Pika (NSS) - စက်တင်ဘာ ၂၃

မော်ရိုကိုနိုင်ငံတွင် လှုပ်ခတ်ခဲ့သော ပြင်းအား(၇)မဂ္ဂနီကျုအဆင့်ရှိ ငလျင်ကြောင့် High Atlas တောင်တန်းဒေသများတွင် ရွာပေါင်း(၂၉၃၀) ပျက်စီးခဲ့ပြီး လူပေါင်း(၂ ဒသမ ၈)သန်းခန့် ငလျင်ဘေးသင့်ခဲ့ကြောင်း မော်ရိုကိုနိုင်ငံ ဘဏ္ဍာရေးဝန်ကြီး Faouzi Lekjaa က ထုတ်ဖော်ပြောဆိုခဲ့သည်။

မော်ရိုကိုနိုင်ငံတွင် စက်တင်ဘာလ(၈)ရက်က လှုပ်ခတ်ခဲ့သော ငလျင်ကြောင့် လူပေါင်း(၂၉၀၀)ကျော် သေဆုံးခဲ့ပြီး အများစုမှာ သွားလာရခက်ခဲသော တောင်ပေါ်ဒေသများတွင်ဖြစ်ကြောင်းသိရသည်။ အဆိုပါငလျင်လှုပ်ခတ်မှုကြောင့် နေအိမ်ပေါင်း(၅၉၆၇၄)လုံးပျက်စီးခဲ့ပြီး ၎င်းတို့အားလုံးအနက် (၃၇)ရာခိုင်နှုန်းမှာ လုံးဝပြိုကျပျက်စီးသွားခဲ့ကြောင်း Faouzi Lekjaa ကပြောကြားခဲ့သည်။ မော်ရိုကိုအစိုးရသည် ငလျင်ဒဏ်သင့် အိမ်ထောင်စုများကို တစ်နှစ်တာအတွက် လစဉ်ထောက်ပံ့ငွေအဖြစ် မော်ရိုကိုနိုင်သုံး ငွေကြေး dirham(၂၅၀၀)၊ လုံးဝပြိုကျပျက်စီးသွားသော အိမ်များအတွက် ထောက်ပံ့ငွေ dirham (၁၄၀၀၀၀)နှင့် အနည်းငယ်ထိခိုက်ပျက်စီးသွားသော နေအိမ်ပိုင်ဆိုင်သူများအတွက် dirham (၈၀၀၀၀)ပေးအပ်သွားမည်ဖြစ်ကြောင်းလည်း သိရသည်။

မော်ရိုကိုနိုင်ငံတွင် လှုပ်ခတ်ခဲ့သော ငလျင်ကြောင့် ရှေးဟောင်း နှင့် ဘာသာရေးအဆောက်အဦးများ၊အထင်ကရ အဆောက်အဦးများနှင့် နေအိမ်အများအပြား ပျက်စီးခဲ့ကြောင်းလည်း သိရသည်။ မော်ရိုကိုအစိုးရသည် အခြေခံအဆောက်အဦးများ အဆင့်မြှင့်တင်မှုအပါအဝင် ပြန်လည်တည်ဆောက်ရေးအစီအစဉ်များအတွက် dirham(၁၂၀)ဘီလျံ သုံးစွဲသွားရန် စီစဉ်ထားကြောင်း သိရသည်။ မော်ရိုကိုနိုင်ငံရှိ ငလျင်ဘေးဒဏ်သင့်ဒေသများသည် အဆင်းရဲဆုံးဒေသများဖြစ်ပြီး ဝေးလံခေါင်သီသော နေရာများတွင်ရှိသည့် ကျေးရွာအများအပြားတွင် လမ်းများပျက်စီးခြင်းနှင့် အကူအညီများ မရရှိခြင်းတို့ကို ကြုံတွေ့နေရကြောင်းသိရသည်။