Pika (NSS) - ဩဂုတ် ၂၆

ယမန်နေ့ (ဩဂုတ်လ(၂၅)ရက်)၊ ညက ကစားခဲ့သောလူတန်တောင်းအသင်းနှင့်ပွဲတွင် (၃)ဂိုး၊ ဂိုးမရှိဖြင့် အနိုင်ရရှိခဲ့ပြီးနောက် နည်းပြသစ်ပိုချက်တီနိုသည် ပရီးမီးယားလိဂ်တွင် ချဲလ်ဆီးအသင်းနည်းပြအဖြစ် ၎င်း၏ပထမဆုံးနိုင်ပွဲကို ရရှိခဲ့ခြင်းကို ဝမ်းသာမိကြောင်း ထုတ်ဖော်ပြောဆိုခဲ့သည်။

လူတန်တောင်းအသင်းနှင့်ကစားခဲ့သည့်ပွဲတွင် ချဲလ်ဆီးအသင်း တောင်ပံကစားသမား စတာလင်သည် ပွဲချိန်(၁၇)မိနစ်တွင် အဖွင့်ဂိုးကိုသွင်းယူပေးနိုင်ခဲ့ပြီး ပွဲချိန်(၆၈)မိနစ်တွင် တစ်ဂိုးထပ်မံသွင်းယူပေးနိုင်ခဲ့ခြင်းဖြစ်သည်။ ထို့နောက် ချဲလ်ဆီးအသင်းတိုက်စစ်မှူး နီကိုလက်စ်ဂျက်ဆင်သည် ပွဲချိန်(၇၅)မိနစ်တွင် တစ်ဂိုးထပ်မံသွင်းယူပေးနိုင်ခဲ့ပြီးနောက် (၃)ဂိုး၊ ဂိုးမရှိဖြင့် အနိုင်ရရှိခဲ့ခြင်းဖြစ်သည်။

ချဲလ်ဆီးအသင်းသည် လက်ရှိပရီးမီးယားလိဂ်ရာသီအစတွင် လီဗာပူးလ်၊ ဝက်စ်ဟမ်းအသင်းတို့နှင့်ယှဉ်ပြိုင်ကစားခဲ့ပြီး တစ်ပွဲရှုံးကာ၊ တစ်ပွဲသရေဖြင့် အမှတ်(၁)မှတ်သာ ရယူနိုင်ခဲ့ခြင်းဖြစ်ကြောင်းသိရသည်။ သို့သော်လည်း ချဲလ်ဆီးအသင်းသည် လူတန်တောင်းနှင့်ကစားခဲ့သော တတိယမြောက် ပရီးမီးယားလိဂ်ပွဲစဉ်တွင် (၃)ဂိုး၊ ဂိုးမရှိဖြင့် အနိုင်ရရှိခဲ့ပြီးနောက် အမှတ်(၃)မှတ်ရယူနိုင်ခဲ့ခြင်းဖြစ်သည်။ 

ချဲလ်ဆီးနည်းပြပိုချက်တီနိုက "လူတန်တောင်းနဲ့ကစားပွဲကို အနိုင်ရရှိခဲ့တဲ့အတွက် ဝမ်းသာမိပါတယ်။ ဒါဟာ ကစားသမားတွေ၊ ပရိသတ်တွေအတွက် ထိုက်တန်တဲ့ အနိုင်ရရှိမှုတစ်ခုပါ။ ပထမဆုံးနိုင်ပွဲက တကယ်ကို အရေးကြီးပြီး အသင်းကစားသမားတွေဟာ ယုံကြည်မှုအပြည့်နဲ့ ခြေစွမ်းပြကစားနိုင်ခဲ့တဲ့အတွက်လည်း ပျော်ရွှင်မိပါတယ်။ ဒီလိုနိုင်ပွဲတွေဟာ လာမယ့်ပွဲစဉ်တွေအတွက် အကောင်းဆုံး စိတ်ခွန်အားဖြစ်စေတဲ့ အရာတွေပါပဲ"ဟုပြောဆိုခဲ့သည်။