သန့်ဇင်(NSS) - ဩဂုတ် ၂၄

အုပ်စု(ဂ)၏ ပထမနေ့တွင် ယှဉ်ပြိုင်ကစားခဲ့သည့် ပွဲစဉ်(၂)ပွဲလုံးတွင် မြန်မာ့လက်ရွေးစင် U-12 အသင်း အနေဖြင့် ရှုံးနိမ့်ခဲ့ကြောင်း မြန်မာနိုင်ငံဘောလုံးအဖွဲ့ချုပ်မှ ထုတ်ပြန်ထားသည်။

အဆိုပါ ပြိုင်ပွဲကို ယနေ့(ဩဂုတ်လ ၂၄ ရက်)၊ နံနက် ၇နာရီ ၄၅မိနစ်အချိန်တွင် အုပ်စုပထမပွဲစဉ်အဖြစ် ဂျပန်နိုင်ငံ ချီဘာမြို့တွင် ယှဉ်ပြိုင်ကစားခဲ့ခြင်းဖြစ်ပြီး မြန်မာU-12 အသင်းက ဘာစီလိုနာ U-12 အသင်းကို ၄ဂိုး၊ ဂိုးမရှိဆိုသည့် ရလဒ်ဖြင့် အရေးနိမ့်ခဲ့ခြင်းဖြစ်သည်။

မြန်မာ U-12 အသင်းမှ ပွဲထွက်လူစာရင်းအနေဖြင့် လရောင်လင်း၊ မင်းဘုန်းသစ်၊ ရှင်းပြည့်ကျော်၊ ခွန်မောင်ဘွေ၊ တေဇာဖြိုး၊ ဇင်မင်းမြတ်သူ၊ ခွန်းဝေဖြိုး၊ အောင်လ၊ အံ့မင်းမြတ်၊ ရှိုင်းဝင်းထွဋ်တို့ ပါဝင်ယှဉ်ပြိုင်ကစားခဲ့ကြောင်း (MFF)ကထုတ်ပြန်ထားသည်။

ထို့ပြင် ယနေ့ နံနက် ၁၀နာရီ အချိန်တွင် မြန်မာ U-12 အသင်းအနေဖြင့် ဒုတိယမြောက်ပွဲစဉ်အဖြစ် JEF United Ichihara Chiba U-12 အသင်းနှင့် ယှဉ်ပြိုင်ကစားခဲ့ရာတွင်လည်း ၃ဂိုး ၊၁ဂိုးဖြင့် ထပ်မံရှုံးနိမ့်ခဲ့ကြောင်း သိရသည်။

ယခုကျင်းပပြုလုပ်လျက်ရှိသော ၁၁ ကြိမ်မြောက် U-12 Junior Soccer World Challenge 2023 ပြိုင်ပွဲကို ဂျပန်နိုင်ငံ၊ ချီဘားမြို့တွင် ယနေ့ (ဩဂုတ်လ ၂၄ ရက်)မှစတင်ကာ ၂၇ရက်အထိ ကျင်းပပြုလုပ်သွားမည်ဖြစ်သည်။

မြန်မာ U-12 အသင်းအနေဖြင့် လာမည့် (ဩဂုတ်လ ၂၅ ရက်)တွင် Daiwa House Dream U-12 အသင်းနှင့် ဆက်လက်ယှဉ်ပြိုင်ကစားသွားဖွယ်ရှိနေသည်။