Pika (NSS) - စက်တင်ဘာ ၂၁ 

အဇာဘိုင်ဂျန်အစိုးရသည် အာမေးနီးယားလူမျိုး အများဆုံးနေထိုင်သော Nagorno-Karabakh ဒေသကို စစ်ဆင် ရေးများ စတင်လုပ်ဆောင်ပြီးနောက် တစ်ရက်အကြာတွင် သေဆုံးသူဦးရေမှာ အနည်းဆုံးလူ(၂၀၀)ရှိခဲ့ပြီး အခြား လူ (၄ဝဝ)ကျော် ထိခိုက်ဒဏ်ရာရရှိခဲ့ကြောင်း သိရသည်။ 

Nagorno-Karabakh ဒေသ လူ့အခွင့်အရေးစောင့်ကြည့်လေ့လာသူ Gegham Stepanyan က "အဇာဘိုင်ဂျန် အစိုးရရဲ့စစ်ဆင်ရေးတွေကြောင့် အနည်းဆုံးလူ(၂ဝဝ)သေဆုံးခဲ့ပြီး အခြားလူ(၄ဝဝ)ကျော် ထိခိုက်ဒဏ်ရာရရှိခဲ့ပါ တယ်၊၊ သေဆုံးသူတွေထဲမှာ အနည်းဆုံး(၁၀)ဦးက အရပ်သားတွေဖြစ်ပြီး ၎င်းတို့ထဲက(၅)ဦးမှာ ကလေးတွေ ဖြစ်ပါတယ်" ဟု ပြောခဲ့သည်။ 

အဇာဘိုင်ဂျန်သမ္မတ Ilham Aliyev သည် ၎င်းတို့ဖက်မှ အသေအပျောက်စာရင်းနှင့်ပတ်သက်သည့် အသေးစိတ် အချက်အလက်များကို အတိအကျ ထုတ်ပြန်ပြောကြားခြင်းမျိုးမရှိဘဲ  အဆိုပါစစ်ဆင်ရေးအတွင်း ၎င်း၏ စစ်သား အချို့သေဆုံးခဲ့ပြီး အချို့ထိခိုက်ဒဏ်ရာရရှိခဲ့သည်ဆိုသည့်အချက်ကိုသာ ပြောကြားခဲ့ကြောင်း သိရသည်။ 

ထို့အပြင် စက်တင်ဘာလ(၁၉)ရက်က Nagorno-Karabakh ဒေသတွင် ရုရှား၏ ငြိမ်းချမ်းရေးထိန်းသိမ်းရေး အဖွဲ့ တစ်ဖွဲ့သည် ၎င်းတို့စီးလာသောယာဉ်ကို လက်နက်များဖြင့် ပစ်ခတ်ခံရမှုကြောင့် သေဆုံးသွားခဲ့ကြောင်း ရုရှား ကာကွယ်ရေးဝန်ကြီးဌာနက ပြောကြားခဲ့သည်။ 

ရုရှား၏ ငြိမ်းချမ်းရေးတပ်ဖွဲ့သည် စောင့်ကြည့်ရေးစခန်းသို့ ပြန်လာစဉ်အချိန်အတွင်း အမည်မသိအကြမ်းဖက် သမားများက ၎င်းတို့စီးလာသောကားကို တိုက်ခိုက်ခဲ့ခြင်းဖြစ်ကြောင်း ရုရှားကာကွယ်ရေးဝန်ကြီးဌာန က ပြောကြားခဲ့သည်။ အဆိုပါ တိုက်ခိုက်ခံရမှုအတွင်း ကားပေါ်ပါလူအားလုံးသေဆုံးသွားခဲ့ကြောင်း ရုရှား ကာကွယ်ရေးဝန်ကြီးဌာနက ပြောကြားခဲ့သော်လည်း သေဆုံးသူအရေအတွက် အတိအကျကို ထုတ်ပြန်ပြောကြား ခြင်းမျိုး မရှိကြောင်း သိရသည်။ 

ရုရှား နှင့် အဇာဘိုင်ဂျန်စုံစမ်းစစ်ဆေးရေးမှူးများသည် အခင်းဖြစ်ပွားရာနေရာသို့သွားရောက်ကာ စုံစမ်းစစ်ဆေးမှုများကို ဆက်လက်လုပ်ဆောင်လျက်ရှိကြောင်းလည်း သိရသည်။