ယွန်း (NSS) - စက်တင်ဘာ ၂၂

ပုဂ္ဂလိကကျောင်းများတွင် နေ့စဥ်နိုင်ငံတော်အလံအလေးပြုခြင်း နှင့် နိုင်ငံတော်သီချင်းသီဆိုခြင်းတို့ကို မပျက်မကွက်ဆောင်ရွက်ရန် ပညာရေးဝန်ကြီးဌာန ဒုဝန်ကြီးမှ အသိပေးပြောထားသည်။

ပညာရေးဝန်ကြီးဌာန၊ ဒုတိယဝန်ကြီး ဒေါက်တာဇော်မြင့်က စက်တင်ဘာ(၂၁)ရက်တွင် ရန်ကုန်မြို့ ကမာရွတ် မြို့နယ် သထုံလမ်းရှိ အဆင့်မြင့်ပညာဦးစီး ဌာနအစည်းအဝေးခန်းမ၌ ပုဂ္ဂလိကကျောင်း တည်ထောင်သူများ၊ ကျောင်းအုပ်ကြီးများနှင့်တွေ့ဆုံစဥ် အထက်ပါကဲ့သို့ ပြောခဲ့ခြင်းဖြစ်သည်။

ပုဂ္ဂလိကကျောင်းများအနေဖြင့် နေ့စဥ်နိုင်ငံတော်အလံအလေးပြုခြင်း၊ နိုင်ငံတော်သီချင်း သီဆိုခြင်းတို့ကို မပျက်မကွက်ဆောင်ရွက်ရန် ဒုဝန်ကြီးက အသိပေးပြောကြားထားသည်။

ထို့ပြင် ပြည်ထောင်စုစိတ်ဓာတ်ရှင်သန်စေရန်နှင့် မြန်မာ့ယဥ်ကျေးမှု မပျက်စီးစေရန်အတွက် မြန်မာစာ၊ မြန်မာ့ သမိုင်းနှင့် မြန်မာ့ပထဝီဝင်ဘာသာရပ်များကို ဥပဒေနှင့်အညီ သင်ကြားရန် ဆက်လက်ပြောသည်။

ပုဂ္ဂလိကအခြေခံပညာ သင်ရိုးသင်ကျောင်းများ၊ နိုင်ငံတကာသင်ရိုးညွှန်းတမ်းသင် အခြေခံပညာကျောင်းများ အားလုံးကျောင်းဖွင့်ရက်၊ ကျောင်းပိတ်ရက်၊ စာမေးပွဲကျင်းပရက်များကိုလည်း နိုင်ငံတော်ကဖွင့်လှစ်သည့် ကျောင်းများနှင့်အညီ တစ်ပြေးညီတူညီရမည်ဖြစ်ကြောင်း ၎င်းက ပြောသည်။

အလားတူ တစ်နိုင်ငံလုံးရှိ အခြေခံပညာကျောင်းများအားလုံး တစ်ပြေးညီဝါတွင်းကာလ၌ ဥပုသ် တနင်္ဂနွေနေ့တွင် ကျောင်းပိတ်ရန် ဒေါက်တာဇော်မြင့်က အသိပေးပြောထားသည်။

ထို့ပြင် ပုဂ္ဂလိကကျောင်းများ၌ နိုင်ငံတော်အလံ အလေးပြုခြင်းရှိ၊ မရှိအပါအဝင် သတင်းအချက်အလက်များကို ကွင်းဆင်းစစ်ဆေးကောက်ယူရန် နစက၏ ပညာရေးဝန်ကြီးဌာနက အဖွဲ့(၂)ဖွဲ့ကို ဖွဲ့စည်းထားကြောင်း ပြီးခဲ့သည့် သြဂုတ်လက ဝန်ကြီးဌာန၏ သတင်းအချက်အလက်များအရ သိရသည်။