Pearl (NSS) - အောက်တိုဘာ ၁၄

ကော့ကရိတ်မြို့၌ ကျောင်းသား၊သူများ စာမေးပွဲဖြေဆိုပြီး ပြန်လာစဉ် KKO (ခွဲထွက်) နှင့် PDF အဖွဲ့ဝင်တို့ Drone ဖြင့် ဗုံးများပစ်ချတိုက်ခိုက်မှုကြောင့် ကျောင်းသူတစ်ဦးသေဆုံး၊ (၃)ဦး ထိခိုက်ဒဏ်ရာရရှိခဲ့ကြောင်း နစက မှ သတင်းထုတ်ပြန်ထားသည်။

ဖြစ်စဉ်မှာ ယမန်နေ့(အောက်တိုဘာ ၁၃ ရက်)၊ နေ့လည်ပိုင်းတွင် ကရင်ပြည်နယ်၊ ကော့ကရိတ်မြို့၌ အထက်ပါကဲ့သို့ဖြစ်ပွားခဲ့ကြောင်း သိရသည်။ 

ကော့ကရိတ်မြို့၊ အမှတ်(၂)ရပ်ကွက်ရှိ အခြေခံပညာအထက်တန်းကျောင်း(ခွဲ)၌ ကျောင်းသား၊ ကျောင်းသူများ နှစ်ဝက်စာမေးပွဲဖြေဆိုပြီး ပြန်လည်ထွက်ခွာလာစဉ် ယနေ့ မွန်းလွဲပိုင်းတွင် KKO (ခွဲထွက်)အဖွဲ့ နှင့် PDF အဖွဲ့ဝင် များက Drone များ အသုံးပြု၍ ဗုံးသီးများပစ်ချတိုက်ခိုက်ခဲ့ကြောင်း သိရသည်။

ထိုသို့ ပစ်ချတိုက်ခိုက်မှုကြောင့် ကျောင်းသူ ၁ ဦးသေဆုံးခဲ့ပြီး ကျောင်းသူ ၃ ဦးတို့တွင် ဗုံးစထိမှန်ဒဏ်ရာများ ရရှိခဲ့ပြီး ဒဏ်ရာရရှိသူများမှာ စိုးရိမ်ဖွယ်ရာအခြေအနေရှိကြောင်း သိရသည်။ 

ထိုသို့လာရောက်ပစ်ခတ်တိုက်ခိုက်ခဲ့ခြင်းသည် ဂျီနီဗာကွန်ဗန်းရှင်းများနှင့် အပြည်ပြည်ဆိုင်ရာဥပဒေတို့အရ စစ်ရာဇဝတ်မှု (War Crime) ကို ကျူးလွန်ခြင်းဖြစ်ပြီး ကျူးလွန်သူများအား လုံခြုံရေးတပ်ဖွဲ့ဝင်များအနေဖြင့် လိုအပ်သည့်တုန့်ပြန်မှုများကို ဆက်လက်ဆောင်ရွက်သွားမည်ဖြစ်ကြောင်း နစကမှ သတင်းထုတ်ပြန်ထားသည်။