ဂျန်ဇက် (NSS) - စက်တင်ဘာ ၁၃ 

မြန်မာနိုင်ငံ နဲ့ ရုရှားနိုင်ငံတို့ဟာ ရွေးကောက်ပွဲဆိုင်ရာလုပ်ငန်းများကို ပူးပေါင်းဆောင်ရွက်ဖို့ နားလည်မှုစာချွန်လွှာ လက်မှတ်ရေးထိုးခဲ့ကြောင်း သိရပါတယ်။

အမေရိကန်ဦးဆောင်တဲ့အနောက်အုပ်စုနိုင်ငံတွေဟာ မြန်မာနိုင်ငံမှာကျင်းပမယ့် ရွေးကောက်ပွဲက လွှတ်လပ်မျှတ မှု ရှိမှာ မဟုတ်ကြောင်း ဝေဖန်နေပါတယ်။ ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးသိန်းစိုး ဦးဆောင်တဲ့ ကိုယ်စားလှယ်အဖွဲ့ဟာ စက်တင်ဘာ ၆ ရက်က ၁၂ ရက်အထိ ရုရှားနိုင်ငံကို သွားရောက်ချိန်အတွင်း ရွေးကောက်ပွဲဆိုင်ရာလုပ်ငန်းများ ပူးပေါင်းဆောင်ရွက်သွားနိုင်ရေးအတွက် နားလည်မှုစာချွန်လွှာတစ်ရပ်ကို စက်တင်ဘာ ၇ ရက်က ရုရှားနိုင်ငံ မော်စကိုမြို့ရှိ ဗဟိုရွေးကောက်ပွဲကော်မရှင်ရုံးမှာ လက်မှတ်ရေးထိုးခဲ့တာ ဖြစ်ပါတယ်။ 

ရုရှားနိုင်ငံ နဲ့ ဆက်ဆံရေးတိုးမြှင့်ဆောင်ရွက်နိုင်မယ့် နည်းလမ်းများ၊ မဲဆန္ဒရှင်အသိပညာပေးလုပ်ငန်းများနဲ့ မီဒီယာ ကို စနစ်တကျအသုံးပြုဆောင်ရွက်နိုင်မယ့်နည်းလမ်းများ၊ ရွေးကောက်ပွဲမှာ နည်းပညာအကူအညီရယူပြီး ပွင့်လင်း မြင်သာမှုရှိစွာ ဆောင်ရွက်နိုင်မည့်နည်းလမ်းများ၊ နှစ်နိုင်ငံအကြား အသိပညာရှင်၊ အတတ်ပညာရှင်များ အပြန် အလှန် အတွေ့အကြုံဖလှယ်နိုင်မယ့်နည်းလမ်းများကို နားလည်မှုစာချွန်လွှာ လက်မှတ်ရေးထိုးခြင်းမှတစ်ဆင့် အကောင်အထည်ဖော်ဆောင်ရွက်သွားနိုင်ရေး ဆွေးနွေးခဲ့ကြောင်း သိရပါတယ်။ 

ရုရှားရွေးကောက်ပွဲကော်မရှင်ဥက္ကဋ္ဌဟာ လာမယ့် ၂ဝ၂၄ ခုနှစ်မှာ ကျင်းပမယ့် ရုရှားသမ္မတရွေးကောက်ပွဲကို လာရောက်လေ့လာဖို့ မြန်မာနိုင်ငံကို ဖိတ်ကြားခဲ့ကြောင်း သိရပါတယ်။ မြန်မာနိုင်ငံမှာ မဲမသမှုများရှိခဲ့တယ်လို့ စွပ်စွဲမှုများ ထွက်ပေါ်လာခဲ့ပြီးနောက် ၂ဝ၂၁ ခုနှစ် ဖေဖော်ဝါရီလမှာ အာဏာရယူမှုများဖြစ်ပွားခဲ့ပြီးနောက် နစက ဟာ ရွေးကောက်ပွဲပြန်လည်ကျင်းဖို့ အစီအစဉ်များရှိနေရာ လာမယ့် ၂ဝ၂၅ ခုနှစ်မှာ ရွေးကောက်ပွဲကျင်းပနိုင်မယ့် အလားအလာများနေကြောင်း ပြီးခဲ့တဲ့သီတင်းပတ်အတွင်း ပြည်ခိုင်ဖြိုးပါတီရဲ့အကြီးတန်းခေါင်းဆောင်တစ်ဦးက ပြောပါတယ်။ 

အမေရိကန်အစိုးရဟာ နစကအဖွဲ့က ဦးဆောင်ကျင်းပမယ့်ရွေးကောက်ပွဲကို ရှက်ဖွယ်ကောင်းတဲ့ ရွေးကောက်ပွဲ အဖြစ် ဝေဖန်ပြစ်တင်ထားပေမယ့် ရုရှားအစိုးရကတော့ မြန်မာရွေးကောက်ပွဲကို အားပေးထောက်ခံထားကြောင်း သိရပါတယ်။ မြန်မာနိုင်ငံမှာ အာဏာရယူမှုဖြစ်ပွားခဲ့တဲ့ ၂ဝ၂၁ ခုနှစ် နောက်ပိုင်းကတည်းက ရုရှားနဲ့ မြန်မာနိုင်ငံ ကြား ဆက်ဆံရေး ယခင်ထက်ပိုမိုကောင်းမွန်ခဲ့ပြီး အပြန်အလှန်ဆက်သွယ်ဆောင်ရွက်ခဲ့ကြောင်း သိရပါတယ်။