သန့်ဇင်(NSS) - စက်တင်ဘာ ၂၅

တရုတ်နိုင်ငံက အိမ်ရှင်အဖြစ်လက်ခံကျင်းပလျက်ရှိသည့် (၁၉)ကြိမ်မြောက် အာရှအား ကစားပွဲတော်တွင် ဒုတိယအဆင့် တက်လှမ်းနိုင်ခဲ့သည့် မြန်မာလက်ရွေးစင် ယူ -၂၄ အသင်းအား နစကဥက္ကဋ္ဌ နှင့် မြန်မာနိုင်ငံဘောလုံးအဖွဲ့ချုပ်က ဆုငွေများချီးမြှင့်ခဲ့ကြောင်း သိရသည်။

မြန်မာနိုင်ငံဘောလုံးအဖွဲ့ချုပ်က ယနေ့ (စက်တင်ဘာလ ၂၅ ရက်)တွင် အထက်ပါကဲ့သို့ ထုတ်ပြန်လိုက်ခြင်းဖြစ်သည်။

မြန်မာယူ - ၂၄ အသင်းအနေဖြင့် အုပ်စုပွဲ(က)တွင် တရုတ်၊ အိန္ဒိယ၊ ဘင်္ဂလားဒေ့ရှ်တို့နှင့်တစ်အုပ်စုတည်းကျရောက်ကစားခဲ့ပြီး (၁)ပွဲနိုင်၊ (၁)ပွဲသရေ၊ (၁)ပွဲရှုံး ရမှတ် (၄)မှတ်ဖြင့် အကောင်းဆုံးအုပ်စု တတိယနေရာမှ ဒုတိယအဆင့် (၁၆)သင်းရှုံးထွက်အဆင့်သို့ တက်လှမ်းနိုင်ခဲ့ခြင်းဖြစ်သည်။

ထို့ကြောင့် မြန်မာလက်ရွေးစင်ယူ-၂၄ အသင်းအား နိုင်ငံတော်စီမံအုပ်ချုပ်ရေးကောင်စီဥက္ကဋ္ဌမှ အမေရိကန်ဒေါ်လာ(၅၀၀၀)နှင့် မြန်မာနိုင်ငံဘောလုံးအဖွဲ့ချုပ်(MFF)မှ ကျပ်သိန်း(၅၀၀) ဆုငွေများချီးမြှင့်ခဲ့ကြောင်း သိရသည်။

အာရှအားကစားပွဲတော် ဘောလုံးပြိုင်ပွဲသမိုင်းတစ်လျောက်၌ မြန်မာနိုင်ငံသည်ချန်ပီယံ (၂) ကြိမ်၊ တတိယ တစ်ကြိမ်ရရှိခဲ့ဖူးပြီး ၁၉၇၄ ခုနှစ်နောက်ပိုင်းမှစတင်ကာ အုပ်စု မတက်နိုင်ခဲ့ဘဲ ယခုနှစ်ပြိုင်ပွဲမှ ဒုတိယအဆင့်သို့ ပြန်လည်ရောက်ရှိလာနိုင်ခဲ့ခြင်းဖြစ်ကြောင်း သိရသည်။

မြန်မာယူ-၂၄ အသင်းအနေဖြင့် ဒုတိယအဆင့်ရှုံးထွက်ပွဲစဉ်အား လာမည့်စက်တင်ဘာလ ၂၈ ရက်တွင် ဂျပန်အသင်း သို့မဟုတ် ပါလက်စတိုင်းအသင်းတို့နှင့် ယှဉ်ပြိုင်ကစားရမည်ဖြစ်ကြောင်း သိရသည်။