ယွန်း (NSS) - သြဂုတ် ၃၁

ရက်ပိုင်းအတွင်း စားသုံးဆီဈေးနှုန်းများ သိသာစွာကျဆင်းရေး ဆောင်ရွက်မည်ဖြစ်ကြောင်း စီးပွား‌ရေးနှင့် ကူးသန်းရောင်းဝယ်‌ရေးဝန်ကြီးက အသိပေးပြောကြားထားသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦးက သြဂုတ်လ(၃၀)ရက်တွင် ဝန်ကြီးဌာန ရုံးအမှတ်(၃) အစည်းအဝေးခန်းမ(၂)၌ ကျင်းပခဲ့သည့် ပြည်တွင်းစားသုံးဆီဈေးနှုန်း တည်ငြိမ်ကျဆင်းရေး အစည်းအဝေးတွင် အထက်ပါကဲ့သို့  ပြောကြားခဲ့ခြင်းဖြစ်သည်။

နိုင်ငံတော်အနေဖြင့် စားအုန်းဆီကို ပြည်သူများ ဈေးနှုန်းသက်သာစွာ ဝယ်ယူစားသောက်နိုင်ရေးအတွက် စားသုံးဆီတင်သွင်းရာတွင် ဝယ်ယူကုန်ကျသည့် နိုင်ငံခြားငွေ၏ ၅၀ ရာခိုင်နှုန်းကို ဗဟိုဘဏ်ရည်ညွှန်းဈေးဖြင့် လည်းကောင်း၊ ကျန် ၅၀ ရာခိုင်နှုန်းကို ပြင်ပဈေးထက်သက်သာသည့် နိုင်ငံခြားငွေလဲလှယ်မှုနှုန်းထားဖြင့် ပံ့ပိုးဆောင်ရွက်ပေးထားကြောင်း သိရသည်။

သို့သော် စားသုံးဆီဈေးကွက်တွင် စားအုန်းဆီဈေးနှုန်းများသည် ဖြစ်သင့်ဖြစ်ထိုက်သည်ထက်များစွာ မြင့်တက်လျက်ရှိကြောင်း ဝန်ကြီး ဦးအောင်နိုင်ဦးက ပြောသည်။

ထို့ကြောင့် လုပ်ငန်းရှင်များအနေဖြင့် မိမိအကျိုးအမြတ်ရရှိမှု တစ်ခုတည်းကိုသာဦးမတည်ဘဲ စားသုံးသူများ သက်သာချောင်ချိစွာ စားသုံးနိုင်ရေးအတွက် ဦးစားပေးစဥ်းစားရန် စီးပွားကူးသန်းဝန်ကြီးက ပြော သည်။

ထို့ပြင် ညှိနှိုင်းမှုများကို လက်တွေ့ကျကျကြပ်မတ် အကောင်အထည်ဖော်သွားမည်ဖြစ်ပြီး ရက်ပိုင်းအတွင်း စားသုံးဆီဈေးနှုန်းများ သိသာစွာကျဆင်းစေရေးကို ဆောင်ရွက်သွားမည်ဖြစ်ကြောင်း ၎င်းက အသိပေးပြောကြားခဲ့သည်။

"ဆီဈေးက (၁၂၀၀၀)လောက်ဖြစ်နေပြီး (၉၀၀၀)ကနေ တဖြည်းဖြည်း ခုရက်ထဲမှာပဲတက်သွားတာ။ အရင်က ပိုက်ဆံ(၁၀၀၀၀)ရှိရင် အစုံဝယ်လို့ရတယ်။ အခု(၁၀၀၀၀)နဲ့ဆိုရင် ဆီတောင်မနည်းဝယ်နေရတယ်။  ကျန်တာဈေးမကျရင်နေပါ ဆန်နဲ့ဆီဈေးကျသွားရင် နည်းနည်းတော်သေးတာပေါ့"ဟု အိမ်ရှင်မတစ်ဦးက NSS ကိုပြောသည်။ 

လက်လီဈေးကွက်အတွင်း စားသုံးဆီများကို ယခင်အမြင့်ဈေးနှုန်းအတိုင်း ဆက်ရောင်းပါက ဝယ်ယူခြင်းမပြုရန်နှင့် တိုင်ကြားနိုင်ကြောင်းကို စားသုံးသူရေးရာဦးစီးဌာနက သြဂုတ်လ(၂၉)ရက်က ထုတ်ပြန်ထား သည်။

လက်ရှိတွင် ဈေးကွက်၌ ဆန် အပါအဝင် အခြေခံစားသောက်ကုန်များသည် ဈေးနှုန်းအမြင့်ပိုင်းတွင်ဆက်လက်ရှိနေပြီး စားသုံးသူပြည်သူများအနေဖြင့် ဈေးနှုန်းကြီးမြင့်မှုများကြောင့် အခက်အခဲများနှင့် ရင်ဆိုင်နေရကြောင်း သိရသည်။  

စားအုန်းဆီဈေးနှုန်းများ မြင့်တက်နေမှုနှင့်ပတ်သက်၍ ပြည်ထောင်စုဝန်ကြီးအနေဖြင့် ဇူလိုင်လ(၁)ရက်တွင် ရန်ကုန်မြို့၌လုပ်ငန်းရှင်များခေါ်ယူပြီး ဖြစ်သင့်ဖြစ်ထိုက်သည့် ဈေးနှုန်းများဖြင့် ရောင်းချရေးကို သတိပေးပြောကြားခဲ့သည်။

ဝန်ကြီးဌာနအနေဖြင့် စားသုံးဆီဖြန့်ဖြူးမှုနှင့်ပတ်သက်၍ လိုအပ်သည့် အစီအမံများချမှတ်ကာ ကြပ်မတ်သွားမည်ဖြစ်သည့်အတွက် ပူးပေါင်းဆောင်ရွက်ရန်လိုကြောင်း စီးပွားကူးသန်းဝန်ကြီးက တိုက်တွန်းပြောကြားထားသည်။