ယွန်း (NSS) - သြဂုတ် ၁၇

အချို့သောဆေးခန်းများ နှင့် Online Clinic များတွင် ကိုဗစ်ကာကွယ်ဆေးအတုများ ထိုးနှံ‌ပေးမှုများရှိနေကြောင်း ကျန်းမာရေးဝန်ကြီးဌာနမှ ထုတ်ပြန်ထားသည်။

ကျန်းမာရေးဝန်ကြီးဌာန၊ အစားအသောက် နှင့် ဆေးဝါးကွပ်ကဲရေးဦးစီးဌာနမှ သြဂုတ်လ(၁၆)ရက်တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ဝန်ကြီးဌာနအနေဖြင့် ဆေးဝါးများ ဘေးအန္တရာယ်ကင်းရှင်းမှုရှိစေရန် နှင့် အရည်အသွေး၊ အကျိုးအာနိသင် ထိရောက်မှုရှိစေရန် ဆေးဝါးမှတ်ပုံတင်ခြင်း၊ ထုတ်လုပ်ခြင်းနှင့် တင်သွင်ခြင်းလုပ်ငန်းများကို စနစ်တကျ စိစစ် ဆောင်ရွက်လျက်ရှိကြောင်း သိရသည်။

ထို့ကြောင့် Myanmar FDA Registration No. ပါရှိသော ဆေးဝါးများကိုသာ သုံးစွဲရန် ကျန်းမာရေးဝန်ကြီးဌာနမှ အသိပေးထုတ်ပြန်ထားသည်။

လက်ရှိတွင် အချို့သောဆေးခန်းများနှင့် Online Clinic များသည် Online Facebook Page များမှတစ်ဆင့် တရားမဝင်တင်သွင်းသည့်  Moderna COVID-19 Bivalent Original and Omicron BA4/ BA5 ကာကွယ်ဆေး နှင့် Lot No.AS7185B (Exp: Date 04July2023) Lot No. AS7144B (Exp: Date 12 May2023) ကာကွယ်ဆေး အတုများကို ထိုးနှံပေးမှုများရှိနေကြောင်း ကျန်းမာရေးဝန်ကြီးဌာန မှ အသိပေးထုတ်ပြန်ထားသည်။

ကျန်းမာရေးဝန်ကြီးဌာနအနေဖြင့် အများပြည်သူ ရောဂါဘယဖြစ်ပွားမှုကင်းဝေးစေရန် ဘေးအန္တရာယ်ကင်းရှင်းပြီး အရည်အသွေး၊ အာနိသင် ထိရောက်မှုရှိသော ကာကွယ်ဆေးများကို ထိုးနှံ‌ပေးလျက်ရှိကြောင်း သိရသည်။

ထို့ကြောင့် ပြည်သူများအနေဖြင့် တိုင်းနှင့် ပြည်နယ်များအတွင်း ကျန်းမာရေးဝန်ကြီးဌာန၏ အစီအစဥ်ဖြင့် ထိုးနှံ ပေးနေသော Covid-19 ကာကွယ်ဆေးများကို သွားရောက်ထိုးနှံကြရန် ထုတ်ပြန်ချက်တွင် ဖော်ပြထားသည်။