မျိုးကြီး (NSS) - သြဂုတ် ၂၈

ပုဂ္ဂလိကကျောင်းများ၌ နိုင်ငံတော်အလံ အလေးပြုခြင်းရှိ၊ မရှိအပါအဝင် သတင်းအချက်အလက်များကို ကွင်းဆင်းစစ်ဆေးကောက်ယူရန် နစက၏ ပညာရေးဝန်ကြီးဌာနက အဖွဲ့(၂)ဖွဲ့ကို ဖွဲ့စည်းထားကြောင်း သတင်းရရှိသည်။

အထက်မြန်မာပြည်နှင့် အောက်မြန်မာပြည်ရှိ အခြေခံပညာကိုယ်ပိုင်ကျောင်းများ၊ နိုင်ငံတကာသင်ရိုးသင် ပုဂ္ဂလိကကျောင်းများနှင့် ပုဂ္ဂလိကအဆင့်မြင့်ပညာကျောင်းများ၏ ဖွင့်လှစ်သင်ကြားဆောင်ရွက်နေသည့်အခြေအနေများကို စိစစ်နိုင်ရန်အတွက် အဖွဲ့(၂)ဖွဲ့ကို ဖွဲ့စည်းတာဝန်ပေးသည်ဟု ပညာရေးဝန်ကြီးဌာန ၏ အချက်အလက်များအရ သိရသည်။

အထက်မြန်မာပြည်ရှိ ပုဂ္ဂလိကျောင်းများစိစစ်ဆေးရေးအဖွဲ့ကို ပညာရေးဝန်ကြီးဌာနမှ ညွှန်ကြားရေးမှူး ချုပ် ဒေါက်တာ အောင်ဆွေထွန်းက ခေါင်းဆောင်အဖြစ်တာဝန်ယူထားပြီး အောက်မြန်မာပြည်ရှိ ပုဂ္ဂလိကကျောင်းများစိစစ်စစ်ဆေးရေးအဖွဲ့ကို ညွှန်ကြားရေးမှူးချုပ်ဦးကိုလေးဝင်းက ခေါင်းဆောင်အဖြစ် တာဝန်ယူထားသည်။

အဆိုပါကျောင်းများနှင့်ပတ်သက်၍ checklist နှင့် data collection form များ အသုံးပြုကာ သတင်းအချက်အလက်များ ကောက်ယူခြင်း၊ ကွင်းစစ်ဆေးခြင်းများကို ၎င်းအဖွဲ့(၂)ဖွဲ့က လုပ်ဆောင်သွားမည်ဖြစ်ကြောင်း သိရသည်။

ထို့ပြင် ယင်းကျောင်းများ၌ ဥပဒေနှင့်အညီ ကျောင်းမှတ်ပုံတင်ရှိ/မရှိ၊ ကျောင်းဖွင့်လှစ်သင်ကြားရန် ခွင့်ပြုမိန့်ရှိ/မရှိ၊ ကျောင်း အင်္ဂါရပ်ပြည့်စုံကောင်းမွန်မှုရှိ/မရှိနှင့် အခွန်ထမ်းဆောင်မှုရှိ/မရှိတို့ကိုလည်း စစ်ဆေးသွားမည်ဟု ပညာရေးဝန်ကြီးဌာနက အသိပေးထားသည်။

၎င်းကျောင်းများတွင် ပြည်ထောင်စုစိတ်ဓာတ်ရှင်သန်စေရန်၊ မြန်မာ့ယဉ်ကျေးမှု မပျောက်ပျက်စေရန် အမျိုးသားသင်ရိုး ညွှန်းတမ်ကော်မတီက သတ်မှတ်ထားသော မြန်မာစာ၊ မြန်မာ့သမိုင်းနှင့် မြန်မာ့ပထဝီဝင်သင်ရိုးညွှန်းတမ်းအပြည့်အစုံအား သင်ကြားခြင်းရှိ/မရှိကိုလည်း စစ်ဆေးသွားမည်ဟု သိရသည်။

ဇာတိသွေး၊ ဇာတိမာန်ထက်သန်စေမည့် အလေ့အကျင့်ကောင်းများ(နိုင်ငံတော်အလံ အလေးပြုခြင်း၊ နိုင်ငံတော်သီချင်းသီဆိုခြင်း)အား ပြုစုပျိုးထောင်ပေးနိုင်မှုရှိ/မရှိကိုလည်း အထက်ပါအဖွဲ့(၂)ဖွဲ့က စစ်ဆေးသွားမည်ဟု ပညာရေးဝန်ကြီးဌာနက အသိပေးထားသည်။

“များသောအားဖြင့် ကျွန်တော်တို့ ကိုယ်ပိုင်ကျောင်းတွေကတော့ နိုင်ငံတော်သီချင်း ဆိုတာတို့၊ ဘာတို့ကတော့ သူ့ရဲ့ မူဝါဒနဲ့အညီ အခြေခံပညာကျောင်းတွေနဲ့ အတူတူပဲ။ အမျိုးသားပညာရေးဥပဒေအောက်မှာအတူတူပဲ လုပ်ရတဲ့အခါကြတော့ ကျွန်တော်တို့ ကိုယ်ပိုင်ကျောင်းတွေက နိုင်ငံတော်သီချင်းဆိုတာတွေ လုပ်ကြပါတယ်။ နောက်ကလေးတွေလည်း မြန်မာ့ယဉ်ကျေးမှုနဲ့အညီ ယဉ်ကျေးလိမ္မာလာအောင် ယဉ်ကျေးလိမ္မာသင်တန်းတွေလည်း ဖွင့်ပေးတာတွေရှိတယ်” ဟု ရန်ကုန်မြို့ရှိ ကိုယ်ပိုင်ကျောင်းတစ်ကျောင်းမှ ကျောင်းအုပ်ကြီးတစ်ဦးက NSS ကို မှတ်ချက်ပြုပြောကြားထားသည်။

ထို့ပြင် ပြည်ပနိုင်ငံများ၏ ယဉ်ကျေးမှု၊ ဓလေ့ထုံးတမ်းများနှင့် ဘာသာတရားများကို ထည့်သွင်းစည်းရုံးသင်ကြားပို့ချမှုရှိ/မရှိ၊ အတန်းအလိုက် သင်ကြားမှုများဆောင်ရွက်ရာတွင် နိုင်ငံရေးအရောင်အသွေးပါရှိမှု ရှိ/မရှိနှင့် ဘာသာရေး၊ နိုင်ငံရေး စွက်ဖက်လွှမ်းမိုးမှုရှိ/မရှိကိုလည်း စစ်ဆေးမည်ဖြစ်ကြောင်း သိရသည်။

“ဒါတွေကတော့ ဖြစ်သင့်ပါတယ်။ ကျွန်တော်တို့က နိုင်ငံ့သားကောင်းတွေကို မွေးထုတ်နေတဲ့ ကျောင်းတွေပဲလေ။ နိုင်ငံ့သားကောင်းတွေကို မွေးထုတ်နေတဲ့ ကျောင်းတွေဆိုတော့ စစ်ကိုစစ်ဆေးရမယ်။ မလုပ်တဲ့ကျောင်းတွေကိုလည်း ပညာပေးရမယ်။ အရေးယူရမယ်” ဟု အထက်ပါကျောင်းအုပ်ကြီးက ဆက် လက်ပြောသည်။

ပညာရေးဝန်ကြီးဌာန၏ စိစစ်စစ်ဆေးရေးအဖွဲ့အနေဖြင့် ပြီးခဲ့သော ရက်ပိုင်းများအတွင်း၌ ရန်ကုန်မြို့ရှိ International School (၃၀)ခန့်ကို ကွင်းဆင်းစစ်ဆေးသွားခဲ့ကြောင်း သိရသည်။