ရောင်နီ (NP News) - ဖေဖော်ဝါရိ ၁၈       

ရုရှား၊ တရုတ်နဲ့ တောင်အာဖရိကတို့ဟာ တောင်အာဖရိက အိန္ဒိယသမုဒ္ဒရာကမ်းလွန်မှာ ရေတပ်စစ်ရေး လေ့ကျင့်မှု ကို ဖေဖော်ဝါရီ ၁၇ ရက်မှာ စတင်ခဲ့ပြီး ယူကရိန်းကို ရုရှားက ကျူးကျော်မှုနဲ့ပတ်သတ်ပြီး တရုတ်နဲ့ အနောက်နိုင်ငံ များ ဆက်ဆံရေးတင်းမာနေချိန်မှာ သုံးနိုင်ငံ နီးကပ်သော ဆက်ဆံရေးကို သရုပ်ပြခဲ့ပါတယ်။ 

Mosi II  လို့ အမည်ပေးထားတဲ့ ယင်း ၁ဝ ရက်ကြာ စစ်ရေးလေ့ကျင့်မှုဟာ ဖေဖော်ဝါရီ ၂၄ ရက်၊ ရုရှားရဲ့ ယူကရိန်းကို ကျူးကျော်တဲ့ ပထမဆုံးနှစ်ပတ်လည်နေ့နဲ့လည်း တိုက်ဆိုင်မှာဖြစ်တယ်လို့ သိရပါတယ်။ ရုရှားဖရီးဂိတ်သင်္ဘော Admiral Gorshkov ဟာ ယခုသီတင်းပတ် အစောပိုင်းက ကိတ်တောင်း သို့ ရောက်ရှိလာခဲ့ပြီး ၄င်းရဲ့ဘေးနှစ်ဖက် မှာ ရုရှားရဲ့မျိုးချစ်သင်္ကေတဖြစ်တဲ့  "Z" နဲ့ "V" စာလုံးများ ချိတ်ဆွဲထားပါတယ်။ အဆိုပါပူးတွဲစစ်ရေး လေ့ကျင့်ခြင်း ကို ဆန့်ကျင်တဲ့ တောင်အာဖရိက ဆန္ဒပြသူတွေဟာ ဖေဖော်ဝါရီလ ၁၇ ရက်၊ သောကြာနေ့မှာ Cape Town ရှိ ရုရှားကောင်စစ်ဝန်ရုံးမှာ ဆန္ဒပြကြဖို့ ပြင်ဆင်နေပါတယ်။ 

စစ်ရေးလေ့ကျင့်ရေးအတွက် ရုရှား ရေတပ်ဗိုလ်ချုပ် ဂေါ့ရ်ှစတော့က ရေကြောင်းနဲ့ ကုန်းပေါ်ရှိ ပစ်မှတ်များကို တိုက်ခိုက်ရန်အတွက် နောက်ဆုံးပေါ် Zircon (အသံထက်မြန်သော ဒုံးကျည်များ) တပ်ဆင်လာခဲ့ပြီး အဆိုပါ စစ်သင်္ဘောဟာ ပူးတွဲရေတပ်စစ်ရေးလေ့ကျင့်မှုအတွင်း Zircon ဒုံးကျည်ကို စမ်းသပ်ပစ်လွှတ်ခဲ့ကြောင်း ရုရှားနိုင်ငံ ပိုင် သတင်းအေဂျင်စီ TASS က ဖော်ပြခဲ့ပါတယ်။ အဆိုပါစမ်းသပ်မှုဟာ နိုင်ငံတကာစစ်ရေးလေ့ကျင့်မှုမှာ ပထမဆုံး ပဲဖြစ်ပါတယ်။ စစ်ရေးလေ့ကျင့်မှုမှာ အဆိုပါ သင်္ဘောအပြင် ရေကြောင်းလေ့ကျင့်မှုမှာ ပါဝင်တဲ့  အခြားသင်္ဘော များမှာ ဆီဖြည့်ဖို့အတွက် ရုရှားရေနံတင်သင်္ဘောတစ်စင်း၊ တောင်အာဖရိက ဖရီးဂိတ်သင်္ဘောတစ်စင်းနဲ့ တရုတ် သင်္ဘောသုံးစင်းဖြစ်တဲ့ ဖျက်သင်္ဘော၊ ဖရီးဂိတ်သင်္ဘောတစ်စင်းနဲ့ ထောက်ပံ့ရေးသင်္ဘောတစ်စင်းတို့ ပါဝင်မှာ ဖြစ်ကြောင်း တောင်အာဖရိကစစ်တပ်က ထုတ်ပြန်ခဲ့ပါတယ်။ 

အဆိုပါရေကြောင်းလေ့ကျင့်မှုကို တောင်အာဖရိကနိုင်ငံ ကွာဇူလူနာတယ်လ်ပြည်နယ်ရှိ ဆိပ်ကမ်းများဖြစ်တဲ့ ဒါဘန်နဲ့ ရစ်ချက်ဘေးတို့မှာ ပြုလုပ်မှာဖြစ်တယ်လို့ သိရပါတယ်။ 

တောင်အာဖရိကဟာ စစ်ရေးလေ့ကျင့်မှုမှာ ပါဝင်ခြင်းအတွက် ပြည်တွင်းဝေဖန်မှုများနဲ့ ရင်ဆိုင်နေရပါတယ်။ တောင်အာဖရိကဟာ မော်စကိုနဲ့ ချစ်ကြည်ရင်းနှီးတဲ့ ဆက်ဆံရေးရှိတဲ့ အာဖရိကနိုင်ငံ အများအပြားမှာ ပါဝင်ပြီး ယူကရိန်းစစ်ပွဲမှာ ရုရှားကိုရှုတ်ချတဲ့ ကုလသမဂ္ဂဆုံးဖြတ်ချက်ကို မဲခွဲဆုံးဖြတ်ခြင်းမှ ရှောင်ကြဉ်ခဲ့တာဖြစ်ပါတယ်။