စော (NSS) - အောက်တိုဘာ ၂၀

ထိုင်းနိုင်ငံ၌ မြန်မာအမျိုးသားတစ်ဦး လုပ်ငန်းခွင်အတွင်း သေဆုံးခဲ့သောကြောင့် ၎င်း၏ မိသားစုဝင်အား  နစ်နာကြေး ဘတ် (၁)သန်းကျော် ပေးအပ်ခဲ့ကြောင်း သိရသည်။

ထိုင်းနိုင်ငံရှိ မြန်မာအလုပ်သမားသံအရာရှိရုံးက  ယမန်နေ့ (အောက်တိုဘာ ၁၉ ရက်) တွင် အထက်ပါကဲ့သို့ ထုတ်ပြန်ခဲ့ခြင်းဖြစ်သည်။

ထိုင်းနိုင်ငံ၊ ချွန်ဘူရီမြို့ရှိ Evergrowing Resoutces Recycling Co.,Ltd တွင် အလုပ်လုပ်ကိုင်နေသည့် မြန်မာ အမျိုးသားတစ်ဦးသည် ပြီးခဲ့သည့် ၂ဝ၂၂ ခုနှစ် မေလ (၁၂)ရက်တွင် လုပ်ငန်းခွင်အတွင်း  ဖော့ကလစ်ကား တိမ်းမှောက်၍ သေဆုံးခဲ့ကြောင်း သိရသည်။

အဆိုပါသေဆုံးသူမှာ မောင်ဇော်လင်းထက်ဖြစ်ပြီး ဧရာဝတီတိုင်း၊ ဟင်္သာတမြို့နယ်တွင် နေထိုင်သူဖြစ်ကြောင်း သိရသည်။

၎င်း၏ ကျန်ရစ်သူမိသားစုဝင်များမှ  အကျိုးခံစားခွင့်များ ရရှိနိုင်ရေးအတွက် အလုပ်သမားသံအရာရှိရုံးမှ ဆောင်ရွက်ပေးခဲ့ကြောင်း သိရသည်။

ထို့သို့ဆောင်ရွက်ပေးခဲ့ရာ ၎င်း၏ မိခင်ဖြစ်သူ ဒေါ်ခင်ပြုံးအတွက် ချာချင်ဆောင်မြို့ လူမှုဖူလုံရေးရုံးမှ နစ်နာကြေးငွေ ဘတ်(၁,ဝ၁၇,၂၄၄ ဒသမ ၂၂) သန်းတိတိအား ပြီးခဲ့သည့် အောက်တိုဘာ (၄)ရက် နှင့် (၁၂)ရက် တို့တွင် အသီးသီးပေးအပ်ခဲ့ကြောင်း သိရသည်။

အဆိုပါ နစ်နာကြေးငွေများကို အလုပ်သမားသံအရာရှိရုံးမှ မိခင်ဖြစ်သူ ဒေါ်ခင်ပြုံး၏ လက်ထဲသို့ ယမန်နေ့ (အောက်တိုဘာ ၁၉ ရက်) တွင် ပေးအပ်ခဲ့ကြောင်း  ထုတ်ပြန်ချက်အရ သိရသည်။

ထိုင်းနိုင်ငံတွင် အလုပ်လုပ်ကိုင်လျက်ရှိနေသည့် မြန်မာအလုပ်သမားများအနေဖြင့် သက်ဆိုင်ရာလုပ်ငန်းခွင်၏ ဘေးအန္တရာယ်ကင်းရှင်းရေးဆိုင်ရာ စည်းကမ်းချက်များအား လိုက်နာဆောင်ရွက်ကြရန်လည်း အလုပ်သမား သံအရာရှိရုံးမှ အသိပေးတိုက်တွန်းထားသည်။