မျိုးကြီး (NSS) - သြဂုတ် ၁၆

ငြိမ်းချမ်းရေးဆွေးနွေးမှုများ ထပ်မံပြုလုပ်ရန် နစက၏ NSPNC က NCA ရေးထိုးထားသော EAO အဖွဲ့များထံ အကြောင်းကြားညှိနှိုင်းထားကြောင်း သတင်းရရှိသည်။

ဒုတိယဗိုလ်ချုပ်ကြီးရာပြည့် ဦးဆောင်သော NSPNC က ယနေ့(သြဂုတ်လ ၁၆ ရက်)တွင် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ရေးထိုးထားသည့် EAO အဖွဲ့များထံသို့ အကြောင်း ကြားညှိနှိုင်းခဲ့ခြင်းဖြစ်ကြောင်း သိရသည်။

“နေပြည်တော် NSPNC ကနေပြီးတော့ မတွေ့ဆုံတာလည်း ကြာပြီ။ ဒါကြောင့်မိုလို့ ဘယ်နေ့၊ ဘယ်ရက်လောက်မှာ ပြန်လည်တွေ့ဆုံနိုင်ဖို့ အဆင်ပြေနိုင်မှုရှိမလဲဆိုတာကို စတင်ပြီးတော့ ညှိနှိုင်းတာပေါ့ဗျာ။ အဲဒီလိုမျိုး ကြားရတာတော့ ရှိပါတယ်” ဟု KNU/KNLA-PC မှ ဗိုလ်မှူးကြီးစောကျော်ညွန့်က NSS ကို ပြောသည်။

ပြီးခဲ့သော ဇွန်လကုန်ပိုင်း၌ နစက၏ NSPNC နှင့် NCA ရေးထိုးထားသည့် ALP၊ DKBA၊ KNU/KNLA-PC၊ LDU၊ PNLO တို့ (၅)ဖွဲ့သည် နေပြည်တော်၌ ငြိမ်းချမ်းရေးတွေ့ဆုံဆွေးနွေးခဲ့ကြသည်။

“ပြီးခဲ့တဲ့ အခင်းအကျင်းမှာတော့ ဖိတ်တာကိုတော့ တစ်ဖွဲ့ချင်းစီးကို ဖိတ်တယ်။ တစ်ဖွဲ့ချင်းစီကို ဖိတ်တယ်ဆိုပေမယ့်လည်း ကျွန်တော်တို့ ဒီအထဲက (၅)ဖွဲ့ကတော့ စုပြီးသွားတယ်။ NMSP နဲ့ RCSS ကတော့ စုသွားဖို့ အဆင်မပြေသေးဘူး။ သီးသန့်သွားပြီးတော့ တွေ့ဆုံတာပေါ့ဗျာ။ ဒါပြီးခဲ့တဲ့ အခင်းအကျင်းကို ကျွန်တော်ပြောတာပါ” ဟု ဗိုလ်မှူးကြီးစောကျော်ညွန့်က ထပ်မံပြောသည်။

ထို့ကြောင့် နစက၏ NSPNC နှင့် EAO များအကြားတွင် ယခုသြဂုတ်လကုန်ပိုင်း၌ ထပ်မံ၍ ငြိမ်းချမ်းရေးဆွေးနွေးရန် ဖြစ်ပေါ်လာနိုင်သည်ဟုလည်း ၎င်းက ဆက်လက်ပြောသည်။

လာမည့် ငြိမ်းချမ်းရေးဆွေးနွေးပွဲ၌ ငြိမ်းချမ်းရေးညီလာခံကျင်းပရေးကိစ္စရပ်များနှင့်ပတ်သက်၍ ဆွေးနွေးညှိနှိုင်းမှုများ ရှိလာနိုင်သည်ဟုလည်း ဗိုလ်မှူးကြီးစောကျော်ညွန့်က ပြောသည်။

“တွေ့ဆုံဆွေးနွေးမှုတွေက အေးစက်နေတာ ကြာပြီဆိုတော့လေ အဲဒီတွေ့ဆုံဆွေးနွေးမှုတွေ နောက်ဆုံးလုပ်ခဲ့တဲ့အချိန်တုန်းကတော့ ငြိမ်းချမ်းရေးညီလာခံကျင်းပနိုင်ဖို့အတွက် ကြိုးပမ်းဆောင်ရွက်ပါမည်ဆိုတဲ့ နှစ်ဖက်ဘုံသဘောထားမှတ်တမ်းနဲ့ပဲ ကျွန်တော်တို့က အဆုံးသတ်ခဲ့တယ်လေ။ အဲဒီနောက်ပိုင်း ကျွန် တော်တို့က တွေ့ဆုံမှုတွေ မလုပ်နိုင်ခဲ့ဘူးဆိုတော့ အချိန်တွေအကြာကြီး မျောသွားတာပေါ့လေ။ ငြိမ်းချမ်းရေးညီလာခံကိစ္စကတော့ ဒီလာမယ့် တွေ့ဆုံဆွေးနွေးမှုအခင်းအကျင်းမှာ ကျွန်တော်တို့ အသေးစိတ်ဆွေးနွေးတိုင်ပင်ညှိနှိုင်းဖို့တော့ ရှိမယ်လို့ အဲဒီလိုနားလည်းပါတယ်”ဟု ၎င်းက ဆက်လက်ပြောသည်။

NCA ရေးထိုးထားသည့် တိုင်းရင်းသားလက်နက်ကိုင်အဖွဲ့ (၁၀)ဖွဲ့ရှိသည့်အနက် (၇)ဖွဲ့သည် နစကနှင့် ငြိမ်းချမ်းရေးတွေ့ဆုံ ဆွေးနွေးမှုများပြုလုပ်လျက်ရှိပြီ KNU၊ CNF နှင့် ABSDF တို့သည် ဆွေးနွေးခြင်းမရှိဘဲ လက်နက်ကိုင်တော်လှန်လျက်ရှိသည်။

ထို့ပြင် NCA ရေးထိုးထားခြင်းမရှိသော “ဝ”အဖွဲ့ UWSP၊ မိုင်းလားအဖွဲ့ NDAA နှင့် ရှမ်းအဖွဲ့ SSPP တို့သည်လည်း လက်ရှိ နစက၏ NSPNC နှင့် ငြိမ်းချမ်းရေးတွေ့ဆုံဆွေးနွေးလျက်ရှိသည်။