မျိုးကြီး (NP News) - ဖေဖော်ဝါရီ ၂၁

မြန်မာနိုင်ငံတိုးတက်ရေးနှင့် မြန်မာ့တပ်မတော်၏ ရပ်တည်မှုအတွက် ရာသက်ပန်ကြိုးပမ်းဆောင်ရွက်သွားမည်ဖြစ်ကြောင်း ဂျပန်-မြန်မာချစ်ကြည်ရေးအသင်းဥက္ကဋ္ဌ မစ္စတာဝါတာနာဘေးက ပြောသည်။

နေပြည်တော်၌ ဖေဖော်ဝါရီလ ၂ဝ ရက်တွင် ကျင်းပသည့် ဂုဏ်ထူးဆောင်ဘွဲ့နှင့်စွမ်းဆောင်မှုဆိုင်ရာဘွဲ့တံဆိပ်များ ဂုဏ်ပြုချီးမြှင့်ခြင်းအခမ်းအနားတွင် ၎င်းက အထက်ပါကဲ့သို့ ပြောဆိုခဲ့ခြင်းဖြစ်ကြောင်း နစက၏ ထုတ်ပြန်ချက်တွင်ပါရှိသည်။

ဂျပန်ဝန်ကြီးချုပ်ဟောင်း နှင့် ဂျပန်-မြန်မာချစ်ကြည်ရေးအသင်းဥက္ကဋ္ဌတို့ကို ဂုဏ်ထူးဆောင်ဘွဲ့နှင့်စွမ်းဆောင်မှုဆိုင်ရာဘွဲ့တံ ဆိပ်များပေးအပ်ချီးမြှင့်ရန်အတွက် အခမ်းအနားဖြင့် နစကမှ ကျင်းပခဲ့ခြင်းဖြစ် သည်။

အဆိုပါအခမ်းအနားတွင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က နိုင်ငံတော်ဖွံ့ဖြိုးတိုးတက်ရေးနှင့်ငြိမ်းချမ်းသာယာဝပြောရေးအတွက် စွမ်းစွမ်းတမံပူးပေါင်းဆောင်ရွက်ခဲ့သည့် စွမ်းဆောင်မှုဆိုင်ရာဘွဲ့တံ ဆိပ်ရရှိခဲ့သော မစ္စတာဝါတာနာဘေးကို သီရိပျံချီဘွဲ့တံဆိပ်နှင့်အဆောင်အယောင်ကို ကိုယ်တိုင်ပေးအပ်ခဲ့သည်။

ထို့ပြင် နိုင်ငံတော်ဖွံ့ဖြိုးတိုးတက်ရေးနှင့်ငြိမ်းချမ်းသာယာဝပြောရေးအတွက် စွမ်းစွမ်းတမံပူးပေါင်းဆောင် ရွက်ခဲ့သောကြောင့် ဂုဏ်ထူးဆောင်ဘွဲ့တံဆိပ်ရရှိခဲ့သည့် ဂျပန်နိုင်ငံဝန်ကြီးချုပ်ဟောင်း Mr. Taro Aso အား သရေစည်သူဘွဲ့တံဆိပ် နှင့် အဆောင်အယောင်ကို ပေးအပ်ရာတွင် မစ္စတာဝါတာနာဘေးက ၎င်းကိုယ်စား လက်ခံရယူခဲ့ကြောင်း သိရသည်။

၎င်းအခမ်းအနားတွင် ဗိုလ်ချုပ်မှူးကြီးမင်းအောင်လှိုင်က ဂုဏ်ပြုစကားပြောရာတွင် ဂျပန်-မြန်မာချစ်ကြည်ရေးအသင်းဥက္ကဋ္ဌသည် မြန်မာနိုင်ငံဖွံ့ဖြိုးတိုးတက်ရေးနှင့် နှစ်နိုင်ငံချစ်ကြည်ရေးအတွက် နှစ်ပေါင်းများစွာဆောင်ရွက်ခဲ့သည့် မိတ်ဆွေကောင်းတစ်ဦးဖြစ်ကြောင်း ပြောဆိုထားသည်။

ထို့ပြင် မစ္စတာဝါတာနာဘေးသည် နှစ်နိုင်ငံတပ်မတော်နှစ်ရပ်အကြား ချစ်ကြည်ရင်းနှီးမှု၊ မြန်မာနိုင်ငံဖွံ့ဖြိုးတိုးတက်မှုနှင့် ဂျပန်နိုင်ငံမှ ရင်းနှီးမြှုပ်နှံမှုများ မြန်မာနိုင်ငံ၌ လာရောက်ဆောင်ရွက်နိုင်ရန်အတွက် ဆောင် ရွက်ပေးနိုင်ခဲ့သူဖြစ်ပြီး ၎င်းအနေဖြင့် ယခုထက်ပိုမိုဆောင်ရွက်နိုင်မည်ဟု ယုံကြည်ကြောင်းလည်း တပ်ချုပ်က ပြောဆိုခဲ့သည်။

ထို့နောက် မစ္စတာဝါတာနာဘေးကလည်း ဗိုလ်ချုပ်မှူးကြီးမင်းအောင်လှိုင်ကို ကျေးဇူးတင်ရှိကြောင်းနှင့် ဂျပန်နိုင်ငံမှ မြန်မာနိုင်ငံကို ဆက်လက်ကူညီဆောင်ရွက်ပေးလျက်ရှိကြောင်း၊ မြန်မာနိုင်ငံဖွံ့ဖြိုးတိုးတက်ရေးနှင့် မြန်မာ့တပ်မတော်၏ ရပ်တည်မှုအတွက် အသက်ရှင်သန်နေသည့်အချိန်အထိ ရာသက်ပန်ကြိုးပမ်းဆောင်ရွက်သွားမည်ဟု ပြန်လည်ပြောကြားခဲ့ကြောင်း နစက၏ ထုတ်ပြန်ချက်တွင် ဖော်ပြထားသည်။