ဂျန်ဇက် (NSS) - စက်တင်ဘာ ၇

ထိုင်းပညာရေးဝန်ကြီးဌာနသည် ဆူရက်ဌာနီပြည်နယ်တွင် တရားမဝင်ဖွင့်လှစ်ထားသည့် မြန်မာဘာသာစကားဖြင့် သင်ကြားသော ပညာသင်ကြားရေးစင်တာ (၆)ခုကိုပိတ်သိမ်းရန် အမိန့်ထုတ်ပြန်လိုက်ကြောင်းသိရသည်။

ဆူရက်ဌာနီပြည်နယ်အာဏာပိုင်များသည် ပြည်နယ်အတွင်းတရားမဝင် ဖွင့်လှစ်ထားသည့်မြန်မာဘာသာဖြင့် သင်ကြားနေသည့် စင်တာများကို ပိတ်သိမ်းရန် မကြာခဏ ညွှန်ကြားခဲ့သော်လည်း တရားမဝင် ဆက်လက်ဖွင့်လှစ်ထားဆဲဖြစ်ကြောင်း၊ လက်ရှိအချိန်တွင်လည်း မြန်မာဘာသာစကားဖြင့်သင် ကြားသောစင်တာများပိတ်သိမ်းရန် ထပ်မံညွှန်ကြားခဲ့ခြင်းဖြစ်ကြောင်း

သိရသည်။ မကြာသေးမီကလူမှုကွန်ရက်တွင် ပျံ့နှံခဲ့သော ရုပ်သံဖိုင်ထဲတွင် အဆိုပါစာသင်ကျောင်းများ၌ နိုင်ငံတော်သီချင်းဆိုရာတွင် အငြင်းပွားမှုများရှိလာခဲ့ပြီးနောက် တိုင်တန်းမှုများဖြစ်ပွားခဲ့ရာမှ ထိုင်းပညာရေးဝန်ကြီးဌာနကဆူရက်ဌာနီပြည်နယ်အာဏာပိုင်များကို စုံစမ်းစစ်ဆေးရန် နှင့် တရားမဝင်ဖွင့်လှစ်ထားသောစင်တာများ ပိတ်သိမ်းရန်ညွှန်ကြားခဲ့ကြောင်းသိရသည်။

အဆိုပါရုပ်သံဖိုင်တွင် နိုင်ငံတော်သီချင်းဆိုရာမှာ မြန်မာနိုင်ငံတော်သီချင်းကို သီဆိုခဲ့ပြီး အခြားထိုင်းကျောင်းသားများအပေါ်သက်ရောက်မှုများရှိလာမည်ကို စိုးရိမ်သည့်အတွက် တိုင်တန်းမှုများရှိလာခဲ့ကြောင်း ထိုင်းအခြေစိုက် သတင်းများတွင်ဖော်ပြထားသည်။ ထိုင်းပညာရေးဝန်ကြီးဌာနက မြန်မာ ဘာသာစကားဖြင့်သင်ကြားသော ပညာရေးစင်တာများ တရားမဝင်ဖွင့်လှစ်သင်ကြားခြင်းများသည် နိုင်ငံလုံခြုံရေးအတွက် စိုးရိမ်စရာအခြေအနေမျိုးဖြစ်လာနေသည်ဆိုသော တိုင်တန်းမှုများရှိနေကြောင်း ထုတ်ဖော်ပြောဆိုထားသည်။ ဆူရက်ဌာနီပြည်နယ် ဒုတိယအုပ်ချုပ်ရေးမှူးဖြစ်သူ Mr. Sukon Nuphakdi က ပြည်နယ်အတွင်း မြန်မာဘာသာစကားဖြင့်သင်ကြားသောစင်တာများကို အချိန်အတန်ကြာလျှို့ဝှက်ဖွင့်လှစ်သင်ကြားနေကြောင်း၊ ၎င်းတိုကို ပိတ်သိမ်းရန် မကြာခဏ အမိန့်ပေးခဲ့သော်လည်း လျှို့ဝှက်ဖွင့်လှစ်နေဆဲဖြစ်ကြောင်း၊ လက်ရှိအချိန်တွင် တိုင်တန်းမှုများရှိလာခဲ့ခြင်းကြောင့်  စစ်ဆေးမှုများနှင့်အတူ ပိတ်သိမ်းခြင်းများလုပ်ဆောင်ရမည်ဖြစ်ကြောင်း သတင်းစာရှင်းလင်းပွဲတွင် ပြောဆိုခဲ့သည်။

ဆူရက်ဌာနီပြည်နယ်ရှိ မြန်မာဘာသာစကားဖြင့်သင်ကြားသော ပညာရေးစင်တာများတွင် တက်ရောက်နေသည့်မြန်မာကလေးငယ်ပေါင်း (၁၁၀၀) ကျော်ရှိနေပြီး ထိုင်းပညာရေးဝန်ကြီးဌာနက သတ်မှတ်ထားသည့် ထိုင်းသင်ရိုးအတိုင်း သင်ကြားနေကြောင်းသိရသည်။ ထိုင်းအာဏာပိုင်များသည် လက်ရှိအချိန်တွင် Mittaye Learning Center ၊ Phowai Community နှင့် Wat Somwang Wanaram Community အဖွဲ့အစည်းများနှင့် ဆက်နွှယ်ဖွင့်လှစ်ထားသည့်  မြန်မာဘာသာစကားဖြင့်သင်ကြားနေသည့် စင်တာ ခြောက်ခုကို ပိတ်သိမ်းလိုက်ပြီဖြစ်ကြောင်း ဆူရက်ဌာနီပြည်နယ် ဒုတိယအုပ်ချုပ်ရေးမှူးက ပြောသည်။ 

အဆိုပါစာသင်ကျောင်းများတွင်သင်ကြားနေသည့် မြန်မာနိုင်ငံသား ဆရာမ (၂၄)ဦး၊ ထိုင်းဆရာမ (၆)ဦး နှင့် ကျောင်းအုပ်ကြီး၊ နေရာငှားရမ်းသူများကိုလည်း စုံစမ်းစစ်ဆေးကာ အရေးယူသွားဖွယ်ရှိနေကြောင်းသိရသည်။