Pika (NSS) - စက်တင်ဘာ ၂၅

ချဲလ်ဆီးအသင်းသည် စက်တင်ဘာလ(၂၄)ရက် ညက အက်စတွန်ဗီလာအသင်းနှင့်ကစားခဲ့သော ပရီးမီးယားလိဂ်ပွဲ တွင် (၁)ဂိုး-ဂိုးမရှိဖြင့် ရှုံးနိမ့်ခဲ့ပြီးနောက် ချဲလ်ဆီးအသင်းကစားသမားများသည် အသင်းလိုက် စုစည်းညီညွတ်မှုများ၊ ပူးပေါင်းဆောင်ရွက်မှုများကို ပိုမိုကောင်းမွန်အောာင် လုပ်ဆောင်ရန်လိုအပ်ကြောင်း နည်းပြ ပိုချက်တီနို က ပြောခဲ့သည်။

ချဲလ်ဆီးအသင်းသည် နောက်ဆုံးကစားခဲ့သည့် ကစားပွဲသုံးပွဲတွင် ဂိုးသွင်းနိုင်ခြင်းမျိုးမရှိသည့်အပြင် ပရီးမီးယား လိဂ်ပြိုင်ပွဲ(၆)ပွဲတွင် တစ်ပွဲသာအနိုင်ရရှိကာ အမှတ်ပေးဇယားမှာ နံပါတ်(၁၄)တွင် ရပ်တည်နေကြောင်း သိရသည်။ 

ချဲလ်ဆီးအသင်းသည် ၂ဝ၂၃-၂ဝ၂၄ ပရီးမီးယားလိဂ်ရာသီကို ဆိုးရွားသောပုံစံမျိုးဖြင့် စတင်ခဲ့ပြီး ၁၉၇၈ ခုနှစ် နောက်ပိုင်း အဆိုးရွားဆုံးရာသီအစတစ်ခုဖြစ်ကြောင်းလည်း သိရသည်။ နည်းပြပိုချက်တီနို က "ကျွန်တော်တို့ဟာ တစ်ယောက်ချင်းပုံစံမျိုးနဲ့မဟုတ်ဘဲ အသင်းလိုက်ပူးပေါင်းဆောင်ရွက်မှုတွေကို ပိုမိုလုပ်ဆောင်ဖို့လိုအပ်ပါတယ်။ ကျွန်တော်တို့ အကောင်းဆုံးယှဉ်ပြိုင်ကစားပြီး အနိုင်ရရှိမှုကို လိုချင်ကြပါတယ်။ ဒါပေမယ့် ကစားသမားတွေဟာ ငယ်ရွယ်နေတဲ့အချိန်မှာ သင်ယူတာမျိုးတွေနဲ့ အတွေ့အကြုံတွေရှိဖို့လည်း လိုအပ်ပါတယ်။ ကျွန်တော်တို့ အမှားတွေလည်း လုပ်ခဲ့မိပါတယ်။ ဒီလိုအခြေအနေတွေ အများကြီးရှိခဲ့လို့ ကျွန်တော်စိတ်ပျက်မိပါတယ်" ဟု ပြောခဲ့သည်။ 

ချဲလ်ဆီးအသင်းသည် လာမည့်စက်တင်ဘာလ(၂၈)ရက်တွင် ဘရိုက်တန်အသင်း နှင့် ခါရာဘောင်ဆုဖလားပြိုင်ပွဲ ကို ယှဉ်ပြိုင်ကစားရမည်ဖြစ်ပြီး အောက်တိုဘာလ(၂)ရက်တွင် ဖူလ်ဟမ်အသင်း နှင့် ပရီးမီးယားလိဂ်ပြိုင်ပွဲကို အကြိတ်အနယ် ယှဉ်ပြိုင်ကစားရမည်ဖြစ်သည်။