ယွန်း (NSS) - သြဂုတ် ၂၄

မာရဝိဇယဗုဒ္ဓရုပ်ပွားတော်ကြီး၌ လျှပ်စစ်မီတာခသည် တစ်လလျှင် ငွေကျပ်သိန်း(၁၅၀၀) နှင့် (၂၀၀၀) ကြားတွင် ကုန်ကျနေပြီး ကုန်ကျစရိတ်ကို နိုင်ငံတော် ဘတ်ဂျက်မှ သုံးစွဲမည် မဟုတ်ကြောင်း နစကပြောခွင့်ရက အသိပေးပြောကြားခဲ့သည်။

နစကပြောခွင့်ရ ဗိုလ်ချုပ်ဇော်မင်းထွန်းက ပြီးခဲ့သည့် (သြဂုတ်လ ၂၂ ရက်)တွင် နေပြည် တော်ရှိ ပြန်ကြားရေးဝန်ကြီးဌာန၌ ကျင်းပသည့် နစက၏သတင်းစာရှင်းလင်းပွဲတွင် အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

လက်ရှိတွင် ဘုရားကြီးအား စက်တင်ဘာလ(၃)ရက်အထိ အခမဲ့ဖူးမြော်ခွင့်ပြုထားပြီး ဘုရားဖူးပြည်သူများ နေ့စဥ်များပြားလျက်ရှိကြောင်း သိရသည်။

သို့သော် စက်တင်ဘာလ(၃)ရက်နောက်ပိုင်းမှစ၍ ဘုရားကြီးတည်တံ့ခိုင်မြဲရေးနှင့် သန့်ရှင်းသာယာလှပရေးအတွက်လိုအပ်သည့် လုပ်ငန်းများဆောင်ရွက်နိုင်ရန်လိုအပ်သည့် ငွေကြေးများရရှိရေးအတွက် ဝင်ကြေးငွေကောက်ခံသွားမည်ဖြစ်ကြောင်း သိရသည်။

“လျှပ်စစ်မီတာခက တစ်လကို သိန်း(၁၅၀၀)နဲ့ (၂၀၀၀)ကြားလောက်ကို ကျပါတယ်။ ကျန်တာတွေမပါသေးဘူး။ သန့်ရှင်းရေးတွေ၊ ရေမီးတွေအတွက် ဝန်ထမ်းတွေလည်း ခန့်ရပါမယ်။ အနည်းဆုံး (၆၀၀)နဲ့ (၇၀၀)ကြားလောက်ခန့်ရမယ့် အနေအထားမှာရှိပါတယ်။ ဒီကုန်ကျ စရိတ်တွေကို နိုင်ငံတော်ဘတ်ဂျက်ကနေသုံးဖို့ မူဝါဒအရ မဖြစ်နိုင်ပါဘူး။ ထုံးစံလည်းမရှိဘူး။ ဘယ်ဘုရားစေတီမှာမှ ထုံးစံမရှိပါဘူး။ ယခင်ကလည်းမရှိဖူးပါဘူး။ ဒါကြောင့်မို့လို့ ဖူးမြော်ကုသိုလ်ယူသူများအတွက် ကုသိုလ်ယူခွင့်(၁၀၀၀)ကျပ် ကောက်ခံတာဖြစ်ပါတယ်” ဟု နစက ပြောခွင့်ရ ဗိုလ်ချုပ်ဇော်မင်းထွန်းက ပြောသည်။

ဘုရားကြီးဖူးမြော်ခွင့်အတွက် ဝင်‌ကြေးအား ကလေး၊ လူကြီးတစ်ဦးလျှင် ငွေကျပ်(၁၀၀၀) နှုန်းသာ သတ်မှတ်ထားပြီး အပျော်ရိုက်ကင်မရာယူဆောင်ခွင့်အတွက် ငွေကျပ်(၅၀၀၀)နှုန်းသတ်မှတ်ထားကြောင်း သိရသည်။

ရဟန်းသံဃာတော်များ၊ ကျောင်းသား၊ ကျောင်းသူများအနေဖြင့် အခမဲ့ဖူးမြော်နိုင်မည်ဖြစ်ပြီး ဝန်ထမ်းများဖြစ်ပါက ဝန်ထမ်းကတ်ဖြင့် ၅ဝ ရာခိုင်နှုန်းသာ ကောက်ခံမည်ဖြစ်ကြောင်း သိရသည်။

“ဖုန်းနဲ့ပတ်သက်လို့ သာမန်သုံးနေတဲ့ဖုန်းဆို ကိစ္စမရှိပါဘူး။ ခုခေတ်မှာက တစ်ချို့ဖုန်းတွေက professional ကင်မရာတွေနီးပါးလောက်ကို ကောင်းတာတွေရှိတယ်။ ဒီဖုန်းတွေနဲ့ပဲ short video ရိုက်တာတွေ ဇာတ်ကားရိုက်တင်တာတို့တွေ တွေ့ပါလိမ့်မယ်။ ဒါကြောင့် ဒီလိုမျိုးလုပ်နိုင်တာတွေဆိုရင်တော့ တစ်နည်းတစ်ဖုံစဥ်းစားမှာဖြစ်ပါတယ်။ အများပြည်သူ သာမာန်သုံးနေတဲ့ဟာမျိုးဆိုရင်တော့ တစ်နည်းတစ်ဖုံစဥ်းစားမှာဖြစ်ပါတယ်” ဟု ဗိုလ်ချုပ်ဇော်မင်းထွန်းက ဆက်လက်ပြောသည်။

မာရဝိဇယဗုဒ္ဓရုပ်ပွားတော်အား အနေကဇာတင်ခြင်း၊ ကျောက်စာရုံစေတီများအား ထီးတော်တင်လှူခြင်းအခမ်းအနားများကို ပြီးခဲ့သည့် သြဂုတ်လ (၁)ရက်တွင် ကျင်းပခဲ့ပြီးနောက် သြဂုတ်လ (၈) ရက်တွင် ပြည်သူများအား စတင်ဖူးမြော်ခွင့်ပြုခဲ့သည်။