သန့်ဇင်(NSS) - စက်တင်ဘာ ၃၀

ရန်ကုန်တိုင်း၊ လှည်းကူးမြို့နယ်တွင် BMWနှင့် CROWN အမျိုးအစားကား(၂)စီးပေါ်မှ ငွေကျပ်သိန်း(၆၀၀၀)တန်ဖိုးရှိ စိတ်ကြွရူးသွပ်ဆေးပြားများ (၄)သိန်း ဖမ်းဆီးရမိခဲ့ကြောင်း သိရသည်။

အဆိုပါမူးယစ်ဆေးဝါးများကို စက်တင်ဘာလ ၂၄ရက်၊ ည၈နာရီခွဲအချိန်တွင် လှည်းကူးမြို့နယ်၊ အမှတ်(၃)လမ်းဆုံတွင် ဖမ်းဆီးရမိခဲ့ခြင်းဖြစ်ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က အထက်ပါလမ်းဆုံတွင် ကြိုတင်သတင်းရရှိချက်အရ စောင့်ဆိုင်းနေစဉ် မဝတ်မှုန် မောင်းနှင်လာသည့် CROWN ကားပေါ်မှ ငွေကျပ်သိန်း (၆၀၀၀)တန်ဖိုးရှိ စိတ်ကြွရူးသွပ်ဆေးပြား (၄)သိန်းအား ဖမ်းဆီးရမိခဲ့ကြောင်း သိရသည်။

ထို့ပြင် ၎င်းကားနှင့်အတူကပ်ပါလာသည့် BMWကားပေါ်မှ ပိုင်းစိုး၊ ငြိမ်းချမ်းကျော်(ခ)ကိုမင်းနှင့် မသူဇာဝင်းတို့အား တွေ့ရှိခဲ့ပြီး ၎င်းတို့အား စစ်ဆေးချက်အရ ဖမ်းဆီးရမိမူးယစ်ဆေးဝါးများကို တောင်ကြီးမြို့မှ မြိတ်မြို့သို့ သယ်ဆောင်ရောင်းဝယ်ခြင်းဖြစ်ကြောင်း ရဲတပ်ဖွဲ့၏ထုတ်ပြန်ချက်တွင်ဖော်ပြထားသည်။

ထို့ကြောင့် ၎င်းတို့(၄)ဦးအား ဥပဒေအရအရေးယူထားပြီး ကွင်းဆက်များကို ဆက်လက်ဖော်ထုတ်လျက်ရှိကာ အမှုအတွင်း ဆက်စပ်ပါဝင်သည့် ငွေကြေးအကျိုးအမြတ်နှင့် ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေး ဆောင်ရွက်လျက်ရှိကြောင်း ရဲတပ်ဖွဲ့က သတင်းထုတ်ပြန်ထားသည်။