Pika (NSS) - စက်တင်ဘာ ၁၆

ဘာစီလိုနာအသင်း တာဝန်ရှိသူများနှင့် နည်းပြဇာဗီတို့သည် ၎င်း၏စာချုပ်သက်တမ်းကို ထပ်မံတိုးရန်အတွက် သဘောတူညီမှုရရှိခဲ့ကြောင်းသိရသည်။

ဘာစီလိုနာအသင်းနည်းပြဇာဗီသည် ရီးရဲလ်ဘက်တစ်အသင်းနှင့်ကစားမည့် လာလီဂါပွဲစဉ်မတိုင်မီ ၎င်းနှင့် ဘာစီလိုနာအသင်းတို့၏စာချုပ်သက်တမ်းတိုးရန် သဘောတူညီမှုရရှိခဲ့ခြင်းကို အတည်ပြုပြောဆိုခဲ့ခြင်းဖြစ်ကြောင်းသိရသည်။

ဇာဗီက "ဘာစီလိုနာအသင်းမှာ နည်းပြအဖြစ် တာဝန်ယူရတာကို ပျော်ပါတယ်။ စာချုပ်သက်တမ်းတိုးဖို့အတွက် အသင်းတာဝန်ရှိသူတွေက ဆက်လက်လုပ်ဆောင်နေပါတယ်။ကျွန်တော့်ရဲ့စာချုပ်သက်တမ်းအသစ်ကို လာမယ့်ရက်ပိုင်းအတွင်းမှာ ထုတ်ပြန်ကြေညာသွားနိုင်ဖွယ်ရှိနေပါတယ်။ ဒီနှစ်မှာ ကျွန်တော့်ကို ပြစ်တင်ဝေဖန်ပြောဆိုမှုတွေ အများအပြားကို ခံခဲ့ရပါတယ်။ ဒါပေမယ့်လည်း ကျွန်တော်က နည်းပြအဖြစ် ဆက်လက်တာဝန်ယူဖို့ ရွေးချယ်ခံနေရတုန်းပါပဲ"ဟု ပြောဆိုခဲ့သည်။

ဘာစီလိုနာအသင်းသည် စက်တင်ဘာလ(၁၆)ရက်ညတွင် ရီးရဲလ်ဘက်တစ်အသင်းနှင့် လာလီဂါပွဲစဉ်ကို အကြိတ်အနယ်ယှဉ်ပြိုင် ကစားရမည်ဖြစ်ကြောင်းလည်းသိရသည်။