စော(NSS) - ဩဂုတ် ၂၇

မြန်မာနိုင်ငံရေကြောင်းပညာတက္ကသိုလ်မှ ရေကြောင်းသိပ္ပံပညာ (ဂုဏ်ထူး)ဘွဲ့ဆိုင်ရာ ပထမနှစ်သင်တန်းအတွက် သင်တန်းသားများခေါ်ယူသွားမည်ဖြစ်ကြောင်း သိရသည်။

ပို့ဆောင်ရေးနှင့်ဆက်သွယ်ရေးဝန်ကြီးဌာန၊ မြန်မာနိုင်ငံ‌‌ရေကြောင်းပညာတက္ကသိုလ်မှ ယနေ့(ဩဂုတ်လ ၂၇ရက်)ထုတ် နိုင်ငံပိုင်သတင်းစာများတွင် အထက်ပါကဲ့သို့ထုတ်ပြန်ထားခြင်းဖြစ်သည်။

အဆိုပါသင်တန်းတွင် အင်ဂျင်နီယာဘွဲ့ဖြစ်သည့် ရေယာဉ်တည်ဆောက်မှု၊ ရေကြောင်းအင်ဂျင်နီယာ၊ ဆိပ်ကမ်းအင်ဂျင်နီယာ၊ မြစ်ချောင်းနှင့်ကမ်းရိုးတန်းအင်ဂျင်နီယာတို့ကို ဖွင့်လှစ်သွားမည်ဖြစ်ကြောင်း သိရသည်။

ထို့ပြင် အင်ဂျင်နီယာဘွဲ့ဖြစ်သည့် ရေကြောင်းလျှပ်စစ်နှင့် အီလက်ထရောနစ်အင်ဂျင်နီယာ၊ ရေကြောင်းစက်မှုအင်ဂျင်နီယာနှင့် သိပ္ပံဂုဏ်ထူးဘွဲ့ဖြစ်သည့် ရေကြောင်းသိပ္ပံကိုလည်း ဖွင့်လှစ်သွားမည်ဖြစ်ကြောင်း ထုတ်ပြန်ထားသည်။

၎င်းသင်တန်းများအတွက် သင်တန်းသားဦးရေ စုစုပေါင်း(၃၀၀)သာလက်ခံသွားမည်ဖြစ်ပြီး လုပ်ငန်းသဘောသဘာဝအရ အမျိုးသမီးဦးရေ(၂၀)ရာခိုင်နှုန်းသာ လက်ခံနိုင်မည်ဖြစ်ကြောင်း ထုတ်ပြန်ချက်တွင်ပါရှိသည်။

မြန်မာနိုင်ငံရေကြောင်းတက္ကသိုလ်သို့ တက်ရောက်လိုသူများသည် (၂၀၂၃)ခုနှစ် တက္ကသိုလ်ဝင်စာမေးပွဲကို အမှတ်(၄၂၀)နှင့်အထက်ရရှိရန်လိုအပ်ကြောင်း ထုတ်ပြန်အရ သိရသည်။

ထို့ပြင်လျှောက်ထားလိုသူများသည် မြန်မာစာ၊ အင်္ဂလိပ်စာ၊ သင်္ချာ၊ ရူပဗေဒ၊ ဓာတုဗေဒ၊ ဇီဝဗေဒ၊ ဘောဂဗေဒ နှင့် ပထဝီဝင်ဘာသာရပ်များဖြင့် အောင်မြင်သူဖြစ်ရန်လိုကြောင်း သိရသည်။

ဝင်ခွင့်လျှောက်လွှာပုံစံကို ဩဂုတ်လ (၂၈)ရက်မှစတင်၍ တက္ကသိုလ်၏ Website သို့မဟုတ် ကျောင်း သားရေးရာဌာနတွင် ရယူနိုင်ပြီး စာတိုက်မှဖြစ်စေ ၊ လူကိုယ်တိုင်ဖြစ်စေ ကျောင်းသားရေးရာဌာနသို့ စက်တင်ဘာလ(၂၉)ရက်အထိ လျှောက်ထားနိုင်ကြောင်း သိရသည်။