NSS - ဩဂုတ် ၁၉

မြဝတီ-ကော့ကရိတ် ဒေါနတောင်ကျော်လမ်းဟောင်းတွင် ယမန်နေ့ (ဩဂုတ်လ ၁၈ ရက်)က ယာဉ်မတော်တဆမှုဖြစ်ပွားခဲ့ခြင်းကြောင့် လမ်းပိတ်ဆို့မှုဖြစ်ပွားခဲ့ပြီး ယာဉ်အသွားအလာများ ရပ်တန့်ခဲ့ရကြောင်း သိရသည်။

အဆိုပါ လမ်းဟောင်းမှသွားသည့် Toyota Hi-Ace (အန်စာတုံး) အမျိုးအစားကားသည် ‌အခြားယာဉ်ကို ကျော်တက်ရာမှ ချောက်ထဲထိုးကျကာ တိမ်းမှောက်သွားခဲ့ခြင်းဖြစ်ကြောင်း သိရသည်။

“အလယ်ဗဟိုတဲအနီးမှာရှိတဲ့ နှစ်ထပ်ကွေ့မှာဖြစ်တာပါ။ မြဝတီကနေ ကော့ကရိတ်ကိုဆင်းတဲ့ကားပါ။ ကားကျော်တက်ရင်းလမ်းဘေးထိုးကျသွားတာ အောက်မှာရှိတဲ့လမ်းပေါ်ကို ကားကကျသွားပြီး လမ်းပိတ်သွားတာပေါ့။ သစ်ပင်တွေ အများကြီးရှိနေလို့ ကံကောင်းသွားတာပါ။ အခုတော့လမ်းပြန်ပွင့်သွားပါပြီ။ယာဉ်မောင်းနဲ့ဒါဏ်ရာရသူတွေကို ကော့ကရိတ်မြို့နယ်ဆေးရုံကိုပိုဆောင်ထားပါတယ်”ဟု ဒေသခံ လူမှုကူညီရေးအသင်း တာဝန်ခံတစ်ဦးက NSS ကိုပြောသည်။

တိမ်းမှောက်ခဲ့သည့် မော်တော်ယာဉ်အား ရှင်းလင်းဖယ်ရှားထားပြီးဖြစ်သည့်အတွက် ယနေ့ (ဩဂုတ်လ ၁၉ ရက်)နံနက်ပိုင်းမှစတင်ကာ လမ်းပြန်ပွင့်သွားပြီဖြစ်ပြီး အိမ်စီးကားများ၊ အံစာတုံးကားများသာမက ခြောက်ဘီးကားများပါ ပြန်လည်မောင်းနှင်သွားလာနေကြောင်းသိရသည်။ 

မြဝတီ - ကော့ကရိတ်သွား လမ်းဟောင်းသည် ဒုတိယကမ္ဘာစစ်အတွင်းက ဖောက်လုပ်ခဲ့သောလမ်းဖြစ်ပြီး အရှလမ်းမကြီးမဖွင့်လှစ်မီအချိန်အထိ အသုံးပြုခဲ့ကြသည်။

လက်ရှိ၌ သြဂုတ်လ ၇ ရက်တွင် ရာသီဥတုကြောင့် လမ်းမြေပြိုကျပျက်စီးသွားခဲ့သည့် အာရှလမ်းပိုင်း အား အစားထိုးအသုံးပြုနေသည့် ဒေါနတောင် လမ်းဟောင်းကို သြဂုတ်လ ၁၄ရက်မှစတင်ကာ တစ်ရက် ဆင်း၊ တစ်ရက်တက်စနစ်ဖြင့် ဖြတ်သန်းသွားလာနေကြကြောင်းသိရသည်။ လမ်းဟောင်းသည်အကွေ့အဝိုက်အတက်အဆင်း မတ်စောက်သည့်အတွက် ကျွမ်းကျင်သောယာဉ်မောင်းများသာ မောင်းနှင်နိုင်ကြောင်းသိရသည်။