Pika (NSS) - စက်တင်ဘာ ၂ဝ

အာဆင်နယ်အသင်းသည် ခြောက်နှစ်ကြာပြီးမှ ချန်ပီယံလိဂ်သို့ ပြန်လည်ရောက်ရှိလာခဲ့ပြီးနောက် အသင်းကစားသမားများကို အကောင်းဆုံးဖြစ်အောင် ခြေစွမ်းပြကစားကြရန် နည်းပြအာတီတာက တိုက်တွန်းတောင်းဆိုခဲ့ ကြောင်း သိရသည်။

အာဆင်နယ်အသင်းသည် စက်တင်ဘာလ(၂ဝ)ရက် ညတွင်  PSV အသင်း နှင့် ချန်ပီယံလိဂ်ပွဲစဉ်ကို အကြိတ် အနယ်ယှဉ်ပြိုင် ကစားရမည်ဖြစ်သည်။ PSV အသင်း နှင့် ကစားမည့်ပွဲတွင် အာဆင်နယ်အသင်းသည် အိမ်ကွင်း ကစားရမည်ဖြစ်ပြီး  ချန်ပီယံလိဂ်ပွဲစဉ်ကို ၂ဝ၁၇ ခုနှစ်နောက်ပိုင်း အိမ်ရှင်အဖြစ် ပထမဆုံးအကြိမ် လက်ခံကျင်းပ ခြင်းဖြစ်ကြောင်းလည်း သိရသည်။

အဆိုပါပွဲစဉ်သည် နည်းပြအာတီတာ၏ အာဆင်နယ်နည်းပြအဖြစ် ချန်ပီယံလိဂ်ပွဲစဉ်ကို ပထမဆုံး တာဝန်ယူရမည့် ကစားပွဲလည်းဖြစ်ကြောင်းလည်း သိရသည်။ အာတီတာက "ကျွန်တော်တို့ ချန်ပီယံလိဂ်ပွဲစဉ်ကို ကစားဖို့အတွက် အများကြီးဖြတ်ကျော်လာခဲ့ရပြီးပါပြီ။ ကျွန်တော် အာဆင်နယ်အသင်းမှာ ကစားခဲ့ဖူးပြီး အမှတ်တရတွေလည်း ရှိခဲ့ပါတယ်" ဟု ပြောခဲ့သည်။

ထို့အပြင် ချန်ပီယံလိဂ်တွင် ပြန်လည်ကစားရခြင်းအတွက် ဂုဏ်ယူကာ စိတ်လှုပ်ရှားမိကြောင်း နည်းပြအာတီတာက ထုတ်ဖော်ပြောခဲ့သည်။ 

အာတီတာက "တကယ်ကို ဂုဏ်ယူပြီး စိတ်လှုပ်ရှားမိပါတယ်။ ချန်ပီယံလိဂ်မှာ မကစားခဲ့ရတာ အချိန်အတော်ကြာပြီဖြစ်ပြီး ဒီပွဲက ကျွန်တော့်အတွက် အာဆင်နယ်နည်းပြအဖြစ် ပထမဆုံးတာဝန်ယူဖူးတဲ့ ချန်ပီယံလိဂ်ပွဲပါ။ ကျွန်တော်တို့ အများကြီးကြိုးစားခဲ့ရပြီး နောက်ဆုံးမှာတော့ ချန်ပီယံလိဂ်မှာ ပြန်ကစားခွင့် ရခဲ့ပါပြီ။ ကျွန်တော်တို့အကောင်းဆုံးဖြစ်အောင် ခြေစွမ်းပြကစားသွားမှာပါ" ဟု ပြောခဲ့သည်။