NSS - စက်တင်ဘာ ၃၀

မန္တလေးတိုင်း၊ ချမ်းမြသာစည်မြို့နယ်ရှိ “ကြံတိုင်းအောင်” ကိုယ်ပိုင်အထက်တန်းကျောင်းကို PDFအဖွဲ့မှ ခြိမ်းခြောက်စာတစ်စောင် ပေးပို့ခဲ့ကြောင်း မြန်မာနိုင်ငံရဲတပ်က သတင်းထုတ်ပြန်ထားသည်။

အဆိုပါခြိမ်းခြောက်စာကို စက်တင်ဘာလ ၂၇ရက်၊ နံနက် ၆နာရီအချိန်တွင် ချမ်းမြသာစည်မြို့နယ်၊ ထွန်တုံးရပ်ကွက်၊ ၄၉လမ်း၊ ၁၁၁လမ်းနှင့် ၁၁၂လမ်းကြားရှိ ခြံဝန်းတစ်ခုအတွင်း၌ ပူးတွဲဖွင့်လှစ်ထားသည့် “ကြံတိုင်းအောင်” ကိုယ်ပိုင်အထက်တန်းကျောင်း၏ ဝင်ပေါက်ရှေ့၌ တွေ့ရှိခဲ့ခြင်းဖြစ်ကြောင်း သိရသည်။

၎င်းခြိမ်းခြောက်စာတွင် "ကြံတိုင်းအောင်"ကျောင်းအုပ်ကြီးအား ယာယီကျောင်းပိတ်ပေးရန်နှင့် ကျောင်းမပိတ်ပေးပါက ပညာသင်ယူနေသည့် ကျောင်းသား၊ ကျောင်းသူများ၏ လုံခြုံရေးကို တာဝန်ယူမည်မဟုတ်ကြောင်း ပါရှိသည်။

ထို့ပြင် ၎င်းတို့တောင်းဆိုမှုအား လက်မခံပါက လုံးဝတာဝန်ယူမည်မဟုတ်ကြောင်းလည်း အဆိုပါခြိမ်းခြောက်စာတွင် ထည့်သွင်းရေးသားထားကြောင်း ရဲတပ်ဖွဲ့က ထုတ်ပြန်ထားသည်။

အထက်ပါဖြစ်စဉ်မှ ခြိမ်းခြောက်စာပို့ခဲ့သည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်းလည်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။