ ၂၈

နစကမှ ကျင်းပပေးမည့် အထွေထွေရွေးကောက်ပွဲအတွက် လိုအပ်သော ဆန္ဒပြုခန်း၊ စာအိတ်တို့ကို ဝယ်ယူလိုကြောင်း UEC က တင်ဒါဖိတ်ခေါ်ထားသည်။

ပြည်ထောင်စုရွေးကောက်ပွဲကော်မရှင်(UEC)က ယနေ့(အောက်တိုဘာလ ၂၈ ရက်)တွင် ရွေးကောက်ပွဲနှင့်သက်ဆိုင်သည့် ပစ္စည်းများကို ဝယ်ယူလိုသည့်အတွက် တင်ဒါတင်သွင်းရန် ဖိတ်ခေါ်ထားသည်။

ကျင်းပပြုလုပ်မည့် အထွေထွေရွေးကောက်ပွဲအတွက် ရွေးကောက်ပွဲနှင့်သက်ဆိုင်သော ဆန္ဒပြုခန်း(စက္ကူကတ္ထူ)၊ ဘောပင်၊ စက္ကူစာအိတ်၊ စာရွက်၊ လုံခြုံရေးကြိုးနှင့် မင်ဘူးများကို ဝယ်ယူသွားမည်ဖြစ်ကြောင်း UEC က ထုတ်ပြန်ထားသည်။

ထို့ကြောင့် ဈေးပြိုင်အဆိုပြုလွှာများကို ပြည်ထောင်စုရွေးကောက်ပွဲကော်မရှင်ရုံး၊ ရုံးအမှတ်(၂၂)ရှိ တင်ဒါလက်ခံရေးနှင့် စိစစ်ရေးကော်မတီဥက္ကဋ္ဌထံ လိပ်မူကာ နိုဝင်ဘာလ ၁၃ ရက် နောက်ဆုံးထား၍ လာရောက်တင်သွင်းရန် အသိပေးထားသည်။

ထို့ပြင် သတ်မှတ်ကာလကျော်လွန်မှတင်သွင်းသည့် ဈေးပြိုင်အဆိုပြုလွှာများကို ထည့်သွင်းစဉ်းစားသွားမည်မဟုတ်ကြောင်းလည်း UEC က အသိပေးထားသည်။

လက်ရှိ နစက၏ ရွေးကောက်ပွဲကော်မရှင်အနေဖြင့် ကျင်းပပြုလုပ်မည့် အထွေထွေ ရွေးကောက်ပွဲတွင် ၎င်းတို့ တီထွင်ထားသော မြန်မာအီလက်ထရောနစ်မဲပေးစက်ကို အသုံးပြု ကျင်းပသွားမည်ဖြစ်ကြောင်း သိရသည်။

သို့သော် တိုင်းရင်းသားလူမျိုးလွှတ်တော်ကိုယ်စားလှယ်မဲဆန္ဒနယ်မြေများတွင် မဲပေးစက်ကို အသုံးပြုခြင်းမရှိဘဲ တံဆိပ်တုံး ရိုက်နှိပ်အသုံးပြုရသည့် ယခင်မဲပေးနည်းကို အသုံးပြုသွားဖွယ်ရှိကြောင်း သိရသည်။

နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်သည် ၂၀၂၄ ခုနှစ် ပြည်လုံးကျွတ်သန်းခေါင် စာရင်းကောက်ယူပြီးပါက မဲစာရင်းများကို ပြုစုကာ ရွေးကောက်ပွဲကို အစောလျင်ဆုံးပြန်လည်ကျင်းပပေးသွားမည်ဟု ပြောကြားထားဖူးသည်။