မြူနစ် (NSS) - အောက်တိုဘာ ၆

ကချင်ပြည်နယ်၊ ပူတာအိုမြို့မှတစ်ဆင့် အဝေးသင်တက္ကသိုလ်တက်ရန် ထွက်ခွာလာသော ကျောင်းသား/သူများကို KIA ပူး ပေါင်းအဖွဲ့က ဖမ်းဆီးခေါ်ဆောင်မှု ဖြစ်ပွားခဲ့ကြောင်း သတင်းရရှိသည်။

မြစ်ကြီးနားမြို့နှင့် မန္တလေးမြို့တို့ရှိ အဝေးသင်တက္ကသိုလ်များ၌ တက်ရောက်ရန်အတွက် ပူတာအိုမြို့မှတစ်ဆင့် ထွက်ခွာလာသော ကျောင်းသား/သူများသည် ပူတာအို-မြစ်ကြီးနားကားလမ်းပေါ်၊ ဆွမ်ပရာဘွမ်မြို့နယ်အတွင်း၌ ဖမ်းဆီးခံခဲ့ရခြင်းဖြစ်ကြောင်း သိရသည်။

“အဲဒီလိုတားတယ်။ စစ်ဆေးတယ်။ ဖမ်းတယ် အဲဒီသတင်းတွေ ကျွန်တော်တို့ ကြားရတယ်။ အရေအတွက် အတိအကျတော့ ကျွန်တော် မသိပါဘူး။ အဲဒီလိုဖမ်းသွားတယ်လို့ သတင်းကြားရတယ်။ ဖမ်းတာတော့ KIA တို့၊ PDF တို့ပဲ ရှိမှာပဲ။ ပူတာအို-မြစ်ကြီးနားလမ်း၊ ဆွမ်ပရာဘွမ်မြို့နယ် ဒေသထဲမှာ ဖြစ်လိမ့်မယ်။ ကားလမ်းပေါ်မှာပဲ” ဟု ကချင်ပြည်နယ်အစိုးရအဖွဲ့၏ ပြောခွင့်ရ ဝန်ကြီးဦးဝင်းရဲထွန်းက NP News ကို ပြောသည်။

KIA ၊ PDF ပူးပေါင်းအဖွဲ့က ဖမ်းဆီးခေါ်ဆောင်သွားသည့် ကျောင်းသား၊ကျောင်းသူအရေအတွက် နှင့် အချိန်၊ နေ့ရက် တို့ကို တိတိကျကျမသိရှိရကြောင်း ဝန်ကြီး ဦးဝင်းရဲထွန်းက ဆက်လက်ပြောသည်။ 

“နောက် အဝေးသင်လာဖြေမယ့် ကျောင်းတွေအတွက်ကိုတော့ အစိုးရက လိုတဲ့ ဌာနဆိုင်ရာတွေ ပေါင်းစပ်ပြီးတော့ သူတို့ ကို ကူညီဖို့တော့ လုပ်နေပါတယ်” ဟု ၎င်းက ဆက်လက်ပြောသည်။

KIA ၊ PDF ပူးပေါင်းအဖွဲ့သည် ပြီးခဲ့သော အောက်တိုဘာ (၁)ရက်တွင် ပူတာအိုမှတဆင့် အဝေးသင် တက္ကသိုလ် တက်ရောက်ရန်  ထွက်ခွာလာသည့် ကျောင်းသား၊ ကျောင်းသူ (၃ဝ)ကျော်ကို ဆွမ်ပရာဘွမ်မြို့နယ်အတွင်း၌ ဖမ်းဆီးခေါ်ဆောင် သွားခြင်းဖြစ်ကြောင်း ကနဦးသတင်းများအရ ကြားသိရသည်။